Na Molimo o re lahlile?
1Pesalema ea Asafo, e qapetsoeng motsamaisi oa libini; ea Jedutune.
2Sello sa ka se nyolohela ho Molimo,
ke llela ho eena;
sello sa ka se nyolohela ho Molimo,
o tla ntšekehela tsebe.
3Mohla ke neng ke le matšoenyehong
ka batla Morena,
ka lula ke phahamisitse matsoho,
ke a phahamisitse har'a bosiu,
moea oa ka oa hana ho tšeliseha.
4Ka hopola Molimo, ka feheloa,
ka nahana, moea oa ka oa sareloa.
5U entse hore ke se ke ka bo hlōtha,
ke tšoenyehile, ke sitoa le ho bua.
6Ke hopola litšiu tsa khale,
le lilemo tse ileng kea li hopola.
7Bosiu ke fihleloa ke pina pelong,
kea nahana,
moea oa ka oa bala-bala:
8“Na Morena o ntahletse ruri,
ha a sa tla hlola a khahloa ke 'na?
9Na mohau oa hae o feletse ruri,
litšepiso tsa hae
ha li sa tla phethoa,
li phetheloa melōko eohle?
10Na Molimo o lebetse
ho utloela bohlōkō?
Na khalefo ea hae
e thibetse rato la hae?”
11Joale ke re:
“Se ntlhabileng ke sena:
Letsoho la Ea Holimo-limo
le fetohile.”
12Ke hopola mesebetsi ea Morena,
e, ke hopola limakatso tsa hae,
limakatso tsa boholo-holo.
13Ke nahana
mesebetsi eohle ea hae,
ke imamella
liketso tsa hae tse kholo.
14Molimo, litsela tsa hao
lia halalela;
na molimo o teng o moholo,
o moholo joaloka uena Molimo?
15Uena u Molimo
ea etsang limakatso,
u bonahalitse matla a hao
har'a lichaba.
16Ka tsoho la hao
u lopolotse chaba sa hao,
bana ba Jakobo le ba Josefa.
17Metsi a na a u bona, Molimo,
metsi a u bona, a tuluana,
maliba a tsukutleha.
18Maru a nesa pula,
maholimo a thoathoaretsa,
mahalima a hao a tsekema kahohle.
19Letōlō la hao la thoathoaretsa,
la thoathoaretsa har'a setsokotsane,
mahalima a hao a bonesa lefatše,
lefatše la reketla, la sisinyeha.
20Tsela ea hao ea tsamaea leoatleng,
le tselana tsa hao har'a boliba;
empa ha ho ea boneng
mohlala oa hao.
21U tsamaisitse sechaba sa hao,
ua se tsamaisa joaloka mohlape,
ua se tsamaisa
ka letsoho la Moshe
le ka letsoho la Arone.
