Botsoa le bothoto
1Ea botsoa a ka tšoantšoa
le lejoe le tletseng litšila;
'me bohle ba tla mo tlaka
ka baka la ho itlontlolla ha hae.
2Ea botsoa a ka tšoantšoa le bolokoe,
'me motho ea bo amang
o tla bo hlohlora letsohong la hae.
3Ke ntho e hlabisang lihlong
ho ba ntat'a mora
ea sa holisoang hantle,
'me le tsoalo ea morali ke tahlehelo.
4Morali ea nang le kutloisiso
oa nyaleha,
empa ea itlotlollang o soabisa ntat'ae.
5Morali ea tellang o hlabisa ntat'ae
le mohats'a hae lihlong,
'me o tla nyelisoa ke bona bobeli.
6Puo ka nako e fosahetseng
e ka 'mino oa thabo ka nako ea bofifi,
empa khalemo le taeo ke bohlale
ka nako tsohle.
7Ho ruta sethoto e ka ho khomaretsa
manyetana a pitsa e pshatlehileng,
e ka ho tsosa morobali sephumeng
sa boroko.
8Ho qoqela sethoto e ka ho qoqela
motho ea otselang;
'me qetellong o tla re:
“U nts'u re'ng?”
11Llela mofu, hobane o tlohile leseling:
u llele le sethoto, hobane se haeletsoe
ke kutloisiso.
Empa u se llele mofu hakaakalo,
hobane o se a fumane phomolo;
athe bophelo ba sethoto
bo bobe ho feta lefu.
12Bofifi ba mofu bo nka matsatsi
a supileng;
athe ba sethoto le ba ea se nang
Molimo bo qeta bophelo bohle.
13Se hehle le setlaopa sa motho,
'me u se chakele motho
ea se nang bohlale.
Iphuthe ho eena ho phema khathatso,
'me ha u ka ke ua silafala
ha a itlhotlhora.
Mo qobe 'me u tla fumana phomolo,
'me le ka mohla ha u na ho hlopshoa
ke bohlanya ba hae.
14Ke'ng ho boima ho feta loto?
lebitso la eona ke'ng haese “setlaopa”.
15Lehlabathe, letsoai, le sekoto sa tšepe
li bobebe ho li jara ho e-na le motho
ea sethoto.
16Sefate sa marulelo se kopantsoeng
ka thata le mohaho,
se ke ke sa khoehlisoa ke tšisinyeho
ea lefatše;
ka mokhoa o tšoanang pelo
e tseparetseng morero,
ka mora' boimamelo,
e ke ke ea khoehlisoa ha nako e fihla.
17Pelo e matlafalitsoeng
ke boinahano ba kelello
e ka khabiso ea letsopa
lerakong le boreleli.
18Makhoakhoa a epetsoeng
sebakeng se phahameng
a ke ke a ema a tiile
thulanong le moea;
ka mokhoa o tšoanang pelo e boi
ka baka la likhopolo tsa bothoto
ha e ka ke ea tiea ha e tšosoa
neng kapa neng.
Setsoalle
19Motho ea fahlang leihlo
o baka likeleli ho keleketla,
'me motho ea khoephetsang pelo
o etsa hore e sise.
20Motho ea betsang linonyana ka lejoe
oa li qhala,
'me motho ea hlapaolang motsoalle
o tla felisa setsoalle.
21Ekasita u se u ntšelitse sera sa hao
sabole,
se lahle tšepo, hobane le ka 'na
la boelana.
22Haeba u ile ua qabana
le motsoalle oa hao,
se ipelaetse, hobane poelano
e ka fihleloa.
Empa ha e le lihlapa
kapa boikhohomoso
kapa pepeso ea makunutu
kapa bohlabaphio,
moo motsoalle ofe kapa ofe
a ka hlanola tlhabela.
23Tšepanang le moahisani
bofumeng ba hae,
e le hore u tle u be le kabelo e tletseng
naleng ea hae;
e-ba le eena litlokotsing,
e le hore a tle a arolelane lefa la hae
le uena.
24Mosi oa leifo o kubella
pele lelakabe le e-ba teng;
ka mokhoa o joalo mahlapa
a etella pele tšollo ea mali.
25Ha nka ke ka hlajoa ke lihlong
ho sireletsa motsoalle,
'me nke ke ka mo furalla.
26Empa haeba bomalimabe
bo ka ntlhahela ka baka la hae,
mang kapa mang ea tla bo tseba
o tla iphutha ho eena.
Thapelo e kopang thuso toantšong ea sebe
27Ke mang ea tla lebela
molomo oa ka,
kapa a o thibe ka boka ba seli,
e le hore ke se ke ka oa,
leleme la ka le se ntimetse?
