Melimo ea bohata e Jerusalema
1Ka letsatsi la bohlano la khoeli ea botšelela selemong sa botšelela, ha ke ntse ke lutse ka tlung ea ka, 'me baholo ba Juda ba lutse kapele ho 'na, matla a tsoang ho Morena Molimo a ntsukutla.
2Ha ke talima ka bona ntho e kang motho. Ho tloha thekeng ho ea tlase o ne a ka mollo. Ho tloha thekeng ho ea holimo o ne a khanya joaloka lethose le hlakolisitsoeng. 3A otlolla ntho e kang letsoho, a ntšoara ka moriri. Moea oa mphahamisetsa pakeng tsa leholimo le lefatše, 'me ka lipono tsa Molimo Moea oo oa mphihlisa Jerusalema, monyakong oa khoro e kahare, o talimileng lebōea. Teng ho ne ho e-na le setulo sa molingoana o bakang lefufa! 4Tlōtla ea Molimo oa Iseraele e ne e le hona moo, e tšoana le pono eo ke neng ke e bone phuleng.
5Morena a re ho 'na: “Uena ngoan'a motho, phahamisa mahlo a hao, u talime nq'a lebōea.” Eaba ke phahamisa mahlo a ka, ke talima nq'a lebōea, 'me monyakong o kenang ka khoro e ka lebōea ka bona molingoana ona o bakang lefufa o eme teng.
6Eaba Morena o re ho 'na: “Uena ngoan'a motho, na u bona seo ba se etsang? Na u bona manyala ao ba ntlo ea Iseraele ba a etsang moo, e le hore ke tle ke suthelle hōle le Sehalalelo sa ka? Empa ak'u hetle hape, 'me u tla bona manyala a mabe ho feta ana.”
7Eaba o ntlisa monyakong oa seotloana, 'me eare ha ke talima ka bona ho e-na le lesoba leboteng. 8A re ho 'na: “Uena ngoan'a motho, phunya leboteng mona.” Ka le phunya, 'me moo ka bona monyako.
9A re ho 'na: “Kena, u bone manyala a mabe ao ba a etsang mona.” 10Eaba kea kena, 'me hohle leboteng ka bona ho entsoe litšoantšo tsa mefuta eohle ea lihahabi, le tsa libatana tse nyonyehang, le tsa melingoana eohle ea ba ntlo ea Iseraele. 11Kapele ho tsona ho ne ho eme baholo ba ntlo ea Iseraele ba mashome a supileng, 'me Jaasaneea, mora oa Shafane, a eme har'a bona, e mong le e mong oa bona a tšoere pitsana ea mokubetso, ho fōqōha mosi oa mokubetso o entse leru.
12Morena a re ho 'na: “Uena ngoan'a motho, na u bone seo e mong le e mong oa baholo ba ntlo ea Iseraele a se etsang mafifing, ka kamoreng ea molingoana oa hae?
“Ba re: ‘Morena ha a re bone! Morena o furaletse lefatše!’ ”
13Morena a boela a re ho 'na: “Hetla hape, 'me u tla bona manyala a mabe ka ho fetisisa, ao ba a etsang.”
14Eaba Morena o ntlisa monyakong oa Tempele ea hae, o neng o talimile nq'a lebōea, 'me ka bona basali ba llelang molingoana Tamusi ba lutse hona teng.
15Morena a re ho 'na: “Uena ngoan'a motho, na see ua se bona? Hetla hape-hape, 'me u tla bona manyala a fetisisang ana ka bobe.”
16Eaba o nkenya ka lebaleng la Tempele ea Morena le kahare. Hona monyakong oo oa Tempele, pakeng tsa mathule a eona le aletare, ho ne ho e-na le banna ba ka bang mashome a mabeli a metso e mehlano. Likotlo tsa bona li ne li furaletse Tempele ea Morena, lifahleho tsa bona li talimile bochabela. Ba ne ba khumamela letsatsi le ka bochabela.
17Joale Morena a re ho 'na: “Uena ngoan'a motho, na seo ua se bona? Ebe ke ntho e se nang taba ha ba ntlo ea Juda ba etsa manyala aa, ao ba a etsang moo? Naha ena ba e tlatsitse meferefere, ba ba ba phephetsa hore ke be ke halefe, ba 'nyelisa ka liketso tsa bona. 18Ka baka lena, ke tla ba halefela haholo. Nke ke ka ba ka ba hauhela, kapa hona ho ba utloela bohlōkō. Leha ba ka hōoeletsa haholo ha ba ipiletsa ho 'na, nke ke ka ba mamela.”
