HOSEA 3

₁Morena a re ho 'na: “E-ea, u boelane le mosali oa hao, le hoja a se a ratana le monna e mong, e se e le sefèbè. U mo rate joalokaha Morena a rata bana ba Iseraele, le hoja ba sebeletsa melimo esele, 'me ba e nyehella ka liphaphatha tsa mangangajane a morara.”

₂Eaba kea mo lata, ke lefa silefera e boima ba likeramo tse ka bang lekholo le mashome a supileng, le likilokeramo tse lekholo le mashome a mahlano tsa harese. ₃Ka re ho eena: “U tla lula le 'na nako e telele, u sa iketse seotsoa kapa mosali oa monna e mong; kahoo le 'na ke tla ba oa hao.”

₄Bana ba Iseraele le bona ba tla qeta nako e telele ba se na khosi kapa khosana; ba se na sehlabelo kapa sefika seo ba se khumamelang, ba se na setipe kapa melingoana ea lelapa. ₅Kamora' moo bana ba Iseraele ba tla khutla, ba batle Morena Molimo oa bona, le Davida, khosi ea bona. Qetellong ba tla khutlela ho Morena ba ntse ba tlakasela, 'me ba amohele mahlohonolo a hae.