1Oho Morena, Ntate
le Mong'a bophelo ba ka,
se ntlohele matleng a leleme la ka,
u se ntese ho oa ka baka la lona.
2Ke mang ea tla shapa mehopolo ea ka,
'me a rupele pelo ea ka bohlale,
a sa nqenehele liphosong tsa ka,
a sa lobe libe tsa ka?
3Oho, liphoso tsa ka
li se ke tsa ngatafala,
libe tsa ka li se ke tsa eketseha;
ke se ke ka oa
mahlong a ba ntoantšang,
'me lira tsa ka
li se ikutloe monate ka 'na!
4Morena, Ntate
le Molimo oa bophelo ba ka,
se mphe mahlo a ikakasang,
5'me u tlose ho 'na takatso tse mpe.
6Ak'u etse hore meharo
le litakatso tsa bohlola li se mpuse,
u se ntlohelle ho ba motho
ea se nang lihlong.
Ho hlapanya
7Bana ba ka, ithuteng ho tšoara
leleme;
ea etsang joalo ha a ka ke a tšoasoa
ka lipuo.
8Moetsalibe o tšoaroa ka lipuo tsa hae,
ramahlapa le moikhohomosi
ba khoptjoa ke tsona.
9Se tloaetse molomo oa hao
ho hlapanya,
'me u se lemalle ho bitsa Lebitso
la Ea halalelang.
10Joalokaha mohlanka, eo ereng
ha a manangoa ka lipotso,
a ke keng a phema matetetso a phafa,
ka mokhoa o tšoanang
motho ea hlapanyang
kamehla ka Lebitso la Molimo
a ke ke a hloka sebe.
11Motho ea hlapanyang hangata
o tlala bokhopo,
'me le ka mohla phafa
ha e na le ho ba hole le ntlo ea hae.
Ha a hlapanya a sa elelloe,
o ntse a jere boikarabelo
ba sebe sa hae.
Ha a hlapanya ka bohlasoa,
o molato habeli.
Ha a hlapanyetsa leshano,
ha a na ho qoba molato;
empa ntlo ea hae e tla tlala
bomalimabe.
Lipuo tse litšila
12Ho na le mofuta oa polelo
o ka tšoantšoang le lefu:
e se eka e ke ke ea fumanoa
molokong oa Jakobo!
Barapeli ba sesefa tsena tsohle;
ha ba na ho ipoqa ka har'a libe.
13U se ke ua tloaetsa
molomo oa hao lipuo
tse sa tšoanelehang tse nyonyehang,
hobane tse joalo ke sebe sa molomo.
14Hopola ntat'ao le 'm'ao
ha u lutse har'a ba boholong,
esere ua itebala ka pele ho bona,
'me ua itšoara joaloka leoatla
ka baka la tloaelo ea hao;
ebe joale u lakatsa
eka u ka be u sa ka ua tsoaloa,
'me e be u rohaka letsatsi
la tlhaho ea hao.
15Motho ea tloaetseng lipuo
tse nyatsehang,
ha a sa tla ba le boitšoaro ka litšiu
tsohle tsa bophelo ba hae.
Libe tsa nama
16Batho ba mefuta e 'meli
ba atisa libe,
'me oa boraro o ipiletsa khalefo.
Litakatso tsa nama tse joaloka mollo
o tukang,
li ke ke tsa tingoa
ho fihlela li kokobetsoa.
Motho ea ineellang bohlola
ka botho bohle ba hae,
ha a sa tla khaotsa
ho fihlela mollo o mo qeta.
17Motho oa sehlola o matha
le mang kapa mang,
'me a ke ke a khathala
ho fihlela a shoele.
18Motho ea robang likano tsa hae
tsa lenyalo
o re ka ho eena:
“Ke mang ea mponang?
Lefifi le mpota-potile,
'me mabota a mpatile,
'me ha ho motho ea mponang.
Ke tšohetse'ng?
Ea holimo-limo
ha a ka ke a ela hloko libe tsa ka.”
19Motho eo o tšaba mahlo
a batho feela;
empa ha a tsebe hore mahlo a Morena
a khanya ho feta letsatsi halikete-kete,
le hore o talima metsamao
eohle ea batho,
'me o senola likhutloana
tsohle-tsohle tse patehileng.
20Pele lintho tsohle li boptjoa,
li ne li se ntse li tsebahala ho eena,
'me ho bile joalo
hoba mosebetsi oo o phethahale.
21Motho eo o tla fumana kotlo
e mo lokelang mapatlelong a motse;
'me moo a neng a sa hopola
le hanyenyane, o tla tšoaroa.
22Ho joalo le ho mosali
ea lahlang monna oa hae,
'me a mo etsetsa mojalefa ka nyatsi.
23Sethatong o tlotse molao
oa Ea holimo-limo;
hape o sitetsoe monna oa hae.
Hape-hape o iphetotse letekatse
ka bohlola,
'me a tsoala bana ka monna e mong.
24Eena ka sebele o tla qosoa
ka pele ho phutheho,
'me patlisiso e tla etsoa
ka bana bao ba hae.
25Bana ba hae ba ke ke ba e-ba
le motso,
'me makala a hae a ke ke a bea
litholoana.
26O tla rohakeha ho batho
ba mo hopolang;
mahlabisa lihlong a hae
ha a ka ke a hlakoha.
27Joale ba mo hlahlamang ba tla tseba
hore ha ho letho le molemo
ho feta tšabo ea Morena,
'me ha ho letho le monate
ho feta hlompho ea melao ea hae.
