Khosi e tšoana le motho e mong le e mong
1Le 'na ke motho ea shoang
joaloka bohle,
setloholo sa motho oa pele
ea ileng a boptjoa ka mobu.
2Popelong ea 'mè,
'mele oa ka oa boptjoa;
ka khoeli tse leshome,
ka bopeha maling a hae,
ka peo ea monna oa hae,
kopanelong ea bona ea likobo.
3Le 'na, hoba ke hlahe,
ka qala ho hema moea oa bohle;
ka fihla lefatšeng
le leng thata ho bohle,
'me joaloka bohle ka qala ka ho lla.
4Ka phutheloa ka masela,
ka holisoa 'me ka baballoa.
5Ha ho khosi e kileng ea simolla
bophelo ka mokhoa o mong;
6tsela e 'ngoe feela ho bohle
ea ho kena le ho tsoa bophelong.
Bohlokoa ba Bohlale
7Ka baka leo ka rapela,
'me ka fuoa kutloisiso;
ka ipiletsa ho Molimo,
'me moea oa Bohlale oa tla ho 'na.
8Ka bo rata ho feta mare a borena
le literone,
'me ka nka leruo e se letho
ha le bapisoa le bona.
9Ha kea bo lekanya
esita le lejoe la bohlokoahali,
hobane pel'a bona khauta eohle
ke lehlabathe,
'me silefera e ka seretse feela.
10Ka rata Bohlale ho feta bophelo
le botle,
ka bo rata ho feta leseli la letsatsi,
hobane khanya ea bona ha e fele.
11Tsohle tse molemo ka li tlisetsoa
ke Bohlale,
liatleng tsa bona bo ntšoaretse
maruo a se nang palo.
12Ka thabela tseo tsohle
hobane Bohlale bo li laola;
ke ne ke sa hlokomele hore ke bona
mohloli oa tsohle.
13Seo ke ithutileng sona
ka moea o se nang mano,
ke se arolelana le ba bang
ke sa siee letho,
ha ke rate ho ipolokela leruo
le tsoang ho Bohlale.
14Ke letlotlo le sa feleng ho batho,
'me ba le ruileng
e ba metsoalle ea Molimo,
ba amoheleha ho eena
ka baka la lineo tsa thupelo.
15Molimo a ke a mphe ho bua
ho ea ka thato ea hae,
ke be le maikutlo a lokelang
lineo tsa hae;
etsoe ke eena motataisi
esita le oa bona Bohlale,
le motsamaisi oa batho ba bohlale.
16Re matsohong a hae, rona ka borona,
lipolelo tsa rona,
kutloisiso le mahlale 'ohle a rona.
17Ke eena ea mphileng tsebo ea sebele
ea lintho kamoo li leng kateng;
o nthutile popeho
ea lihloliloeng tsohle,
le kamoo likarolo tsa tsohle
li sebetsang kateng:
18qaleho le qetello ea mehla
le bohare ba eona,
ho kena tlung ha letsatsi
le tlhahlamano ea linako tsa selemo,
19phikoloho ea lilemo
le boemo ba linaleli,
20sebopeho sa tse phelang
le litšekamelo tsa libata,
matla a meea le menahano ea batho,
mefuta-futa ea limela
le botlhare ba metso ea tsona.
21Ka ithuta tsohle,
tse patehileng le tse totobetseng,
hobane ke ile ka li rutoa ke Bohlale,
moqapi oa tseo tsohle.
Sebopeho sa Bohlale
22Bohlale bo na le moea oa kutloisiso
le oa khalalelo,
o mong feela empa o litšobotsi
li ngata-ngata, o chatsi,
oa chalametsa, o chabile, o hloka koli,
o hlakile, o ke ke oa senngoa,
o rata tse molemo, o chorile,
23ha o thijoe, oa fana, o rata batho,
o tiile, o tsepame, ha o tšoenyehe,
o matla 'ohle, o hlokomela tsohle,
o thophothela meea eohle,
e nang le kutloisiso 'me e hloekileng,
esita le e chatsi ka ho fetisisa.
24Efela Bohlale bo lebelo
ho feta lebelo ka bolona;
boa phunyeletsa,
bo bile bo thophothela tsohle
ka baka la ho hloeka ha bona.
25Ke mouoane o tsoang
matleng a Molimo,
ke khanya e hloekileng e tsoang
tlotleng ea Ea matla 'ohle;
ka hona ha ho letho le litšila
le ka itsoakanyang le bona.
26Bohlale ke ponahatso ea leseli
le sa feleng,
seipone se hlakileng se bontšang
tšebetso ea Molimo,
le setšoantšo sa molemo oa hae.
27Leha bo le inotši, bo ka etsa tsohle;
bo nchafatsa tsohle, bona bo sa fetohe.
Ka meloko le meloko bo kena
meeeng ea ba halalelang,
bo ba etsa metsoalle ea Molimo
le baporofeta,
28hobane ha ho ea ratoang ke Molimo
haese ea phelang le Bohlale.
29Bo botle ho feta letsatsi,
bo feta lihlopha tsohle tsa linaleli.
Ha bo bapisoa le leseli la letsatsi,
bo fumanoa bo le feta hole;
30hobane letsatsi le lateloa ke bosiu,
athe Bohlale ha bo ka ke ba hloloa
ke bobe.
