Jobe 36

₂“Ngicela ungibeketelele kwesikhashana,

ngitakukhombisa kutsi kunyenti

lokusengashiwo ekumeleleni Nkulunkulu.

₃Lwati lwami ngilulomba khashane kabi,

ngitawubonakalisa kutsi Nkulunkulu,

uMdali wami, ulungile.

₄Cinisekani-ke kutsi emavi ami akasiwo emanga;

lapha embikwenu kume umuntfu lohlakaniphe ngempela.

₅“Nkulunkulu unemandla, kodvwa akabedzeleli bantfu;

unemandla, futsi ucinisekile kulenhloso yakhe.

₆Akabagcini lababi baphilile,

kodvwa labamphofu uyabanika emalungelo abo.

₇Emehlo akhe akawesusi kulabalungile,

ubabeka kanye nemakhosi etihlalweni tebukhosi,

abaphakamise kokuphela.

₈Kodvwa bantfu nababoshwe ngetinketane,

batsekeletwe ngetibopho tetinhlupheko,

₉uyaye abatjele kutsi yini labayentile,

kutsi bone kuye ngemabomu ngekutiphakamisa.

₁₀Ubenta batfobele kwelulekwa,

abayale kutsi baphendvuke ekoneni kwabo.

₁₁Nabalalela bamkhonte yena,

bayawuphila yonkhe imphilo yabo baphumelela

neminyaka yabo beneliseka.

₁₂Kodvwa nabangalaleli,

bayawubhubha ngenkemba,

bafe bangati nekwati.

₁₃“Labangamesabi Nkulunkulu bafukamela lulaka,

ngisho nome asababopha ngetinketane,

abakhali bacele lusito.

₁₄Bafa basebasha,

bafele emkhatsini wetingwadla letindvuna

letisetindlini tekukhontela tithico.

₁₅Kodvwa labo labahluphekako

uyabakhulula ekuhluphekeni kwabo,

ukhuluma kubo basetinhlungwini tabo.

₁₆“Nkulunkulu ukwephula emihlatsini yekukhatsateka,

ukubeka endzaweni lebanti

lengenako kubandzeteleka nome kwani,

akubeke ekunetsetekeni

uvele ngenhloko enaleni,

lapho ungakhetsa lokutsandzako khona.

₁₇Kodvwa manje sewetfwele sigwebo,

lesifanele lababi,

sigwebo nemtsetfocotfo sekukubambile.

₁₈Caphela kutsi kubete lokuhuha ngebunjinga,

ungavumi kwedukiswa tinsambansamba temidizo.

₁₉Emandla akho kanye nebunjinga bakho

kungakugcina yini ekutseni ungakhatsateki?

₂₀Ungabukhaleli busuku kutsi buyawufika nini,

sikhatsi lapho tive tonkhe tiyawubhubha tiphele.

₂₁Caphela ungagucukeli kulokubi,

kona lokubonakala shangatsi uyakunconota kunekuhlupheka.

₂₂“Nkulunkulu uphakeme emandleni akhe,

ngubani nje lofundzisa njengaye?

₂₃Ukhona yini lowake watjela Nkulunkulu

kutsi kufanele enteni,

nome-ke atsi: ‘Wonile’?

₂₄Khumbula-ke nawe kudvumisa imisebenti yakhe,

njengaloku bantfu bahlala bahlabela ngetindvumiso.

₂₅Bonkhe bantfu bemhlaba bakubonile loko,

bantfu bakugolotela ngemehlo bakhashane.

₂₆Maye, mkhulu Nkulunkulu!

Bukhulu bakhe bungetulu kwekucondza kwetfu.

Bunyenti beminyaka yakhe

bungetulu kwekubala kwemuntfu.

₂₇“Ukha ematfonsi emanti,

acengeke abe yimvula leyehlela emifudlaneni.

₂₈Emafu atfululela emhlabatsini ematfonsi awo,

tihlambi tetimvula tehlele etikwebantfwana bebantfu.

₂₉Ngubani nje longacondzisisa

kutsi uwendlala kanjani emafu?

Udvuma kanjani nje endzaweni yakhe yekuhlala?

₃₀Ase ubuke nje kutsi

uyisakata kanjani imibane yakhe emaceleni akhe,

nekutsi ukucwilisa kanjani kujula kwetilwandle.

₃₁Nguleyo ndlela-ke labusa ngayo tive,

atinike inala yekudla.

₃₂Ugcwalisa tandla takhe ngembane,

bese uyawutjela kutsi awubaneke.

₃₃Kudvuma kwakhe ngelitulu

kumemetela kuta kwesihhuhhula semvula,

ngobe ngisho netinkhomo tiyakumemetela kuta kwalo.”