1Leha nka bua lipuo tsa batho le tsa mangeloi, empa ke se na lerato, ke itšoanela feela le tšepe e llang kapa lekapa le etsang mangenengene. 2Leha nka ba le nèo ea boporofeta, 'me ka tseba liphiri tsohle tsa Molimo, ka ba ka li utloisisa, esita leha nka ba le tumelo eohle e hlokahalang ho suthisa lithaba, empa ke se na lerato, ha ke letho. 3Leha nka fana ka tsohle tseo ke nang le tsona, esita leha nka neelana ka 'mele oa ka hore o chesoe, empa ke se na lerato, ha ho nthuse letho.
4Lerato le na le mamello, lerato le mosa; ha le na mohōnō, ha le na boikakaso, ha le na boikhōhōmōso, 5ha le na mekhoa e mebe, ha le ikhopolele, ha le halefe, ha le na lisuoa, 6ha le thabele bokhopo, empa le thabela 'nete. 7Le iphapanyetsa tsohle, le lumela tsohle, le tšepa tsohle, le mamella tsohle.
8Lerato ha le ka ke la fela le ka mohla, empa lipolelo tsa boporofeta li tla fela, le nèo ea maleme asele e tla khaotsa, le tsebo e tla fela. 9Re tseba ka mokhoa o sa phethahalang, 'me re porofeta ka mokhoa o sa phethahalang, 10empa mohla ho hlahang ho phethehileng, ho sa phethahalang ho tla fela. 11Ha ke ne ke sa le ngoana, ke ne ke bua joaloka ngoana, ke hopola joaloka ngoana, ke nahana joaloka ngoana, empa ha ke se ke le monna, ke tlohetse tsa bongoana. 12Hajoale re bona ka seipone, ka lerōōthō, empa mohlang oo re tla bona joalokaha lifahleho li talimane. Hajoale ke tseba ka mokhoa o sa phethahalang, empa mohlang oo ke tla tseba joalokaha Molimo a ntseba.
13Joale tsena tse tharo, e leng tumelo, le tšepo, le lerato, li tla 'ne li be teng, empa e kholo ho tsona ke lerato.
