1Ha u etsa molemo, tseba hore
na u etsetsa mang,
'me u tla lebohuoa ka baka la liketso
tsa hao tse ntle.
2Etsetsa morapeli molemo,
'me u tla buseletsoa;
haeba e se ka eena, ka 'nete e tla ba
ka Ea holimo-limo.
3Ha ho molemo o ka tlelang motho
ea pheellang bokhopong,
kapa eo ea sa thuseng mofutsana.
4Fana ho morapeli,
empa u se thuse moetsalibe.
5Etsetsa moikokobetsi molemo,
empa u se fane ho ea khopo.
Mo time bohobe, se mo fe bona;
esere ka baka la lijo tsa hao a u hlola,
'me u amohele bobe habeli
ka molemo oohle
oo u mo etselitseng oona.
6Ea holimo-limo le eena
o hloile baetsalibe,
'me o tla otla ba se nang Molimo
ka mokhoa o lokelang.
7Fana ho motho ea lokileng,
empa u se thuse moetsalibe.
8Motsoalle ha a ka ke a tsebahala
mohla nala,
leha e le sona sera ho pateha
mohla makaqabetsi.
9Lira tsa motho lia hlabeha ha a atleha,
'me mohla makaqabetsi
esita le motsoalle
o tla ikarohanya le eena.
10Le ka mohla se tšepe sera sa hao;
hobane joaloka lethose le tšoaroang
ke mafome,
le bona bokhopo ba sona bo joalo.
11Esita leha sera se ka ikokobetsa
'me sa oma ka hlooho,
itlhokomele, 'me u lule u itebetse
pel'a motho ea joalo.
Mo etse joalokaha eka u hlakola
seipone,
'me u tla tseba hore ha se na ho fifala
ho ea ho ile.
12U se ke ua mo lumella ho ema
lehlakoreng la hao.
esere a u liha 'me a nka sebaka sa hao.
U se ke ua mo lulisa
ka ho le letona ho uena,
esere a leka ho ikhapela setulo sa hao;
'me khabareng u tla elelloa
'nete ea lipolelo tsa ka,
'me u hopole temoso ea ka ka, masoabi.
13Ke mang ea ka qenehelang motho
ea bapalisang linoha ha li mo lomme;
kapa bohle ba atamelang
haufi le libatana?
14O tšoana le bona motho ea tsamaeang
le moetsalibe,
'me a iphumana a kentse letsoho
libeng tsa hae.
15Sera se tla lula le uena nakoana;
empa ha u ka khetšemela,
ha se ka ke sa u tšehetsa.
16Leleme la sera le monate,
athe ka pelong se ntse se u rera,
se batla ho u lihela ka lenkoaneng.
Sera se tla ntša likeleli;
empa ha se ka fumana monyetla,
lenyora la sona la mali le ke ke la tima.
17Haeba tsietsi e u oela,
u tla se fumana se se se u eteletse pele;
'me se sa ntse se etsa sa mokana
se u thusa,
se tla u khoaphela.
18Se tla sisinya hlooho, se ope liatla,
se hoeshetse haholo, 'me se bontše
sebopeho sa sona sa 'nete.
