ESAEA 28

₁Ho malimabe

mofapahlooho oa botlotlehi,

oo matahoa a Efraime

a khabang ka oona!

Ho malimabe thunthung e ponang,

eo e leng tlōtla ea botle ba hae,

e metseng qetheng

ea khohlo e manoni,

eo matahoa a ikhantšang ka eona!

₂Bonang, Morena o na le ea matla,

ea sefutho,

ea kang fefo sa leholiotsoana

se senyang,

ea kang pula ea litloèbèlèlè

ea morallo:

Ke eena ea tla o akhela fatše

ka sefutho.

₃Mofapahlooho oa botlotlehi

oa matahoa a Efraime,

o tla hatakeloa ka maoto.

₄Thunthung e ponang,

e leng tlōtla ea botle ba hae,

e metseng qetheng

ea khohlo e manoni,

e tla ka feiee

e butsoang pele ho lehlabula,

e khōloang ke ea e bonang,

ebe oa e ja.

₅Ka tsatsi leo, Moren'a mabōtho

e tla ba mofapahlooho oa tlōtla,

e be moqhaka o khabane

ho masalla a chaba sa hae.

₆E tla ba moea oa toka

ho ba okametseng kahlōlo,

le oa bonatla

ho ba phumelang sera

khorong ea motse.

₇Batho bana le bona

ba thekeselisoa ke veine,

joala bo bohale

bo etsa hore ba khothometsehe;

baprista le baporofeta

ba thekeselisoa ke joala,

kelello li tšerehantsoe

ke ho itlōpa veine,

joala bo bohale

bo etsa hore ba khothometsehe;

ba bona lipono

ba ntse ba thekesela,

linyeoe ba li ahlōla

ba ntse ba ratseèla ke joala.

₈Tafole tsohle

li tletse mahlatsa le litšila,

ha ho na sebaka le se seng

se hloekileng.

₉“Ke bo-mang

bao moporofeta a tla ba ruta?

Molaetsa oa hae

o tla o hlalosetsa bo-mang?

O loketse masea a sa tsoa khoesoa,

bana ba sa tsoa tlosoa letsoeleng!

₁₀Thuto ea hae ke:

Molao holim'a molao,

molao holim'a molao,

taelo holim'a taelo,

taelo holim'a taelo;

hanyenyane mona,

hanyenyane mane.”

₁₁Kahoo Morena o tla bua

le chaba sa hae,

a bue le sona

ka malema a batho basele,

a bue le sona

ka maleme a balichaba.

₁₂O kile a bua le sona, a re:

“Ke tla le fa phomolo ea sebele,

ba khathetseng ba tl'o phomola;

ke tla fela ke le khatholle.”

Leha ho le joalo,

ha baa ka ba mamela.

₁₃Ka baka leo ntsoe la Morena

e tla ba lena ho bona:

Molao holim'a molao,

molao holim'a molao,

taelo holim'a taelo,

taelo holim'a taelo;

hanyenyane mona,

hanyenyane mane,

etlere ha ba tsamaea

ba oe ka sanketse,

ba robehe, ba tšoasoe,

ba thōpuoe.

₁₄Mamelang lōna basomi

ba busang chaba se Jerusalema,

lentsoe la Morena ke lena:

₁₅Lōna le itse:

“Re entse selekane le lefu,

ra etsa tumellano le Qalo ea Bafu.

Ha koluoa e tšabehang

e oela lefatše,

rōna e tla re feta mohoalotso,

hoba leshano ke tšabelo sa rōna,

bohata ke bona tšireletso ea rōna.”

₁₆Kahoo Morena o bua tjena:

“Ke bea lejoe la mothèo Sione,

lejoe le lekiloeng,

la bohlokoa, la mantlha;

ke lejoe la 'nete, la mothèo:

‘Ea lumelang hona

o tla ba le mamello.’

₁₇Toka e tla ba khoèlè e lekanyang,

ho loka e be khoèlè e otlollang;

sefako se tla hōhōla

tšabelo sa mashano,

metsi a koahele

baka tsa ho ipata.”

₁₈Selekane sa lōna le lefu

se tla felisoa,

tumellano ea lōna le Qalo ea Bafu

e felisoe.

Mohla koluoa e tšabehang

e oelang lefatše,

e tla le oela holimo,

e le hatakele.

₁₉Kamehla ha e feta

e tla le hōhōla,

e le hōhōle hoseng,

motšeare le bosiu;

ha le utloisisa molaetsa

ebe lea tšoha.

₂₀Moalo o mokhutšoanyane

hoo u ke keng ua nama,

kobo e nyenyane

hoo u ke keng ua ikatela.

₂₁Morena o tla hlaha

sa mohla thabeng ea Perasime,

khalefo ea hae e tlōkōme,

sa mohla Khohlong ea Gibeone,

a phethe mosebetsi oa hae

o hlollang haholo,

a phethe ketso tsa hae

tse tsotehang haholo.

₂₂Ka baka leo,

se iketseng basomi,

esere mahlaahlela

a imela matsoho a lōna,

hobane ke utloile

ha ho phatlalatsoa timetso,

e phatlalatsoa ke Morena,

Molimo oa mabōtho,

a re lefatše lohle le tla timetsoa.

₂₃Thèang tsebe

le utloe lentsoe la ka,

mamelang le utloe polelo tsa ka.

₂₄Na ea lemelang ho jala

a ka lema mocha-o-chele?

A lulela ho lema

le ho phōphōtha makoete?

₂₅Ha a thuile makoete

o jala kolojannere le sepaile,

ebe koro eona o e jala ka mela,

harese le mabele

a li jale temeng ea tsona.

₂₆Tsena o li rutiloe

ke Molimo oa hae,

a mo koetlisetsa tsona hantle.

₂₇Ha ho pōloa kolojannere

ha ho sebelisoe selei,

mabili a kariki ha a pōle sepaile;

molamu o sebelisoa

ha ho pōloa kolojannere,

sepaile sona se pōloe ka lere.

₂₈Na koro e hailoa hore e thumisehe?

Che, ha e ke e hailoa kamehla;

leha e hatisoa ka mabili a kariki,

lipere ha li ke be li e thumise.

₂₉Tsena tsohle

li tsoa ho Morena oa mabōtho,

keletso tsa hae ke tse makatsang,

bohlale ba hae ke bo tebileng.