Pheletso ea Iseraele e haufi
1Lentsoe la Morena la boela la fihla ho 'na, la re: 2“Uena ngoan'a motho, Morena Molimo o bua tjena ho naha ea Iseraele: Pheletso e fihlile! Pheletso e fihletse liqola tse 'ne tsa naha. 3Pheletso e u oetse holimo, 'me ke tla u halefela haholo. Ke tla u ahlōla ho ea ka boitšoaro ba hao, ke u putse ho ea ka mesebetsi eohle ea hao e manyala. 4Ha nka ke ka u hauhela kapa ka u utloela bohloko, empa ke tla u putsa ho latela boitšoaro ba hao, le mesebetsi e nyonyehang e har'a lōna, 'me le tla tseba hore ke 'na Morena.
5“Morena Molimo o bua tjena: Koluoa! Koluoa eo ho seng e tšoanang le eona ea tla. 6Pheletso e fihlile; pheletso e fihlile, e le lebeletse; bonang, e fihlile. 7Letsatsi le u chabetse, uena ea ahileng naheng. Nako e fihlile, letsatsi la tsietsi le haufi, ha ho thabo e tla utloahala lithabeng, haese mehoo ea tšabo feela.
8“Haufinyane ke tla hlatsetsa bohale ba ka holim'a hao, ke phethahatse khalefo ea ka ho uena. Ke tla u ahlōla ho ea ka boitšoaro ba hao, ke u putse ho ea ka mesebetsi eohle ea hao e manyala. 9Ha nka ke ka u hauhela kapa ka u utloela bohlōkō. Ke tla u putsa ho ea ka boitšoaro ba hao le ka mesebetsi ea hao e manyala har'a lōna. Joale le tla tseba hore ke 'na Morena ea otlang.
10“Bonang letsatsi, bonang letsatsi le fihlile, mafube a se a liketse, lekala le fupulitse, boikhōhōmōso bo entse lithunthung. 11Meferefere e fetohile thupa e otlang bokhopo; ha ho le ea mong oa bona le oa sehlopha sa bona ea tla phonyoha; ha ho maruo a tla sala leha e le ntho ea bohlokoa. 12Nako e fihlile, letsatsi le atametse; moreki a se ke a thaba, kapa morekisi a lla, hobane sechaba sohle se fihletsoe ke khalefo.
13“Morekisi a ke ke a boela a lata seo a se rekisitseng, leha bobeli ba bona ba ntse ba phela, hobane sechaba sohle se tla oeloa ke khalefo e ke keng ea hlola e sa khutla. Ka baka la libe tsa bona ha bo le ea mong oa bona ea tla pholoha. 14Leha ba ka letsa terompeta, hore bohle ba itokise, ha ho le ea mong ea tla ea ntoeng, hobane khalefo ea ka e befetse mokhopi oohle.
Iseraele e otloa ka baka la libe tsa eona
15“Sabole e kathōko ho motse, kahare ho oona ke lefu la seoa le sekoboto. Ba har'a naha ba tla bolaoa ka sabole, ba kahar'a motse ba bolaoe ke sekoboto le ke lefu la seoa. 16Bohle ba tla phonyoha ba tla balehela lithabeng, ba kuruetse sa maeba a likhohlo, motho ka mong a llele libe tsa hae. 17Matsoho a bohle a tla khathala, mangoele 'ohle a otlane ke letsoalo. 18Ba tla itlama matheka ka tse mahoashe, tšabo e ba oele holimo, fahleho tsa bona li apareloe ke lihlong, hlooho tsa bona li phumohe mafatla. 19Ba tla akhela silefera ea bona literateng, khauta ea bona ba e nyonye. Mohl'a tsatsi leo la khalefo ea Morena, silefera ea bona le khauta ea bona li ke ke tsa ba lopolla; meea ea bona e ke ke ea khotsofala, le mala a bona a ke ke a khōra letho, hobane tsena ke tsona tse ba lihetseng sebeng. 20Ba ne ba ikhantša ka mekhabiso ea bona e metle, eo ka eona ba ileng ba iketsetsa melingoana ea bona e nyonyehang. Ka baka lena, ke e fetotse litšila. 21Tsena tsohle ke tla neelana ka tsona matsohong a lira tsa bona e be lelobelo, le ho ba khopo ba lefatše lena e le khapo ea bona, 'me batho bana ba tla li silafatsa. 22Ke tla ba furalla, 'me ba tla silafatsa Tempele ea ka. Masholu a tla kena ka ho eona, a e silafatse.
23“Lokisang mahlaahlela, hobane naha eohle e tletse mali, har'a motse ke moferefere. 24Ke tla tlisa bahedene ba tala, 'me bona ba hape matlo a Baiseraele. Ke tla felisa boikhōhōmōso ba linatla tsa Baiseraele, libaka tsa bona tse halalelang li silafatsoe. 25Mahlomola aa tla. Ba tla batla khotso, empa ha e na ho ba teng. 26Koluoa li tla fihlellana, tsa bo-fuufu le tsona li fihlellane. Batho ba tla rata eka baporofeta ba ka ba bolella lipono, empa baprista ha ba sa tla ba ruta molao; le likeletso tse tsoang ho ba baholo li tla ba sieo. 27Khosi e tla lla, khosana e apareloe ke masoabi, matsoho a sechaba a tla thōthōmela. Ke tla ba ahlōla ho ea ka boitšoaro ba bona, ke ba ahlōle ho ea kamoo ba ileng ba ahlōla ba bang kateng. Joale ba tla tseba hore ke 'na Morena.”
