Eksodusi 17

₁Sonkhe sive sema-Israyeli satfutsa ehlane laseSini sachubachubeka, kwaya ngekuyalwa kwaso nguSimakadze. Semisa eRefidimu, kodvwa kwakute emanti ekunatsa. ₂Ngako-ke sive sasola Mosi satsi: “Siphe emanti ekunatsa.”

Mosi wabaphendvula watsi: “Ningilwiselani? Nimlingelani Simakadze?”

₃Kodvwa bantfu bomela emanti, bakhonona kuMosi batsi: “Yeyi wena! Wawusikhiphelani lena eGibhithe? Kantsi tsine nebantfwabetfu netifuyo tetfu wawusikhiphela kutsi utesibulala ngekoma la?”

₄Ngako-ke Mosi wakhala kuSimakadze watsi: “Ngitabatsini nje labantfu? Sebasezingeni lekutsi bangangigcoba ngematje nome ngangunini.”

₅Simakadze wakhuluma kuMosi watsi: “Tsatsa labanye bebaholi bema-Israyeli, uhambe nabo embikwebantfu. Ubophatsa indvuku yakho lowashaya ngayo umfula, iNayili. ₆Ngitakuma embikwakho edvwaleni leNtsaba iHorebe. Ubolishaya lelidvwala; emanti atawuphuma kulo, bese bantfu bayanatsa.” Mosi wenta njalo embikwebaholi bema-Israyeli.

₇Lendzawo wayetsa libito watsi “yiMasa neMeribha”, ngobe ema-Israyeli alwa, alinga Simakadze ngesikhatsi atsi: “Simakadze usenatsi yini nome cha?”

₈BaseseRefidimu, ema-Amaleki efika atewuhlasela ema-Israyeli. ₉Mosi wakhuluma kuJoshuwa watsi: “Sikhetsele emadvodza uhambe nawo uyekulwa nema-Amaleki. Mine ngitakwenyuka kusasa ngiye esicongweni seligcuma, ngiphetse indvuku Nkulunkulu langitjela kutsi ngiyiphatse.” ₁₀Joshuwa wavele wenta njengobe abetjelwe nguMosi, wahamba wayakulwa nema-Amaleki; Mosi wakhuphuka nabo-Aroni naHure, benyuka baya esicongweni seligcuma. ₁₁Abetsi Mosi nakaphakamise tandla takhe, ema-Israyeli ehlule ema-Amaleki, atsi nakatehlisa tandla takhe, ema-Amaleki ehlule ema-Israyeli. ₁₂Kodvwa yatsi imikhono yaMosi naseyidzinwa iba nensindze, bo-Aroni naHure bamletsela litje kutsi ahlale etikwalo, bona bamphakamisela imikhono yakhe lomunye ngakulomunye umkhono; ngako imikhono bayiphakamisa kwaze kwashona lilanga. ₁₃Joshuwa wancoba; wawashaya wawabhuca ngenkemba ema-Amaleki.

₁₄Simakadze wakhuluma kuMosi, watsi: “Kubhale phansi encwadzini loku kube ngumlandvo ngalemphi, kuze kube sikhumbuto. Utjele Joshuwa kutsi ema-Amaleki ngifuna kuwacotfula aphele nya emhlabeni.” ₁₅Mosi wakha lilati waletsa libito watsi: “Lolu luphawu lwewungincobela kwaSimakadze.” ₁₆Mosi wachubeka watsi: “Ngobe tandla taphakanyiselwa kuSimakadze wasipha kuncoba. Simakadze uyawuchubeka nekulwa nema-Amaleki titukulwane ngetitukulwane.”