1Ha a joalo motho ea
ikitlaeletsang
ho nahana ka Molao
oa Ea holimo-limo,
ea fuputsang bohlale
ba baholo-holo bohle,
'me a nka nako ho ithuta tsa
boporofeta.
2O boloka lipolelo tsa batho
ba tummeng,
'me o fuputsa botebo ba litšoantšo.
3O batlisisa moelelo o patehileng
oa maele,
'me o tloaetse ho senola liphiri
tsa litšoantšo.
4O sebeletsa batho ba boemo,
'me o fumanoa har'a babusi.
O etela linaha tsa lichaba lisele,
o tsebile botle le bobe ba batho.
5E sa le ka meso,
ka pelo eohle ea hae,
o batla Morena ea mo bopileng,
'me o hlahisa thapelo
ho Ea holimo-limo.
O bula molomo oa hae ka thapelo,
'me o kopa tšoarelo ea libe tsa hae.
6Haeba e le thato ea Morena
ea matla 'ohle,
o tla tlala moea oa kutloisiso.
Mantsoe a bohlale a tla betseha
ho eena,
a lebohe Morena ka thapelo.
7O tla ba le boeletsi
le tsebo e nepahetseng,
a inahane ka liphiri tsa Morena.
8O tla totobatsa thuto
eo a e fumaneng,
a ithorise ka molao oa selekane
sa Morena.
9Ba bangata ba tla rorisa
bohlale ba hae,
bo ke keng ba lebaleha le ka mohla.
Lebitso la hae ha le ka ke la nyamela,
empa le tla 'ne le hopoloe
ke meloko le meloko.
10Lichaba li tla lokolisa bohlale ba hae,
le phutheho e bolele lithoko tsa hae.
11Haeba a phela halelele,
o tla siea lebitso le tummeng
ho feta a likete;
'me haeba a e-ea phomolong,
botumo ba hae bo se bo lekane.
Lithoko tsa Molimo
12Ke sa na le hona ho bolela tse ling
tseo ke 'nileng ka li nahana,
'me ke tletse joaloka khoeli
e tolokileng.
13'Mameleng, lona bana ba halalelang,
'me le hole
joaloka rosa e metseng
lebopong la noka.
14Ntšang monko o monate
joaloka mokubetso,
'me le thunye joaloka mohalalitoe;
hasanyang monko o monate,
'me le bine sefela sa thoko.
Bokang Morena ka baka la mesebetsi
eohle ea hae.
15Phafang boholo ba lebitso la hae,
'me le mo leboheng ka thoko,
ka lipina tse tsoang melomong ea lona
le ka liletsa,
'me seo le tla se bolela tebohong
ke sena:
16E metle hakaakang
mesebetsi eohle ea Morena!
eng le eng eo a e laelang
e tla phethoa ka nako ea hae.
17Ho se be ea reng: “Hona ke'ng?
Ho joalo ka baka la'ng?”
Lipotso tsohle li tla fumana karabo
ka nako e beiloeng ke eena.
Ka lentsoe la hae
metsi a ile a bokellana;
ka polelo ea molomo oa hae
matša a metsi a e-ba teng.
18Ka taelo ea hae eng le eng
e mo khahlileng ea etsoa,
'me ha ho ea ka nyenyefatsang
matla a hae a pholosang.
19Mesebetsi ea batho bohle
e totobetse ka pele ho eena,
'me ha ho letho leo a ka le pateloang.
20Ho tloha haesale ka ho seng kae
o bona tsohle
'me ha ho letho leo e leng limakatso
ho eena.
21Ho se be ea reng: “Hona ke'ng?
Ho joalo ka baka la'ng?”
Tsohle li bopetsoe mosebetsi oa tsona.
22Hlohonolofatso ea hae
e ka noka e tletseng,
e noesetsang lefatše joaloka moroallo.
23Empa khalefo ea hae
e tla oela holim'a lichaba,
joalokaha a ile a fetola
metsi a nooang a be letsoai.
24Ho bahalaleli litsela tsa hae
li otlolohile,
empa ba khopo ba khoptjoa ho tsona.
25Ho tloha tšimolohong ntho tse ntle
li ile tsa bopeloa ba lokileng,
'me tse mpe tsa etsetsoa baetsalibe.
26Tse hlokahalang haholo
bophelong ba motho
ke metsi le mollo le tšepe le letsoai
le phofo ea koro le lebese
le mahe a linotši
le lero la morara le mafura le liaparo.
27Tsena tsohle ke bakeng sa molemo
oa barapeli,
empa li fetohela bobeng ho baetsalibe.
28Ho na le meea
e bopetsoeng ho otla,
khalefong ea eona
e hlokofatsa haboima.
Mohla letsatsi la timelo
e tla bontša matla a eona,
'me e kokobetse khalefo
ea Moetsi oa eona.
29Mollo le sefako le tlala le lefu le seoa,
tsena tsohle li bopetsoe ho otla.
30Meno a libatana le liphepheng
le lithamaha
le sabole e otlang ba se nang Molimo
ho ba timetsa,
31li thabela ho phetha litaelo tsa hae,
li ikemiselitse ho mo sebeletsa
lefatšeng,
'me ha nako ea tsona e fihla,
ha li ka ke tsa roba molao oa hae.
32Ka baka lena ho tloha qalong,
ke ile ka kholiseha;
ka nahana sena, 'me ka se siea
ka mongolo.
33Mesebetsi eohle ea Morena
e molemo;
o tla phallela khaello ka 'ngoe
ka nako ea eona.
34Ho se be ea reng: “Hona ho hobe
ho feta hoane,”
hobane tsohle li tla ananeloa
li le molemo ka nako ea tsona.
35Ka baka lena binang thoko
ka pelo tsohle le ka mantsoe a phefa,
'me le boke Lebitso la Morena.
