Ketso e kholo ea ho pholosoa
1Kahoo re tlamehile ho hlokomelisisa tseo re li rutiloeng, esere ra kheloha. 2Lentsoe le boletsoeng ke mangeloi le tiile, 'me ho le tlōla le ho se le mamele ho 'nile ha fumana moputso o lokelang. 3Joale rōna re tla phonyoha joang, ha re eisa ho pholosoa ho hoholo hakaalo, hoo Morena e bileng oa pele ho ho bolela, 'me ra ho pakeloa ka ho tiea ke ba ho utloileng? 4Molimo le eena o ho pakile ka mehlolo, le limakatso, le liketso tse matla tsa mefuta-futa, le ka lineo tsa Moea o Halalelang, tseo a li abang ka ho ea ka thato ea hae.
Pulamaliboho e pholosang
5Molimo ha aa bea lefatše le tlang, leo re buang ka lona, taolong ea mangeloi. 6Etsoe sebakeng se seng ho boletsoe hantle, ha thoe:
“Motho e ne e le eng,
hoo u ka mo hopolang,
le ngoan'a motho e ne e le eng,
hoo u ka mo hlokomelang?
7U mo entse ea katlasana ho mangeloi
ka nakoana,
u mo roesitse mofapahlooho
oa tlōtla le hlompho,
8u beile tsohle
katlas'a maoto a hae.”
Ka ho bea tsohle tlas'a motho, ha aa ka a siea letho leo a sa le beang tlas'a hae. Hajoale ha re e-s'o bone hore tsohle li beiloe katlas'a hae. 9Empa seo re se bonang ke Jesu ea beiloeng katlasana ho mangeloi ka nakoana, a roesoa mofapahlooho oa tlōtla le hlompho ka baka la mahlōkō a lefu la hae, e le hore ka mohau oa Molimo a tle a shoele bohle.
10Ho ne ho tšoanela hore Molimo, eena eo lintho tsohle li tsoang ho eena, 'me li leng teng ka eena, ea neng a tla isa bana ba hae ba bangata tlōtleng, a etse hore pulamaliboho e ba pholosang, e phethehe ka ho hlōkōfatsoa. 11Mohalaletsi le ba halaletsoang ke bana ba motho. Ka baka leo, Jesu ha a lihlong ho ba bitsa bana babo, 12ha a re:
“Ke tla tumisa lebitso la hao
har'a bana beso,
ke u rorise har'a phutheho.”
13Hape a re:
“Ke tla bea tšepo ea ka
ho Morena.”
A boela a re:
“Ke 'na enoa le bana
bao Molimo a mphileng bona.”
14Erekaha bana bao e le batho ba nama le mali ka ho tšoana le eena, o tšoana le bona ka nama le mali, e le hore ka lefu la hae a tle a ripitle ea nang le matla holim'a lefu, e leng Diabolosi. 15Ka ho etsa joalo o lokolotse batho ba neng ba le bokhobeng ba ho tšaba lefu bophelong bohle ba bona. 16Ruri ha aa tlela mangeloi, empa o tletse ba lelōko la Aborahama. 17Kahoo o ne a tšoanetse ho etsoa ea tšoanang le bana babo kahohle, hore e be Moprista e Moholo, ea lereko, ea tšepahalang ho Molimo linthong tsohle, e le hore a lefelle libe tsa sechaba. 18Kaha le eena a lekiloe ka ho hlōkōfatsoa, o tseba ho thusa ba lekoang.
