SIRAKA 11

₁Ha mofutsana a le bohlale

o tsoha molota,

'me a ka lula har'a ba baholo.

₂U se ke ua roka motho

ka baka la chebahalo e ntle ea hae,

kapa ua nyonya motho

ka baka la talimeho ea hae.

₃Notši e nyenyane har'a libopuoa

tse fofang,

empa se beoang ke eona

se monate-nate

har'a lintho tse menyemenye.

₄U se ke ua ithorisa ka ho apara

liaparo tse ntle,

leha e le ho iphahamisa tsatsing

leo u neoang hlompho ka lona:

hobane mesebetsi ea Morena

ea makatsa,

'me mesebetsi ea hae e ipatetse batho.

₅Likhosi tse ngata li ile tsa tlameha

ho lula fatše,

empa motho ea neng a sa nahanoe

le ho nahanoa

o ile a roala mofapahlooho.

₆Babusi ba bangata

ba ile ba hlompholloa hampe,

'me batho ba tummeng

ba ile ba oela liatleng tsa ba bang.

₇U se ke ua ahlola pele u fuputsa;

imamele pele, u nt'o khalema.

₈Se arabe pele u mamela;

se kene sebui hanong.

₉Se phee khang ka taba e sa u ameng,

leha e le ho lula le baetsalibe

ha ba ahlola nyeoe.

₁₀Ngoan'a ka, u se ke ua tšoara

mesebetsi e mengata;

ha u e atisa, ha u ka ke ua phema

liphoso;

leha u matha, ha u ka ke ua siea,

'me leha u baleha,

ha u ka ke ua phonyoha.

₁₁Ho teng motho ea sehlang,

ea sokolang, 'me ea sututsang,

empa bohloki ba hae boa eketseha.

₁₂Ho teng motho ea lenama,

'me ea hlokang ho thusoa,

ea se nang matla, 'me a ruile bofuma;

empa mahlo a Morena a mo shebile

bakeng sa ho mo thusa,

o mo phahamisa boemong

bo tlase ba hae,

₁₃'me o mo phahamisetsa boemong

bo kaholimo;

hoo ba bangata ba mo makaletseng.

₁₄Lintho tse ntle le tse mpe,

bophelo le lefu,

bofuma le borui li tsoa ho Morena.

₁₇Limpho tsa Morena

ha li haelle barapeli,

'me boithatelo ba hae bo ba tataisa

ka ho sa eeng kae.

₁₈Motho o teng ea ruileng

ka baka la sehlahlo

le bokhonatha ba hae;

empa o tla fumana moputso ofe?

₁₉Ha a re: “Ke fumane phomolo;

joale nka ja leruo la ka,”

ha a tsebe hore na ho setse nako e kae,

ho fihlela a li siela ba bang

'me a e-shoa.

₂₀Tiisetsa litšoanelong tsa hao,

u ikitlaelletse tsona,

'me u tsofalle mosebetsing oa hao.

₂₁U se ke ua makatsoa

ke tse etsoang ke moetsalibe,

empa u tšepe Morena,

'me u tiisetse mosebetsing oa hao;

hobane ho bonolo ho Morena,

ho ruisa mofutsana hang-hang.

₂₂Hlohonolofatso ea Morena

ke moputso oa barapeli,

'me kapele o etsa hore

hlohonolofatso ea hae e atlehe.

₂₃U se ke ua re: “Ke hloka'ng,

'me tse molemo tseo nka li fumanang

kamoso ke life?”

₂₄U se ke ua re: “Ke khonehile,

'me kotsi ke efe e ka ntlhahelang

kamoso?”

₂₅Ka nala, tlala ea lebaloa;

ka tlala, nala ha e sa hopoloa.

₂₆Ho bonolo ho Morena, mohla lefu,

ho putsa motho

ho ea ka boitšoaro ba hae.

₂₇Makaqabetsi a motsotsoana

a lebatsa motho maiketlo,

'me qetellong ea bophelo

liketso tsa hae li tla senoloa.

₂₈Se re motho o lehlohonolo

pele ho lefu la hae;

motho o tla tsejoa ka litaba tsa hae

tsa qetello.

₂₉U se ke ua kenya motho

ofe kapa ofe ka lapeng la hao,

hobane a mangata maqheka

a molotsana.

₃₀Pelo ea moikhohomosi

e joaloka khoale e koaletsoeng

ka ntloaneng, e le leraba;

kapa e joaloka hloela e lebeletseng

ho oa ha hao.

₃₁O laletse ho fetola botle bobe,

'me liketsong tse rorisehang

o kenya nyatseho.

₃₂Tlhase ea mollo e hotetsa

mashala a mangata,

'me moetsalibe o laletse ho tšolla mali.

₃₃Hlokomela mohlola-a-li-etsa,

hobane o rera bokhopo;

esere a u etsa letheba le sa hlakoheng.

₃₄Amohela ea sa tsebisahaleng

ka ha hao,

'me o tla u tlisetsa mofere-fere,

a u etse molichaba ka lapeng la hao.