Likotlo tsa ho rapela melimo ea bohata
1“Haeba moporofeta kapa molori oa litoro a ka ba teng har'a lōna, 'me a le etsetsa pontšo kapa mohlolo; 2eba pontšo eo, kapa mohlolo oo, oa phethahala, 'me a re ho lōna: ‘A re lateleng melimo e meng, eo le sa kang le e tseba, re e sebeletse;’ 3lōna le se ke la mamela polelo ea moporofeta eo, kapa ea molori eo, hobane Morena Molimo oa lōna oa le leka, ho bona hore na le rata Morena Molimo oa lōna ka lipelo tsa lōna tsohle, le ka moea oa lōna oohle. 4Le latele Morena Molimo oa lōna, le mo tšabe, le bōlōke melao ea hae, le mamele lentsoe la hae, le mo sebeletse, le mo khomarele. 5Ha e le moporofeta eo, kapa molori eo, a bolaoe, hobane o rutile sechaba ho fetohela Morena Molimo oa lōna, ea le ntšitseng naheng ea Egepeta, ea le lopolotseng moo le neng le le makhoba teng. O le khelosa tsela eo Morena Molimo oa lōna, a laetseng hore le tsamaee ke eona. Tlosang ke hona bokhopo bo har'a lōna.
6“Haeba ngoan'eno oa letsoele, kapa mora oa hao, kapa morali oa hao, kapa mosali oa hao o sethiba-mathe, kapa motsoalle oa hao oa hlooho ea khomo, a ka u hohela ka lekunutu, a re: ‘A re ee, re e'o sebeletsa melimo e meng,’ eo uena, le bo-ntat'a lōna, le sa kang la e tseba; 7e leng melimo ea lichaba tse le pota-potileng, tse haufi le lōna, kapa tse hōle le lōna, ho tloha pheletsong e 'ngoe ea lefatše ho isa pheletsong e 'ngoe; 8le se ke la lumela tsa hae, kapa la li mamela, kapa la mo hauhela, kapa la mo qenehela, kapa la mo pata. 9Ruri le fele le 'molaee, e be uena ea mo otlang pele, e nt'o ba sechaba sohle. 10Le mo tlepetse ka majoe, a shoe, hobane o ne a batla ho u khelosa ho Morena Molimo oa hao, ea u ntšitseng naheng ea Egepeta, moo u neng u le lekhoba teng. 11Sechaba sohle sa Iseraele se tla utloa hona, se tšabe, 'me se se ke sa hlola se etsa bokhopo bo tšoanang le bona har'a lōna.
12“Haeba motseng o mong oa metse ea heno, oo Morena Molimo oa hao, a u neileng oona hore u ahe ho oona, u ka utloa monyenyetsi o reng: 13‘Litlōkōtsebe tse ling li tsoile har'a lōna, li khelositse baahi ba motse oa habo tsona, li re: A re eeng, re e'o sebeletsa melimo e meng, eo le sa kang la e tseba,’ 14uena u batlisise taba ena ka hloko. Haeba e le 'nete, 'me taba eo e tiile ea hore manyala a joalo a entsoe har'a lōna, 15ruri u bolaee baahi ba motse oo ka sabole, u o timetse ho hang. Tsohle tse ka ho oona, le liphoofolo tsa oona, le tsona kaofela li bolaoe ka sabole. 16Khapo eohle ea oona le e bōkelle lebaleng la motse. Motse oo, le khapo eohle ea oona, le li chese ka mollo, e be nyehelo ea secheso e etsetsoang Morena Molimo oa lōna. Motse oo o tla fetoha lesupi la mehla eohle, 'me o ke ke oa hlola o tsosoa. 17Ho se be letho la lintho tse halalelang tseo le ka li nkang, e le hore bohale bo tšabehang ba Morena bo tle bo kokobele, a le hauhele, a le ngatafatse joalokaha a hlapanyelitse bo-ntat'a lōna. 18Feela le mamele lentsoe la Morena Molimo oa lōna, le bōlōke melao ea hae eohle eo ke le laetseng eona kajeno, le etse ho lokileng mahlong a Morena Molimo oa lōna.”
