MEETLO 23

₁Morena a bua ho Moshe, a re:

₂“Bua le bana ba Iseraele, u re ho bona: ‘Linako tsa mekete ea Morena, tseo le tla li phatlalatsa e le linako tsa liphutheho tse halalelang, tsa mekete ea ka, ke tsena.

₃“ ‘Ho ka sebetsoa ka matsatsi a tšeletseng, empa letsatsi la bosupa ke letsatsi le leholo la phomolo; ke la phutheho e halalelang. Le se ke la etsa mosebetsi ofe kapa ofe; ke Sabatha sa Morena liahelong tsohle tsa lōna.

₄“ ‘Ena ke mekete e beiloeng ea Morena, e leng liphutheho tse halalelang, tseo le tla li phatlalatsa ka linako tsa tsona.

₅“ ‘Ka letsatsi la leshome le metso e mene la khoeli ea pele, ka nako ea phirimana, ke Paseka ea Morena. ₆Ka letsatsi la leshome le metso e mehlano, hona khoeling eo, ke mokete oa Morena oa bohobe bo sa lomosoang, 'me ka matsatsi a supileng le je bohobe bo sa lomosoang. ₇Ka letsatsi la pele le tla ba le phutheho e halalelang, le se ke la etsa mosebetsi ofe kapa ofe ka letsatsi leo. ₈Ka matsatsi a supileng le tla etsetsa Morena nyehelo ea secheso. Letsatsi la bosupa ke la phutheho e halalelang, le se ke la etsa mosebetsi ofe kapa ofe ka letsatsi leo.’ ”

₉Morena a bua ho Moshe, a re: ₁₀“Bua le bana ba Iseraele, u re ho bona: ‘Ha le fihla naheng eo ke le neang eona, 'me le kotula tseo e li behileng, le tla tlisetsa moprista ngata ea lilopotsiea tsa lōna. ₁₁Eena o tla akhōtsa ngata eo kapele ho Morena, e le hore le tle amohelehe. Moprista o tla e akhōtsa hoseng ha letsatsi le hlahlamang la phomolo. ₁₂Ka letsatsi leo le akhōtsang ngata ka lona, le etsetse Morena nyehelo ea secheso ka konyana e tona, e nang le selemo, e se nang sepha. ₁₃Nyehelo ea phofo eona e be boima ba likilo tse peli tsa phofo e thumisehileng, e lubiloeng ka ole, e be nyehelo ea secheso sa Morena se monko o monate. Hape ho be le nyehelo ea seno sa veine ea lethara e le 'ngoe. ₁₄Ho fihlela le tlisitse nyehelo ea Molimo oa lōna, le se ke la ja bohobe, le liqhōme kapa lefōthō, ho fihlela ka lona letsatsi leo. Ona e tla ba molao oa mehla eohle melōkong ea lōna, liahelong tsa lōna tsohle.

₁₅“ ‘Ho tloha ka letsatsi le hlahlamang la phomolo, e leng letsatsi leo ka lona le tlisitseng ngata e akhōtsoang, le tla bala libeke tse supileng, 'me e be libeke tse phethehileng. ₁₆Ka letsatsi le hlahlamang beke ea bosupa, e leng letsatsi la mashome a mahlano, le tla etsetsa Morena nyehelo e ncha ea lijo. ₁₇Le tlise linkhoa tse peli, tse akhōtsoang, tse tsoang malapeng a lōna, tse entsoeng ka phofo e thumisehileng, e boima ba likilo tse peli, 'me li phehoe li sa lomosoa, e be lilopotsiea tsa Morena. ₁₈U tla nyehela ka bohobe boo, le ka likonyana tse supileng, tse nang le selemo, tse se nang sepha; le ka pohoana, le ka lipheleu tse peli. Tsena e tla ba nyehelo ea secheso ea Morena, hammoho le nyehelo ea bona ea lijo le nyehelo ea bona ea seno. Ke nyehelo ea secheso se monko o monate ho Morena. ₁₉Hape u tla nyehela ka phooko e le nyehelo e tlosang sebe, le ka likonyana tse peli tse tona, tse nang le selemo, e le sehlabelo sa nyehelo ea teboho. ₂₀Moprista o tla li akhōtsa hammoho le bohobe bo entsoeng ka lilopotsiea, e le nyehelo e akhōtsoang kapele ho Morena. Tsena, 'moho le likonyana tse peli, li tla halalela ho Morena, 'me e be tsa moprista. ₂₁Ka lona letsatsi leo u tla phatlalatsa hore ho tla ba le phutheho e halalelang ea lōna, 'me le se ke la etsa mosebetsi ofe kapa ofe. Ona e tla ba molao oa mehla eohle melōkong ea lōna, liahelong tsa lōna tsohle.

₂₂“ ‘Ha le kotula masimo a lōna, le se ke la kotulisisa ho ea fihla meeling, 'me le se ke la khoahlapisa moo le seng le kotutse teng. Le siele mofutsana le moeti. Ke 'na Morena Molimo oa lōna.’ ”

₂₃Eaba Morena a bua ho Moshe, o re: ₂₄“Bua le bana ba Iseraele, u re: ‘Letsatsi la pele la khoeli ea bosupa e tla ba letsatsi la lōna la phomolo, la khopotso e etsoang ka ho letsoa ha terompeta; ke la phutheho e halalelang. ₂₅Le se ke la etsa mosebetsi ofe kapa ofe, le etsetse Morena nyehelo ea secheso.’ ”

₂₆Morena a bua ho Moshe, a re: ₂₇“Letsatsi la leshome la khoeli ea bosupa, ke letsatsi la tefelo ea sebe, 'me le tla ba le phutheho e halalelang. Le tla itima lijo, le etsetse Morena nyehelo ea secheso. ₂₈Ka lona letsatsi lena le se ke la etsa mosebetsi ofe kapa ofe, hobane ke letsatsi la tefelo ea sebe sa lōna ho Morena Molimo oa lōna. ₂₉Motho ofe kapa ofe ea sa tl'o itima lijo ka letsatsi lena, o tla khaoloa sechabeng sa habo. ₃₀Motho ofe kapa ofe ea etsang mosebetsi ofe kapa ofe ka letsatsi lena, ke tla mo timetsa sechabeng sa habo. ₃₁Le se ke la etsa mosebetsi ofe kapa ofe, 'me ona e tla ba molao oa mehla eohle melōkong ea lōna, liahelong tsohle tsa lōna. ₃₂E tla ba letsatsi le leholo la phomolo ea lōna, 'me le tla itima lijo. Ka phirimana ea letsatsi la borobong la khoeli eo, le tla bōlōka Sabatha seo sa lōna, ho fihlela ka phirimana e hlahlamang.”

₃₃Eaba Morena o bua ho Moshe, o re: ₃₄“Bua le bana ba Iseraele, u re: ‘Ka letsatsi la leshome le metso e mehlano la khoeli ea bosupa, ke mokete oa maphephe, o ketekeloang Morena ka matsatsi a supileng. ₃₅Letsatsi la pele ke la phutheho e halalelang; le se ke la etsa mosebetsi ofe kapa ofe. ₃₆Ka matsatsi a supileng le tla etsetsa Morena nyehelo ea secheso. Ka letsatsi la borobeli le tla ba le phutheho e halalelang, 'me le etsetse Morena nyehelo ea secheso. Phutheho ena ke ea ho phomola, 'me le se ke la etsa mosebetsi ofe kapa ofe.

₃₇“ ‘Ena ke mekete ea Morena, eo le tla e phatlalatsa hore ke ea phutheho e halalelang, ke ea ho etsetsa Morena nyehelo ea secheso, le nyehelo ea lijo, le sehlabelo, le nyehelo ea lino, 'me nyehelo ka 'ngoe e etsoe ka letsatsi la eona. ₃₈Tsena ke tse kathōko ho mekete ea Lisabatha tsa Morena, le limpho tsa lōna, le likano tsa lōna, le linyehelo tsa lōna tsa boithaopo, tseo le li abelang Morena.

₃₉“ ‘Empa ka letsatsi la leshome le metso e mehlano la khoeli ea bosupa, ha le se le bōkeletse lijo masimong, le tla keteka mokete oa Morena ka matsatsi a supileng. Letsatsi la pele e tla ba la phomolo, le letsatsi la borobeli e tla ba la phomolo. ₄₀Ka letsatsi la pele le tla kha litholoana tsa lifate tse ntle, le makala a lipalema, le masoai a lifate, le a moluoane oa nōka, 'me ka matsatsi a supileng le thabe kapele ho Morena. ₄₁Le tla keteka mokete ona ka matsatsi a supileng, ka selemo se seng le se seng, e le oa Morena. Ona ke molao oa mehla eohle melōkong ea lona, 'me le tla etsa mokete ona ka khoeli ea bosupa.

₄₂“ ‘Le tla phela maphepheng ka matsatsi a supileng, 'me matsoalloa 'ohle a naha ea Iseraele a tla phela maphepheng, ₄₃hore litlōhōlō tsa lōna li tle li tsebe hore ke ile ka phelisa bana ba Iseraele maphepheng, mohla ke neng ke ba ntša naheng ea Egepeta. Ke 'na Morena Molimo oa lōna.’ ”

₄₄Ka mokhoa ona Moshe a tsebisa bana ba Iseraele mekete e beiloeng ea Morena.