MAELE 14

₁Mosali ea bohlale

o haha lapa la hae,

empa ea sethoto

o le qhala ka matsoho a hae.

₂Motho ea lokileng

o tšaba Morena,

empa ea khopo

eena o nyelisa Morena.

₃Polelo tsa sethoto

li se otlela boikhantšo,

empa tsa ba bohlale

tsona lia ba sireletsa.

₄Moo khomo li leng sieo

sejelo ha se na letho,

chai e ba ngata ka matla a lipholo.

₅Paki e tšepahalang

ha e ke e thetsa,

empa ea bohata

eona e bua leshano.

₆Mosomi o batla bohlale,

empa ha a bo fumane,

ea nang le kutloisiso

tsebo o e fumane habonolo.

₇Sutha pel'a sethoto,

hobane ho sona tsebo ha e eo.

₈Ea bohlale o tseba

ho khetha tsela ea hae,

sethoto se ithetsa ka bothoto ba sona.

₉Lithoto li talima sebe e le papali,

ba lokileng

ba tseba molemo oa poelano.

₁₀Motho o tseba

bohlōkō ba pelo ea hae,

ha ho e mong

ea ka utloang thabo ea eona.

₁₁Ntlo ea ea khopo e tla heletsoa,

leaho la ea lokileng

lona le tla atleha.

₁₂Tsela e teng e bonahalang

e lokile ho mong'a eona,

empa e qetella ka ho isa lefung.

₁₃E mong o tšeha a nts'a hlomohile,

tšeho la hae le qetelle ka masoabi.

₁₄Motho ea khopo

o ahlōleloa melato ea hae,

ea lokileng eena

o putsetsoa liketso tsa hae.

₁₅Kamehla ea se nang tsebo

ke tumela-khoèèla,

empa ea bohlale

eka khona a ikholise.

₁₆Motho ea bohlale

o tšaba bobe, oa ho ila,

empa sethoto

sea tlatselela, sea itšepa.

₁₇Motho ea halefang kapele

o etsa bothoto,

ea nang le mehopolo e mebe

batho baa mo hloea.

₁₈Lefa la ba se nang tsebo ke bothoto,

athe moqhaka oa ba bohlale ke tsebo.

₁₉Ba khopo ba khumama

kapel'a ba lokileng,

baetsalibe bona,

kapel'a khoro tsa ba lokileng.

₂₀Mafutsana a hloiloe

le ke ba ahisaneng le 'ona

empa barui

ba na le metsoalle e mengata.

₂₁Ea nyelisang ea ahisaneng le eena

o etsa sebe,

empa ho lehlohonolo

ea hauhelang mofutsana.

₂₂Ba rerang bobe baa lahleha,

empa ba rerang botle

ba fumana mohau le 'nete.

₂₃Mesebetsi eohle

e na le moputso oa eona,

empa ho bèrabèra

hona hoa futsanehisa.

₂₄Meqhaka ea ba bohlale

ke maruo a bona,

bothoto ba lithoto

bona ba tsoala bothoto.

₂₅Paki ea 'nete e pholosa batho,

athe ea bohata eona e bua leshano.

₂₆Ea tšabang Morena

o na le qhobosheane,

bana ba hae ba fumana setšabelo.

₂₇Ho tšaba Morena

ke seliba sa bophelo,

ea mo tšabang

o phema maraba a lefu.

₂₈Tlōtla ea khosi

ke ho busa chaba se le sengata,

athe khosana

e timela ke ho hloka sechaba.

₂₉Ea liehang ho halefa

o na le kutloisiso,

athe sefèla-peloana

se bontša bothoto.

₃₀Pelo e nang le khotso

e phelisa motho hantle,

empa mōna

o bolisa masapo a motho.

₃₁Ea hatellang mofutsana

o nyelisa 'Mōpi oa hae,

empa ea mo hauhelang

eena o tlōtla Molimo.

₃₂Ea khopo o felisoa

ke bokhopo ba hae,

ea lokileng o na le letšepa,

esita le lefung la hae.

₃₃Ea nang le kutloisiso

o ruile bohlale,

le har'a lithoto boa itotobatsa.

₃₄Ho loka ho atlehisa sechaba,

empa sebe ke sekhobo ho sona.

₃₅Khosi e khahloa

ke mohlanka ea bohlale,

athe ea hlabisang lihlong

eena ea mo halefela.