SOLOMONE 6

₁Joale mamelang, lona likhosi,

'me le utloisise;

ithuteng, lona babusi ba lefatše

ka bophara ba lona.

₂Sekehang tsebe, lona ba renang

holim'a matšoele,

lona ba ithorisang ka bongata

ba lichaba tsa lona.

₃Ke Morena ea le fileng matla,

borena bo tsoa ho Ea holimo-limo,

eena ea tla hlahloba mesebetsi ea lona,

a shebisise merero ea lona.

₄Leha le le bahlanka ba 'muso oa hae,

ha lea ka la ahlola ka nepo,

leha e le ho boloka molao kapa

ho phela ho ea ka thato ea Molimo.

₅Ka hoo o tla le tsometsa

ka mokhoa o tšosang,

hobane kahlolo e boima e emetse

ba tulong tse phahameng.

₆Ea eisehang a ka tšoareloa,

a hauheloa;

empa ba matla ba tla botsoa ka thata.

₇Morena oa bohle ha a tšabe

mang kapa mang,

ho sa khathallehe hore

na o moholo hakae.

Ke eena ea bopileng e monyenyane

le e moholo,

'me o baballa bohle ka ho tšoana.

₈Empa lipotso tse thata

li tla tobana le ba matla.

₉Joale ke lebisa mantsoe a ka

ho lona, batlatlapi,

le tle le ithute bohlale,

le pheme liphoso.

₁₀Bao, ka khalalelo, ba latetseng

melao e halalelang

ba tla nkoa e le bahalaleli;

'me ba amohetseng thuto eo

ba tla tseba ho ipuella.

₁₁Ka hoo laba-labelang lipolelo tsa ka,

le li nyoreloe, 'me le tla be le rupetsoe.

₁₂Bohlale boa khanya,

bo ke ke ba fifala;

bo lumella ba bo ratang ho bo boha,

le ba bo batlang ho bo fumana.

₁₃Bo phakisa ho itsebisa

ho ba bo lakatsang.

₁₄Ea tsohellang ho bo batla

a ke ke a ba le bothata,

hobane o tla bo fumana

bo se bo mo luletse monyako.

₁₅Ho bea maikutlo holim'a bona

ke ho ba seli ka ho tlala;

ho bo falimehela ho ntša motho

ngongorehong kapele.

₁₆Bohlale ka sebele bo pota kahohle,

bo batla ba bo tšoanelang;

bo itlhahisa ka mosa ho batho bana

litseleng tsa bona,

'me bo ba khahlametsa

mererong eohle ea bona.

₁₇Qaleho ea Bohlale ke takatso ea 'nete

ea ho rupeloa ke bona;

ho batla ho rupeloa, ke ho bo rata;

₁₈ho bo rata, ke ho boloka

melao ea bona;

ho mamela melao ea bona,

ke ho tiisetsoa ho-se-shoe;

₁₉'me ho-se-shoe ho u atametsa

haufi le Molimo.

₂₀Ka tsela ena, takatso ea Bohlale

e isa boreneng.

₂₁Joale, haeba lona babusi ba lichaba

le thabela literone le mare a lona

a borena,

hlomphang Bohlale hore le tle le buse

ka ho sa eeng kae.

₂₂Ke tla le bolella

hore na Bohlale ke'ng,

le hore na bo bile teng joang,

ke sa le patele makunutu a bona.

Ke tla bo lokolisa ho fihlela qalehong

ea boteng ba bona,

ke pepese tsebo ea bona,

ke sa khelohe 'nete;

₂₃'me ha ke na ho jeoa ke mona

ha ke etsa joalo,

hobane mona le Bohlale

ha li kheme 'moho.

₂₄Bongata ba batho ba bohlale

ke pholoho ea lefatše,

'me khosi e seli ke katleho

ea sechaba sa eona.

₂₅Ka baka leo, amohelang

seo ke le rupelang sona

'me se tla le tsoela molemo.