Genesisi 14

₁Emakhosi lamane: Amrafeli, inkhosi yaseShinari, na-Ariyoki, inkhosi yase-Elasare, naKhedolawomere, inkhosi yase-Elamu, naThidali, inkhosi yetive, ₂ahloma ayawuhlasela lamanye emakhosi lasihlanu, lekwakuboBhera, inkhosi yaseSodoma, naBhisha, inkhosi yaseGomora, naShinabe, inkhosi yase-Adema, naShemebere, inkhosi yaseSeboyimu, nenkhosi yaseBhela, leyiSowari. ₃Onkhe lamakhosi ahlangana ndzawonye eTsafeni laseSidimu, lesekwaba Lwandle Lweluswayi. ₄Kwase kuphele iminyaka leli-12 baphansi kwenkhosi Khedolawomere; kepha emnyakeni weli-13 bamhlubuka. ₅Ngemnyaka weli-14 weta Khedolawomere nalamanye emakhosi labenawo, balwa behlula emaRefa e-Ashtherothe Khanayimu, nemaZuzi eHhamu, nema-Emi eShave Khiriyathayimu, ₆nemaHori entsabeni yawo iSeyiri, kwadzimate kwaba ngu-Eli Pharani ngasehlane. ₇Base bayancandzeka, beta e-Eni Mishpati leliyiKhadeshi, balicitsa lonkhe live lema-Amaleki, nelema-Amori labehlala eHasesoni Thamari.

₈Inkhosi yaseSodoma, neyaseGomora, neyase-Adema, neyaseSeboyimu, neyaseBhela leliyiSowari, ahloma aya kulelitsafa laseSidimu, ₉kuyakulwa nemakhosi boKhedolawomere wase-Elamu, naThidali inkhosi yetive, na-Amrafeli waseShinari, na-Ariyoki wase-Elasare. Emakhosi lamane alwa nemakhosi lasihlanu. ₁₀Litsafa laseSidimu laligcwele imigodzi yelitiyela. Ngesikhatsi emakhosi aseSodoma abaleka, agcumukela kulemigodzi, lamanye abalekela etintsabeni. ₁₁Ngako-ke lamakhosi lamane atitsatsa tonkhe timphahla taseSodoma netaseGomora nemiphako yawo yonkhe, ahamba. ₁₂Atsatsa naLoti labeyindvodzana yemnakabo-Abrama, njengobe abehlala eSodoma, naye bamtfumba kanye netimphahla takhe.

₁₃Lomunye waphunyuka wabaleka wayawubikela Abrama, umHebheru, labehlala ngasetihlahleni tema-okhi aMamre, um-Amori, umnakabo-Eshkoli na-Aneri. Bonkhe-ke laba bebabambisene na-Abrama. ₁₄Abrama watsi kube eve kutsi umntfwanemnakabo bamtfumbile, wabutsa emadvodza labetalelwe ekhaya lakhe labececeshelwe timphi. Asawonkhe abesangema-318. Abrama nalamadvodza wacosha lamakhosi lamane wadzimate wawefikisa ngakaDani. ₁₅Kwatsi ebusuku wahlelembisa libutfo lakhe ngeticheme talo. Wawahlasela wawehlula, wawacosha waze wawabeka eHoba, enyakatfo neDamaseko. ₁₆Watitsatsa tonkhe timphahla wabuya nato kanye naLoti netimphahla takhe nalabasikati kanye nalabanye labanyenti.

₁₇Abrama asabuya ekwehluleni Khedolawomere nalamanye emakhosi labenawo, inkhosi yaseSodoma yaphuma yaya kumhlangabeta eSigodzini saseShave, lekuSigodzi Senkhosi. ₁₈NaMelkhisedeki, inkhosi yaseSalema, leyayingumphristi waNkulunkulu Losetikwako Konkhe, yaletsa kuye sinkhwa neliwayini. ₁₉Melkhisedeki wabusisa Abrama watsi:

₂₁Inkhosi yaseSodoma yatsi ku-Abrama: “Buyisa bonkhe labantfu bami, wena utitsatsele letimphahla.”

₂₂Kodvwa Abrama watsi enkhosini yaseSodoma: “Ngiphakamisela sandla sami, ngifunga kuSimakadze Nkulunkulu Losetikwako Konkhe, uMdali welizulu nemhlaba, ₂₃kutsi ngingeke ngitsatse ngisho nelucotfo nome umchilo weticatfulo nome yini lekuyakho. Angifuni kutsi bese utsi: ‘Abrama ngimcebisile.’ ₂₄Kute lengitakutsatsa ngaphandle kwaloko lokudliwe ngulamadvodza akami, nesabelo salamadvodza bengihamba nawo: bo-Aneri, na-Eshkoli, naMamre. Abatsatse sabelo sabo.”