2“Morena, Molimo oa ntate Simeone, u ile ua mo hlomella ka sabole, ho etsa phetetso ho balichaba ba neng ba lokolotse leqhama la moroetsana ho mo silafatsa, ba mo hlabisa lihlong ka ho mo phetla lirope, ba mo tlontlolla ka ho mo beta. Leha u ne u itse: ‘Hoo ho se etsoe,’ empa ba ho entse. 3Ka baka lena, ua neelana ka baetapele ba bona ho fenethoa; le liphate tsa bona tse silafetseng ka mano, ua neelana ka tsona ho ba mali. Ua otla makhoba 'moho le mahosana, le babusi ba le literoneng tsa bona. 4Ua tlohella basali ba bona ho haptjoa, le barali ba bona ho ba batšoaruoa, le tse hapiloeng ho bona ho arolelanoa ke bana ba hao ba ratuoang, ba neng ba tletse chesehello ea hao 'me ba nyonya letheba le entsoeng maling a bona, 'me ba ipiletsa ho uena ho fumana thuso.
“Oho Molimo, Molimo oa ka, ak'u nkutloe le 'na, ke leng mohlolohali! 5U entse tse fetileng, tsa hona joale le tse tlang. U hlophisitse tsa kajeno le tsa kamoso; tseo u neng u li hopotse, li etsahetse. 6Liketsahalo tseo u neng u li rerile, tsa hlaha, tsa re: ‘Ke rona bana!’ Litsela tsohle tsa hao li lokisitsoe e sa le pele, le likahlolo tsa hao li lihuoa ka ho tseba e sa le pele. 7Bona, Baasiria ba tlile ka mabotho a bongata bo tšabehang, ba ikakasa ka lipere le bapalami ba tsona, ba ithorisa ka bonatla ba ba litaaso. Ba tšepile thebe le lerumo, seqha le letjeketjane. Ha ba tsebe hore uena, Morena, u moqhalanyi oa lintoa. Lebitso la hao ke Morena! 8Tamolla sefutho sa bona ka matla a hao, harasoanya likhoka tsa bona ka khalefo ea hao; hobane ba rerile ho silafatsa Qalo e halalelang ea hao, ho tlontlolla Tente ea bolulo ba Lebitso le tlotlehang la hao, le ho khaola manaka a aletare ea hao ka sabole. 9Talima boikhohomoso ba bona, lihela khalefo ea hao lihloohong tsa bona, 'me u matlafatse letsoho la mohlolohali ka sebete se hlokahalang. 10Ka maqiti a molomo oa ka, otla lekhoba 'moho le mong'a lona, le morena 'moho le mosebeletsi oa hae. Fenya boikakaso ba bona ka letsoho la mosali. 11Matla a hao ha a tsoe bongateng, 'me borena ba hao ha boa itšetleha ka likhoka; empa u Molimo oa baikokobetsi, mothusi oa ba tlatlapuoang, motšehetsi oa ba fokolang, mosireletsi oa ba furaletsoeng, le mopholosi oa ba lahlehetsoeng ke tšepo. 12Molimo oa ntate, Molimo eo Iseraele e leng lefa la hae, Morena oa leholimo le lefatše, 'Mopi oa maliba, Khosi ea tsohle tseo u li bopileng, ak'u mamele thapelo ea ka. 13Etsa hore mantsoe a ka a masene a lematse 'me a bolaee batho bao ba rerileng sehloho sa ho felisa selekane sa hao, le Sehalalelo sa hao, le thaba ea Sione, le naha eo e leng leruo la bana ba hao. 14Ak'u bontše sechaba sa hao le meloko eohle hore ke uena Morena, Molimo ea nang le matla 'ohle le borena bohle, le hore ke uena feela thebe ea sechaba sa Iseraele.”
