Lentsoe la Molimo le tla ka Mora oa hae
1Mehleng ea khale Molimo o ile a bua le bo-ntat'a rōna ka baporofeta, ka makhetlo-khetlo, ka mekhoa e mengata, 2empa joale matsatsing ana a qetello o buile le rōna ka Mora oa hae, eo a entseng tsohle ka eena, 'me a mo etsa mojalefa oa tsona. 3Mora o khanya ka tlōtla ea Molimo, ke setšoantšo sa boleng ba Molimo, 'me tsohle o li bōlōka ka lentsoe la hae le matla. Hoba a re hloekise libe, a ea lula ka letsohong le letona la Ea Holimo-limo, maholimong. 4O entsoe e moholo ho feta mangeloi, joalokaha lebitso leo Molimo a mo neileng lona le feta a mangeloi.
Mora o moholo ho feta mangeloi
5Ke lefe la mangeloi leo Molimo a kileng a re ho lona:
“U Mora oa ka,
kajeno ke u tsoetse?”
Kapa a re:
“Ke tla ba Ntat'ae,
le eena e be Mora oa ka?”
6Hape mohla a rōmelang Mora oa hae oa letsibolo lefatšeng, a na a re:
“Mangeloi 'ohle a Molimo
a mo khumamele.”
7Ha e le ka mangeloi ho itsoe:
“O etsa mangeloi a hae meea,
le basebeletsi ba hae
malakabe a mollo.”
8Empa ka Mora ho itsoe:
“Terone ea hao Molimo,
ke ea kamehla le mehla,
lere la hao la puso,
ke lere la toka.
9U rata ho loka,
u hloile bokhopo;
kahoo Molimo,
Molimo oa hao
o u tlotsitse ka ole ea thabo,
ho e-na le balekane bohle ba hao.”
10Hape ho itsoe:
“Uena Morena,
tšimolohong u ne u hlole lefatše,
maholimo ke mosebetsi
oa liatla tsa hao.
11Tsohle li tla timela,
empa uena u tla sala;
tsohle li tla tsofala joaloka seaparo.
12U tla li phutha-phutha
joaloka kobo,
'me li tla fetoha
joaloka seaparo.
Empa uena haesale e le uena,
lilemo tsa hao
li ke ke tsa fela.”
13Ke lefe la mangeloi leo Molimo a kileng a re ho lona:
“Lula ka letsohong la ka le letona,
ho fihlela ke bea lira tsa hao
katlas'a maoto a hao?”
14Kahoo mangeloi ke eng, haese meea e sebeletsang, le bahlanka ba rōngoang ke Molimo ho thusa ba tla ja lefa la pholoho?
