Juditha o ea liahelong tsa Holofernese
1Eitse ha Juditha a qeta ho hoelehetsa ho Molimo oa Iseraele ka thapelo eo, 2a phahama moo a neng a paqame teng, a bitsa lekhabunyane la hae, 'me a theohela ka tlung eo a neng a ee a hlole matsatsi a sabatha le a mekete ka ho eona. 3A hlobola lesela le mahoashe leo a neng a le apere, a tsola liaparo tsa hae tsa bohlolohali; a tola, a itlotsa ka linoko tsa bohlokoa, a ikama, a roala moqhaka, 'me a itereka ka liaparo tsa mokete, tseo a neng a ee a li tene ha monna oa hae Manase a sa phela. 4A roala meqathatso, a roala sefaha molaleng, lipetja, lireng, masale, le mabenyane 'ohle a hae; 'me a etsa hore a khahlehe haholo, hoo a ka hohelang mahlo a banna bohle ba neng ba tla 'mona. 5Eaba o nea lekhabunyane la hae lekuka la veine le botlolo ea oli; a tlatsa khetsi ea hae ka liqhome, ka liphaphatha tsa feiga, le linkhoa tsa bohobe bo sa ileheng ka Sejuda, a ba a phuthela lijana, 'me le tseo tsohle a li nea lekhabunyane la hae. 6Eaba baa tsoa, ba leba khorong ea motse oa Bethulia. Ba fumana moo Usiea a eme le baholo ba babeli ba motse, Kaberise le Karemise. 7Ha ba bona Juditha sefahleho sa hae se fetohile hakaalo, le liaparo tsa hae li fapane hakaalo, ba babatsa botle ba hae, ba re ho eena: 8“Molimo oa bo-ntat'a rona a ke a u boloke mohaung oa hae, 'me a atlehise morero oa hao, boithorisong ba bana ba Iseraele le tlotlisong ea Jerusalema!” 9Juditha a khumamela Molimo, a ba a re ho bona: “Mpuleleng likhoro tsa motse, hore ke tsoe 'me ke phethe seo re ileng ra buisana ka sona.” Ba laela bahlankana ho 'mulela joalokaha a kopile. 10Ba etsa joalo, 'me Juditha a tsoa, a felehelitsoe ke lekhabunyane la hae. Banna ba motse ba ne ba ntse ba mo talimile ha a theosa letsoapong 'me a khaohanya sekhutlo, ho fihlela ba se ba sa 'mone.
11Ha basali bao ba babeli ba ntse ba haola sekhutlo, balula-qhooa ba Baasiria ba ba khaoletsa. 12Ba tšoara Juditha, ba 'motsa, ba re: “U oa bafe? U tsoa kae? U ea kae?”
A araba, a re: “Ke mosali oa Moheberu. Kea baleha hobane ba heso ba lekhatheng la hore le ba hape. 13Ke tseleng ho ea bona Holofernese, molaoli e moholo oa lebotho la lona, ho mo tlalehela boemo ba litaba. Ke tla mo bontša tsela eo a loketseng ho tsamaea ka eona, haeba a batla ho hapa naha eohle ea lithaba, a sa lahleheloe kapa ho shoelloa ke motho le ea mong.”
14Ha banna bao ba ntse ba mametse seo a neng a se bolela, 'me ba mo talimme ka makalo ho bona mosali e motle hakaalo, 15ba re: “Ka ho potlakela ho theohela koano ho tla bona morena oa rona u pholositse bophelo ba hao. Joale, e-ea tenteng ea hae, ba bang ba batho ba rona ba tla u felehetsa, ba u ise ho eena. 16Ha u fihla ho eena, u se ke ua tšaba; u mo bolelle seo u tsoa re bolella sona, o tla u amohela hantle.” 17Eaba ba khetha banna ba lekholo har'a bona ho mo felehetsa le lekhabunyane la hae; 'me ba ba isa tenteng ea Holofernese.
18Litaba tsa ho fihla ha Juditha li ne li se li tletse kahohle litenteng, 'me ea e-ba leheshe-heshe kahohle moo liahelong. O ne a se a eme ka ntle ho tente ea Holofernese, a emetse hore eo a tsebisoe hore o teng, 'me sekhakhatha se ne se mo bokanetse. 19Baasiria ba ile ba mo babatsa ka baka la botle ba hae, 'me ba babatsa Baiseraele ka baka la hae, ba botsana, ba re: “Ke mang ea ka nyelisang sechaba se nang le basali ba tjee? Ho ka ba molemo hore ho se siuoe monna le ea mong oa bona a phela; hobane, ha ho ka ba ba phonyohang, ba tla qhekella lefatše lohle.”
20Ke ha balebeli le batlatsi bohle ba Holofernese ba e-tsoa, 'me ba isa Juditha tenteng. 21Holofernese o ne a phomotse moalong oa hae, tlas'a sesireletso sa monoang se perese, se khabisitsoeng ka khauta, le emeralda le majoe a mang a bohlokoa. 22Ha a tsebisoa ho fihla ha Juditha, Holofernese a tsoela mathuleng a tente, a eteletsoe pele ke ba tšoereng lirumula tsa silefera. 23Eare ha Juditha a hlaha pel'a molaoli le batlatsi ba hae, bohle ba babatsa botle ba hae. Juditha a itihela fatše ka sefahleho ho isa hlompho, empa bahlanka ba hae ba mo emisa.
