SIRAKA 24

₁Bohlale boa ithoka,

bo iphafa ka har'a sechaba

sa bona.

₂Phuthehong ea Ea holimo-limo,

bo ahlamisa molomo,

'me bo iphafa

ka pele ho Ea matla 'ohle,

bo re:

₃“Ke tsoile molomong

oa Ea holimo-limo,

'me ka aparela lefatše joaloka moholi.

₄Ka aha maholimong a holimo-limo,

'me terone ea ka ea e-ba ka har'a

leru le lopaletseng.

₅Ke 'na a inotši ea ileng a pota-pota

sekhurumetso sa leholimo,

'me ka sepela botebong ba maoatle.

₆Maqhubu a leoatle, lefatše lohle,

batho bohle le lichaba tsohle,

ka li laola.

₇Har'a tsena tsohle, ka batla

moo nka phomolang teng,

ka ipotsa hore na nka aha

naheng ea mang.

₈Eaba 'Mopi oa lintho tsohle

o mpha taelo,

'me Ea mpopileng a nkhethela

setša sa tente ea ka,

a re: ‘Hloma tente ea hao ha Jakobo,

'me Israele u amohele lefa la hao.’

₉O ne a mpope tšimolohong,

pele ho linako tsohle;

'me ke tla 'ne ke be teng

kamehla le mehla.

₁₀Ka mo sebeletsa ka Tempeleng

e halalelang,

'me ka hona ka ba le bolulo bo tiileng

Sione.

₁₁O mphile sebaka sa phomolo

motseng o ratuoang,

ke Jerusalema moo puso ea ka

e leng teng.

₁₂Ke tebisitse metso sechabeng

se tlotlehang,

seo e leng kabelo ea Morena

le lefa la hae.

₁₃Ka lelefala joaloka sefate sa kedare

sa Lebanone,

le joaloka sa saeperese

matsatseng a Hermone.

₁₄Ka lelefala joaloka sefate sa palema

sa Ene-Gedi,

ka ba joaloka sehlaha sa rosa sa Jeriko,

joaloka sefate se setle sa mohloare

phuleng;

'me joaloka sefate sa hoki ka lelefala.

₁₅Joaloka kasia le moutloa oa kamele

ka ntša monko o monate-nate

oa linoko;

'me joaloka mira e khethehileng

ka hasanya monko o monate,

joaloka galbanumu le likhetla

tse nkhang hamonate le setoraka,

joaloka mosi oa mokubetso

ka Sehalalelong.

₁₆Joaloka sefate sa eike

ka ala makala a ka,

'me makala a ka a tlotleha le ho rateha.

₁₇Joaloka morara ka hlahisa botle

ho fuputsa,

'me lithung-thung tsa ka tsa tlotleha

'me tsa bea litholoana tse ngata-ngata.

₁₉Tlong ho 'na,

lona ba ntlholohetsoeng,

'me le je litholoana tsa ka

ho fihlela le khora;

₂₀hobane ho nkhopola ho monate

ho feta mahe a linotši,

'me ho nthua ho monate

ho feta lekheha la tsona.

₂₁Ba ntjang ba tla 'ne ba lape ho feta,

'me ba 'noang ba tla 'ne ba nyoroe

ho feta.

₂₂Ea 'mamelang

ha a ka ke a hlabisoa lihlong,

'me ba sebelisanang le 'na

ba ke ke ba etsa sebe.”

₂₃Tsena tsohle ke buka ea selekane

sa Molimo Ea holimo-limo,

Molao oo Moshe a re beetseng oona,

e le lefa la liphutheho tsa Jakobo.

₂₅Molao o tletse bohlale

bo khaphatsehang

joaloka noka ea Pishone,

le joaloka noka ea Tigerese

ka nako ea litholoana tsa lilopotsia.

₂₆O tlisa kelello e ngata

joaloka metsi

a Euferatese ha e tletse,

le joaloka a Jordane

ka nako ea kotulo.

₂₇O fana ka thupelo e ngata

joaloka metsi a Nile,

le joaloka a Gihone

ka nako ea kotulo ea morara.

₂₈Ha ho motho ea kileng a tseba

bohlale ka ho tlala;

leha e le oa khale kapa ea tlang

ha ho ea ka fihlelang botebo ba bona.

₂₉Mehopolo ea bona e phatlaletse

ho feta leoatle,

merero ea bona e tebile

ho feta metsi a lona.

₃₀Ha e le 'na, ke ne ke tšoana

le nokana ea maiketsetso

e tsoang nokeng,

le motero o isang metsi serapeng.

₃₁Ka re: “Ke tla nosetsa serapa sa ka,

ke tšelle liratsoana tsa ka.”

Empa, bonang, nokana ea ka

ea maiketsetso e se e fetohile noka,

'me noka e fetohile leoatle!

₃₂Ke tla etsa hore thupelo e khanye

hape joaloka mafube,

ke etse hore e betsetse mahlaseli a eona

hole-hole.

₃₃Ke tla hasanya thuto hape

joaloka boporofeta,

'me ke e siele meloko ea kamoso.

₃₄Bonang, ha kea ka ka itšebeletsa

ka thata ke le mong,

empa ke sebelelitse bohle

ba batlang bohlale.