Genesisi 15

₁Emvakwaloko livi laSimakadze lefika ku-Abrama ngembono, latsi: “Abrama, ungesabi. Ngisihlangu sakho, umvuzo wakho utawuba mkhulu.”

₂Kodvwa Abrama watsi: “Awu, Simakadze Nkulunkulu, utangiphani, ngobe seloku anginamntfwana? Indlalifa yami kutawuba ngu-Eliyezeri waseDamaseko.” ₃Abrama wachubeka watsi: “Ase ubuke nje, awungiphanga ntalo, lesisebenti lesesitalelwe la endlini yami ngiso lesitawuba yindlalifa yami.”

₄Livi laSimakadze latsi kuye: “Lowo muntfu angeke abe yindlalifa yakho, kodvwa yindvodzana yakho, lephuma elukhalweni lwakho, letawuba yindlalifa yakho.” ₅Simakadze wamkhiphela ngaphandle watsi: “Buka etulu esibhakabhakeni ubale tinkhanyeti, nawungatibala.” Wachubeka watsi kuye: “Nentalo yakho-ke iyawuba ngako.”

₆Abrama wakholwa nguSimakadze; ngenca yaloko Simakadze wamemukela ngekutsi ulungile.

₇Watsi kuye: “NginguSimakadze lowakukhipa e-Uri yemaKhaledi, kutsi ngitekupha lelive libe lakho.”

₈Kepha Abrama watsi: “Nkhosi, Simakadze, ngitakwati ngani kutsi lelive litawuba ngelami?”

₉Wamphendvula watsi: “Ngiletsele sitfokati lesineminyaka lemitsatfu budzala, nembutikati leneminyaka lemitsatfu budzala, nesihhanca lesineminyaka lemitsatfu budzala, nelituba kanye nelizini lelivukutfu.” ₁₀Konkhe loku wakuletsa, wakujuba ekhatsi. Lolo nalolo lucetu walubeka macondzana nalolunye, kodvwa tinyoni akatijubanga. ₁₁Emangce ehlela etidvunjini, kepha Abrama wawacosha.

₁₂Latsi nalishonako lilanga, Abrama wehlelwa butfongo lobukhulu, walala; asalele wefikelwa luvalo nekwesaba lokukhulu. ₁₃Simakadze watsi ku-Abrama: “Yati ngempela kutsi situkulwane sakho siyawuba sihambi eveni lekungesilo laso; siyawuba sigcili sakulelo live, sigcilateke iminyaka lengema-400. ₁₄Kodvwa ngiyawusehlulela leso sive lesiyawube sigcilata lesitukulwane sakho; emvakwaloko lesitukulwane sakho siyawuphuma sesinetimphahla letinyenti. ₁₅Wena-ke utawukhula, ufe ngekuthula sewumdzala kakhulu, ungcwatjwe. ₁₆Lesitukulwane siyawuphindze sibuye lapha sesingesesine, ngobe bubi ba-Amori abukapheli.”

₁₇Kwatsi ngekushona kwelilanga sekumnyama, kwabonakala litiko lemlilo, nelilangabi lemlilo lendlula emkhatsini waletincetu. ₁₈Ngalo lelo langa Simakadze wenta sivumelwane na-Abrama, watsi: “Lelive ngilinika situkulwane sakho, kusukela emfuleni waseGibhithe kuze kufike emfuleni lomkhulu iYufrathe, ₁₉lekulive lemaKheni, nemaKhenizi, nemaKhadimoni, ₂₀nemaHethi, nemaPheresi, nemaRefa, ₂₁nema-Amori, nemaKhenani, nemaGirigashi, nemaJebhusi.”