Molao oa manyalo a sa lumelloang
1Morena a bua ho Moshe, a re:
2“Bua le bana ba Iseraele, u re ho bona: ‘Ke 'na Morena Molimo oa lōna. 3Le se ke la etsa joalokaha ho ne ho etsoa Egepeta, moo le neng le ahile teng; le se ke la etsa joalokaha ho etsoa Kanana, moo ke le isang teng. Le se ke la latela melao ea bona. 4Le latele litaelo tsa ka, 'me le bōlōke melao ea ka, e be eona e le tsamaisang. Ke 'na Morena Molimo oa lōna. 5Le bōlōke melao ea ka le litaelo tsa ka. Ea li bōlōkang li tla mo phelisa. Ke 'na Morena.
6“ ‘Ho se be le ea mong oa lōna ea tla kena likobong tsa mosali eo e leng seng le eena. Ke 'na Morena.
7“ ‘U se ke ua tlontlolla ntat'ao ka ho kena likobong tsa 'm'ao. Ke 'm'ao, u se ke ua kena likobong tsa hae.
8“ ‘U se ke ua kena likobong tsa mosali oa ntat'ao, hobane hoo ke ho tlontlolla ntat'ao.
9“ ‘U se ke ua kena likobong tsa khaitseli ea hao, e leng morali oa ntat'ao, kapa morali oa 'm'ao, leha eba a hlahetse lelapeng leno, kapa a hlahetse lelapeng lesele.
10“ ‘U se ke ua kena likobong tsa morali oa mor'a hao, kapa tsa morali oa morali oa hao, hobane hoo ho tla u tlontlolla.
11“ ‘U se ke ua kena likobong tsa morali oa mosali oa ntat'ao, ea tsoetsoeng ke ntat'ao. Le eena ke khaitseli ea hao; u se ke ua mo tlontlolla.
12“ ‘U se ke ua kena likobong tsa rakhali'a hao, hobane eena le ntat'ao ke bana ba motho.
13“ ‘U se ke ua kena likobong tsa ngoan'abo 'm'ao e motšehali, hobane eena le 'm'ao ke bana ba motho.
14“ ‘U se ke ua tlontlolla ngoan'abo ntat'ao ka ho kena likobong tsa mosali oa hae, hobane ke mosali oa ngoan'abo ntat'ao.
15“ ‘U se ke ua kena likobong tsa ngoetsi ea hao. Ke mosali oa mora oa hao, 'me u se ke ua mo tlontlolla.
16“ ‘U se ke ua kena likobong tsa mosali oa ngoan'eno, hobane hoo e ka ba ho tlontlolla ngoan'eno.
17“ ‘U se ke ua kena likobong tsa ngoana le tsa 'm'ae. U se ke ua kena likobong tsa morali oa mora oa hae, kapa tsa morali oa morali oa hae; hona ke ketso e manyala hobane ba tsoalana le mosali eo.
18“ ‘U se ke ua nyala ngoan'abo mosali oa hao hore e be moqekoa; u se ke ua kena likobong tsa hae, ha feela ngoan'abo a ntse a phela.
19“ ‘U se ke ua kena likobong tsa mosali ea sesila ka baka la ho ea linakong tsa hae.
20“ ‘U se ke ua kena likobong tsa mosali oa mohaeno, ua itšilafatsa ka eena.
21“ ‘U se ke ua neelana ka e mong oa bana ba hao hore ka eena ho etsetsoe Moloke sehlabelo sa secheso, esere ua nyelisa lebitso la Molimo oa hao. Ke 'na Morena.
22“ ‘U se ke ua robala monna e mong joalokaha u robala mosali. Hona ke manyala.
23“ ‘U se ke ua robala phoofolo, 'me ua itšilafatsa ka eona. Mosali a se ke a ipeketla kapele ho phoofolo hore e mo robale. Hona ke manyala a tšabehang.
24“ ‘Le se ke la itšilafatsa ka lintho tsena tsohle, hobane ke ka tsona lichaba tseo ke li lelekileng kapele ho lōna li ileng tsa itšilafatsa.
25“ ‘Naha e ile ea silafala; kahoo ke ile ka e otla ka baka la bokhopo ba eona, 'me ea hlatsa baahi ba eona.
26“ ‘Empa lōna le tla bōlōka melao ea ka, le litaelo tsa ka; le se ke la etsa letho la manyala ana, leha e ka ba letsoalloa la naha, kapa molichaba ea jakileng har'a lōna. 27Manyala ana 'ohle a ile a etsoa ke batho ba neng ba ahile mona pele ho lōna, 'me naha e ile ea silafala. 28Haeba le lōna le silafatsa naha ena, e tla le hlatsa joalokaha e ile ea hlatsa lichaba tse neng li ahile ho eona pele ho lōna.
29“ ‘Mang kapa mang ea etsang e 'ngoe ea tse manyala tsena, o tla khaoloa sechabeng sa habo. 30Ka baka leo, bōlōkang litaelo tsa ka; le se ke la etsa tsohle tse manyala, tse neng li etsoa le e-s'o fihle, 'me le se ke la itšilafatsa ka tsona. Ke 'na Morena Molimo oa lōna.’ ”
