LUKA 15

₁Joale balekhetho le baetsalibe kaofela ba atamela ho mamela Jesu. ₂Bafarisi le Litsebi tsa Molao ba korotla, ba re: “Monna enoa o amohela baetsalibe, 'me o ja le bona!”

₃Eaba o ba bolella setšoantšo, o re: ₄“Ke ofe har'a lōna ea nang le linku tse lekholo, eo ekareng ha a lahlehetsoe ke e 'ngoe ea tsona, a ke keng a siea tse mashome a robong a metso e robong naheng, a e'o batla e lahlehileng, ho fihlela a e fumana? ₅Ha a e fumane, a e jare a thabile, ₆'me ha a fihla hae a bitse metsoalle ea hae le ba ahisaneng le eena, a re ho bona: ‘Thabang le 'na, hobane ke fumane nku ea ka e neng e lahlehile!’ ₇Kea le bolella hore ka baka la moetsalibe a le mong ea bakang, thabo e joalo e tla ba teng leholimong, e fetang e bang teng ka baka la ba lokileng ba mashome a robong a metso e robong ba sa hlokeng pako.”

₈“Kapa ke ofe mosali ea nang le lidrakema tse leshome, eo ekareng ha a ka lahleheloa ke drakema e le 'ngoe, a ke keng a hotetsa lebone, a fiela ntlo, a batla ka tlhokomelo, ho fihlela a e fumana? ₉Ha a e fumane, a bitse metsoalle ea hae le ba ahisaneng le eena, a re: ‘Thabang le 'na, hobane ke fumane drakema e neng e ntahlehetse!’ ₁₀Kea le bolella hore, ka baka la moetsalibe a le mong ea bakang, thabo e joalo e teng har'a mangeloi a Molimo.”

₁₁Jesu a re: “Monna e mong o ne a e-na le bara ba babeli. ₁₂E monyenyane a re ho ntat'ae: ‘Ntate, mphe karolo ea leruo eo e leng ea ka.’ A ba arolela leruo la hae.

₁₃“Kamora' matsatsi a se makae, mora e monyenyane a bōkella tsohle, a fallela lefatšeng le hōle, 'me teng a hafa leruo la hae ka ho phela habohlasoa. ₁₄Eare hoba a hafe tsohle, ha oa tlala e kholo lefatšeng leo, 'me a qala ho hloka. ₁₅A tholoa ke e mong oa baahi ba lefatše leo, 'me eo a mo rōmela naheng ho ea alosa likolobe. ₁₆O ne a bile a lakatsa ho ja litholoana tsa lifate tse jeoang ke likolobe, empa ho se ea mo fang.

₁₇“Eitse hoba a ikelelloe, a re: ‘Bahiruoa ba bangata hakaakang ba ntate ba jang ba be ba li shebe feela, empa 'na mona ke bolaoa ke tlala. ₁₈Ke tla tsamaea, ke ee ho ntate, ke re ho eena: Ntate, ke sitetsoe leholimo le uena: ₁₉Ha ke sa lokela ho bitsoa mora oa hao; ak'u nketse e mong oa bahiruoa ba hao.’ ₂₀A tsamaea, a ea ho ntat'ae.

“Eare a sa le hōle ntat'ae a 'mona, a mo utloela bohlōkō, a matha, a mo kopa ka molala, a mo aka.

₂₁“Mora a re ho eena: ‘Ntate, ke sitetsoe leholimo le uena: Ha ke sa lokela ho bitsoa mora oa hao.’

₂₂“Empa ntat'ae a re ho bahlanka ba hae: ‘Phakisang le tlise seaparo se setle-setle, le mo apese sona, le mo roese lesale monoaneng, le meqathatso maotong. ₂₃Hape le tlise namane e nontšitsoeng, le e hlabe, re je, 'me re keteke, ₂₄kahobane mora enoa oa ka o ne a shoele, empa o boetse oa phela; o ne a lahlehile, joale o fumanoe.’ Eaba ba qala ho keteka.

₂₅“Mora oa hae e moholo o ne a le naheng. Ha a khutla, 'me a se a atametse ntlo, a utloa liletsa le motjeko. ₂₆A bitsa e mong oa bahlanka, a 'motsa, a re: ‘Ho etsoa'ng moo?’

₂₇“Eo a re ho eena: ‘Moen'a hao o fihlile, 'me ntat'ao o mo hlabetse namane e nontšitsoeng, kahobane a boetse a mo fumane a sa phela hantle.’

₂₈“A halefa, a hana ho kena. Ntat'ae a tsoa, a mo rapela. ₂₉Empa a araba, a re ho ntat'ae: ‘Bona, ke u sebelelitse lilemo tse kana-kana, ke bile ke e-s'o ka ke tlōla le taelo ea hao, feela ha u e-s'o 'nee le potsanyane, hore nke ke keteke le metsoalle ea ka, ₃₀empa ere ha ho fihla enoa mora oa hao, ea jeleng leruo la hao le liotsoa, u mo hlabela namane e nontšitsoeng!’

₃₁“Ntat'ae a re ho eena: ‘Ngoan'a ka, uena u na le 'na kamehla, 'me tsohle tsa ka ke tsa hao. ₃₂Hoa lokela hore re keteke, re thabe, kahobane ngoana enoa oeno o ne a shoele, empa o boetse oa phela; o ne a lahlehile, joale o fumanoe.’ ”