1Ea arabang ka boikokobetso
o tima khalefo,
empa polelo e khahlapetsang
e baka bohale.
2Leme la ea bohlale
le ratisa batho tsebo,
empa molomo oa sethoto
o kopotsa bothoto.
3Mahlo a Molimo a bona kahohle,
a lisa ba khopo le ba lokileng.
4Leme le thabisang
ke fate sa bophelo,
empa le thetsang
le senya pelo ea motho.
5Sethoto se nyelisa
thuto ea ntat'a sona,
athe ea ratang khalemo
eena oa hlalefa.
6Ka tlung ea ea lokileng
leruo le teng,
empa ea khopo
leruo le 'makela litsietsi.
7Molomo oa ea bohlale o jala tsebo,
pelo ea ea sethoto eona e mpe.
8Mahlabelo a ea khopo
ke manyala ho Morena,
empa thapelo ea ea lokileng
ea mo khahla.
9Litsela tsa ea khopo
ke manyala ho Morena,
ea labalabelang ho loka
eena oa mo rata.
10Ea khelohang tsela o tla otloa haholo,
ea hloileng khalemo eena o tla timela.
11Morena o tseba
tse ka Qalong ea Bafu,
le tse ka ho ea Timelo oa li tseba,
a ka sitoa keng ho tseba
makunutu a batho?
12Mosomi eena o hloile khalemo,
le ho ba bohlale
a ke ke a batla keletso.
13Pelo ha e thabile
sefahleho se khanya khotso,
empa ha e hlomohile
motho o utloa bohlōkō.
14Ea nang le kutloisiso
o labalabela tsebo,
athe lithoto tsona
li labalabela bothoto.
15Ea tšoenngoang
o phela habohlōkō ka nako tsohle,
ea thabileng
eena o keteka kamehla.
16Sejo-senyane se molemo
ha u tšaba Morena,
ho e-na le maruo
a u bakelang litsietsi.
17Ho molemo ho ja moroho
o fanoang ka lerato,
ho e-na le matšufu
a fanoang ka lehloeo.
18Motho ea bohale o baka liqabang,
ea nang le mamello eena oa li felisa.
19Tsela ea sekhōba
e ririellane meutloa,
athe ea ea lokileng
eona e bataletse hantle.
20Ngoana ea bohlale o thabisa ntat'ae,
empa sethoto sona
se nyelisa le 'm'a sona.
21Ea hlokang bohlale
o thabisoa ke bothoto,
ea nang le kutloisiso
eena o etsa ho lokileng.
22Ea sa rateng likeletso
merero ea hae ea nyōpa,
ea eletsoang ke ba bangata
eena oa atleha.
23Karabo e nepahetseng
e thabisa mong'a eona,
e tlang ka nako ea eona
e molemo hakaakang!
24Ho ea bohlale
tsela ea bophelo ke e eang holimo,
ho mo phemisa
ho theohela lebitleng.
25Morena o timetsa
lapa la moikhantši,
empa o sireletsa
moeli oa lapa la mohlolohali.
26Mehopolo ea ea khopo
ke manyala ho Morena,
polelo tsa ea lokileng
tsona li khahlisa Morena.
27Ea meharo
o tlisetsa lapa la hae tsietsi,
ea hloileng tjotjo eena o tla phela.
28Ea lokileng o inahana a e-s'o arabe,
molomong oa ea khopo
bokhopo boa kopotsa.
29Morena o emeletse thōko,
thōko le ba khopo,
thapelo ea ba lokileng
o e sekehela tsebe.
30Ho talima motho hantle
ho thabisa pelo ea hae,
taba tse molemo li mo tsosa molōta.
31Ea mamelang khalemo
e isang bophelong,
o tla lula hamonate har'a ba bohlale.
32Ea sa natseng thuto oa inyelisa,
empa ea mamelang khalemo
o ekeletsoa kutloisiso.
33Ho tšaba Morena
ho ruta motho bohlale;
ikokobetse pele, 'me u tla tlōtloa.
