LIPESALEMA 78

Lōna chaba sa ka,

mamelang thuto ea ka,

sekehelang lipolelo tsa ka tsebe.

₂Molomong oa ka ho tla tsoa maele,

ke bolele lilōtho tsa boholo-holo.

₃Tseo re li utloileng, ra li tseba,

e leng tseo re li phetetsoeng,

ra li pheteloa ke bo-ntat'a rōna.

₄Ha re na ho li patela bana ba bona,

empa re tla phetela molōko o tlang

lithoko tsa Morena, le matla a hae,

le limakatso tseo a li entseng.

₅O ile a fa lelōko la Jakobo litemoso,

a beela Iseraele Molao;

a laela bo-ntat'a rōna

ho o tsebisa bana ba bona,

₆hore o tle o tsejoe

ke melōko e tlang,

le ke ba tlang ho tsoaloa,

bona ba tle ba o phete,

ba o phetele bana ba bona,

₇e le hore le bao

ba tle ba tšepe Molimo,

ba se ke ba lebala

mesebetsi ea Molimo,

ba mpe ba bōlōke melao ea hae.

₈Ba se ke ba tšoana le bo-ntat'a bona,

bao e bileng molōko o manganga,

molōko oa bafetoheli;

molōko oo maikutlo a oona

a neng a sa tsepama,

molōko oo moea oa oona

o sa tšepahaleng ho Molimo.

₉Bana ba Efraime,

leha e ne e le litsebi

tsa ho fula ka liqha,

ba na ba baleha

mohl'a letsatsi la ntoa.

₁₀Ha baa ka ba bōlōka selekane,

selekane sa Molimo,

ba hana ho tsamaea

ka Molao oa hae.

₁₁Ba lebala liketso tsa hae,

ba lebala le limakatso tsa hae,

tseo a ba bontšitseng tsona.

₁₂Naheng ea Egepeta,

thōteng tsa Sōoane,

a etsa limakatso pontšeng,

pontšeng ea bo-ntat'a bona.

₁₃A phatlola leoatle ka lehare,

a ba tšelisa,

a emisa metsi joaloka qubu.

₁₄Motšeare a ba etella pele ka leru,

bosiu bohle ka khanya ea mollo.

₁₅A petsola mafika lehoatateng,

a ba fa metsi a mangata,

metsi a kang a boliba;

₁₆a kollisa melatsoana lefikeng,

a phallisa metsi

joaloka hoja ke a nōka.

₁₇Empa ba 'na ba eketsa

ho mo siteloa,

ba fetohela Ea Holimo-limo,

ba mo fetohela

ba le naheng e tšehla.

₁₈Pelong tsa bona ba leka Molimo,

ba batla lijo tseo ba li lakatsang.

₁₉Ba hanyetsa Molimo, ba re:

“Ebe Molimo a ka hla a tseba

ho re lokisetsa lijo

lehoatateng moo?

₂₀Ke 'nete, o ile a otla lefika,

metsi a phutsalla,

le linōkana tsa phorosela;

ebe a ka tseba ho re fa bohobe,

le ho fepa chaba sa hae nama?”

₂₁Eare Morena ha a utloa a halefa,

malakabe a mollo a laima,

a laimela ba lelōko la Jakobo,

khalefo ea hae ea tlōkela Iseraele;

₂₂hobane ba ne ba sa lumele,

ba sa lumele ho Molimo,

ba sa tšepe ho pholosoa ke eena.

₂₃Eaba o laela maru a maholimo,

o bula menyako ea maholimo;

₂₄a ba nesetsa manna

e be lijo tsa bona,

a ba nea koro ea leholimo.

₂₅Motho a ja bohobe ba mangeloi,

a ba fa khōra ea lijo.

₂₆Holimo sebakeng a fokisa moea,

a fokisa moea oa bochabela,

ka matla a hae

a tlisa moea oa boroa;

₂₇a ba nesetsa nama

joalokaha eka ke lerōle,

le nonyana tse fofang,

joalokaha eka ke hlabathe la leoatle,

₂₈a li theolela kahar'a liahelo tsa bona,

ho pota-pota litente tsa bona.

₂₉Ba e-ja, ba khōra haholo;

a ba fa seo ba neng ba se lakatsa.

₃₀Eare ba e-s'o khotsofatse

takatso ea bona,

ba sa ntse ba entse methamo,

₃₁khalefo ea Molimo

ea ba oela holimo,

a bolaea likoankoetla tsa bona,

bahlankana ba Iseraele

a ba rapalatsa,

a ba rapalatsa fatše.

₃₂Leha ho le joalo,

ba 'nile ba mo siteloa,

ba se ke ba lumela

limakatso tsa hae.

₃₃Eaba o felisa matsatsi a bona

o a fetola lefeela,

lemo tsa bona

ea e-ba tsa matšabeho.

₃₄Eitse ha Molimo a ba bolaea,

ba qala ho 'matla,

ba khutlela ho eena,

ba 'matla hape;

₃₅ba boela ba hopola

hore Molimo ke lefika la bona,

Molimo Ea Holimo-limo

ke molopolli oa bona.

₃₆Ba ne ba ee ba mo qekise

ka melomo ea bona,

ba mo thetse ka maleme a bona;

₃₇athe ba ne ba sa tšepahale,

ba sa tšepahale ho eena,

ba sa tšepahale selekaneng sa hae.

₃₈Empa eena,

ka ho ba utloela bohlōkō,

a ba tšoarela molato oa bona,

a se ke a ba timetsa;

ka makhetlo

a kokobetsa khalefo ea hae,

bohale ba hae ba se ke ba tlōkōma.

₃₉A hopola hore ke ba nama le mali,

ke moea o ikelang,

moea o ke keng oa hlola o khutla.

₄₀Ke hakae ba ileng ba mo fetohela,

ba mo fetohela feelleng,

ba mo khōpisa lehoatateng!

₄₁Ba 'na ba leka Molimo khafetsa,

ba utloisa Ea Halalelang bohloko,

Ea Halalelang oa Iseraele!

₄₂Ba lebala matla a letsoho la hae,

le letsatsi leo ka lona

a neng a ba lopolle

lireng tsa bona,

₄₃ha a ne a etsa

lipontšo tsa hae Egepeta,

le limakatso tsa hae

naheng ea Sōoane.

₄₄A fetola metsi a linōka tsa bona,

a a fetola mali,

le a melatsoana ea bona,

hore ba sitoe ho noa.

₄₅A ba rōmela libōba tsa ba lōma,

le lihohoana tsa ba senyetsa.

₄₆Masimo a bona a a neella sebōkō,

tholoana tsa mosebetsi oa bona

tsa jeoa ke litsie.

₄₇Morara oa bona a o senya ka sefako,

le fate tsa bona tsa feiee ka lebabo.

₄₈Likhomo tsa bona

a li bolaea ka sefako,

le mehlape ea bona ka letōlō.

₄₉A ba futuhela ka khalefo e tukang,

ka bohale, le makoebeta,

le ka matšoenyeho;

a ba rōmela mangeloi a timetsang.

₅₀A se ke a kokobetsa khalefo ea hae,

leha e le ho ba phemisa lefu;

a ba bolaea ka lefu la seoa.

₅₁A bolaea matsibolo 'ohle a Egepeta,

bana ba matsoathaka,

ba metlotloane ea Kama.

₅₂Joale a khanna chaba sa hae,

a se khanna joaloka linku,

a se tsamaisa lehoatateng.

a se tsamaisa joaloka mohlape.

₅₃A ba etella pele ba sireletsehile,

tšabo ba se na eona,

lira tsa bona

tsa koaheloa ke leoatle.

₅₄A ba fihlisa naheng ea hae'

naheng e halalelang,

le thabeng eo a ikhapetseng eona,

a e hapa ka tsoho la hae le letona.

₅₅A leleka lichaba pel'a bona,

a ba sehela

moo e tla ba lefa la bona,

a ahisa melōko ea Iseraele,

a e ahisa metlotloaneng ea tsona.

₅₆Empa ba leka Molimo

Ea Holimo-limo,

ba mo leka ka ho mo fetohela,

ba se ke ba mamela

litemoso tsa hae;

₅₇ba koeneha, ba hloka botšepehi,

ba bo hloka joaloka bo-ntat'a bona,

ba khutlalla

joaloka seqha se sa tieang.

₅₈Ba mo phephetsa

ka ho ikahela libaka tsa borapeli,

ba 'makela lefufa

ka melimo ea bona,

melimo ea bona ea bohata.

₅₉Ha Molimo a bona hoo, a halefa;

a lahla Iseraele ho hang.

₆₀Eaba o furalla Leaho la hae la Shilo,

e leng tente eo a neng a e hlomile,

a e hlomile har'a batho.

₆₁Areka ea selekane sa hae a e tlohela,

a e tlohella ho haptjoa,

areka e bonahatsang tlōtla ea hae

ea oela matsohong a sera.

₆₂A tlohella chaba sa hae,

a se tlohella ho bolaoa ka sabole,

a halefela bao e leng lefa la hae.

₆₃Mollo oa timetsa

bahlankana ba bona,

baroetsana ba se ke ba bineloa,

ba bineloa pina tsa lenyalo.

₆₄Baprista ba bona

ba bolaoa ka sabole,

bahlolohali ba se ke ba bina,

ba bina koli-ea-malla.

₆₅Joale Morena a phaphama

joalokaha eka o n'a khalehile,

joaloka mohale ea neng a tahiloe.

₆₆A otla lira tsa hae libōnōng,

tsa hlajoa ke lihlong

ka ho sa feleng.

₆₇Eaba o lahla motlotloane oa Josefa,

lelōko la Efraime

a se ke a le khetha;

₆₈empa a khetha lelōko la Juda,

thaba ea Sione eo a e ratang.

₆₉A haha Sehalalelo sa hae,

a se haha joaloka leaho la leholimo,

joaloka lefatše leo a le theileng,

a le theetseng mehla eohle.

₇₀A khetha Davida, mohlanka oa hae,

a mo tlosa masakeng a linku,

₇₁a mo tlohelisa nku tsa litsoetse,

a mo lisisa lelōko la Jakobo,

chaba sa hae,

Iseraele eo e leng lefa la hae.

₇₂Davida a ba lisa ka pelo

e se nang koli,

a ba tsamaisa ka letsoho le bohlale.