TŠIMOLOHO 7

₁Morena a re ho Nōoe: “Uena, le ba ntlo ea hao, kena ka arekeng, hobane ke bone hore molōkong ona ke uena feela ea lokileng mahlong a ka. ₂Liphoofolong tsohle tse sa ileheng, u nke tse supileng tse tona, le tse supileng tse tšehali; ho tsohle tse ilehang u nke tse peli, e be e tona le e tšehali. ₃Linonyaneng tsohle tse fofang u nke tse supileng ka bobeli, e be e tona le e tšehali, hore mofuta oa tsona o tle o bōlōkehe lefatšeng. ₄Kamora' matsatsi a supileng, ho tloha joale, ke tla nesetsa lefatše pula ka matsatsi a mashome a mane, le masiu a mashome a mane, 'me ke tla felisa tsohle tse phelang lefatšeng, tseo ke li entseng.”

₅Nōoe a etsa joalokaha Morena a ne a mo laetse.

₆Nōoe o ne a e-na le lilemo tse makholo a tšeletseng ha morallo oa metsi o e-ba teng lefatšeng. ₇Eare metsi a morallo a e-s'o fihle, Nōoe a kena ka arekeng a e-na le bara ba hae, le mosali oa hae, le lingoetsi tsa hae. ₈Liphoofolo tse sa ileheng le tse ilehang, le linonyana, le lihahabi tsohle, ₉tsa tla ka bobeli, e le e tona le e tšehali, tsa kena ka arekeng le Nōoe, joalokaha Morena a ne a mo laetse. ₁₀Eare hoba matsatsi a supileng a fete, morallo oa metsi oa e-ba teng lefatšeng.

₁₁Ka selemo sa makholo a tšeletseng sa ho phela ha Nōoe, ka khoeli ea bobeli, ka letsatsi la leshome le metso e supileng la khoeli, ka lona letsatsi leo mehloli eohle ea boliba bo boholo ea phunyeha, le maru a tšolella metsi lefatšeng. ₁₂Ka matsatsi a mashome a mane, le masiu a mashome a mane, lefatše la neloa ke pula ea litloèbèlèlè.

₁₃Ka lona letsatsi leo Nōoe le bara ba hae, Sema le Kama le Jafeta, le mosali oa Nōoe, le lingoetsi tse tharo tsa Nōoe, ba kena ka arekeng, ₁₄'moho le mefuta eohle ea liphoofolo, le mefuta eohle ea lihahabi, le mefuta eohle ea linonyana. ₁₅Libōpuoa tse phelang tsa kena ka bobeli ka arekeng ho Nōoe. ₁₆Tse ileng tsa kena e ne e le e tona, le e tšehali, joalokaha Molimo a ne a mo laetse. Joale Morena a mo koalla kahare.

₁₇Morallo oa 'na oa tsoela pele lefatšeng ka matsatsi a mashome a mane. Ha metsi a ntse a eketseha a phaphamatsa areka, ea phahamela lefatše. ₁₈Metsi a 'na a kokomoha, a eketseha haholo, 'me areka ea 'na ea loeba holim'a metsi. ₁₉Metsi a kokomoha hahola lefatšeng, a koahela lithaba tsohle tse telele, tse tlas'a leholimo. ₂₀Metsi a 'na a kokomoha ho fihlela a etsa limethara tse supileng kaholimo ho lithaba. ₂₁Libōpuoa tsohle tse phelang lefatšeng tsa shoa: linonyana, makhomo, liphoofolo tse hlaha, le tsohle tse tsamaeang ka likhakhatha lefatšeng, le batho bohle. ₂₂Tsohle tse neng li phela lefatšeng moo ho ommeng, tsa shoa. ₂₃Morena a timetsa tsohle tse phelang lefatšeng: batho le makhomo, lihahabi le linonyana tse fofang; tsohle tsa timetsoa lefatšeng. Ha sala Nōoe feela le bao a neng a e-na le bona ka arekeng.

₂₄Metsi a qeta matsatsi a lekholo le mashome a mahlano a ntse a koahetse lefatše.