Jobe 35

₂“Usho kutsi kambe ngabe loku kulungile?

Utsi: ‘Ngiyawuhlangulwa nguNkulunkulu.’

₃Kodvwa uyambuta utsi:

‘Kutangisita ngani mine loko,

kona mine ngitfolani ngekuhlala ngingoni?’

₄“Ngitsandza kukuphendvula kuloko,

wena nalabangani bakho abakanye nawe.

₅Gucukela ngasemazulwini ubuke,

bheka ngasemafini wona lasetulu kangaka kuwe.

₆Nangabe wona wena,

loko kumtsintsa ngani yena?

Nangabe tono takho titinyenti,

loko kumentani yena?

₇Nangabe ulungile, uletsani kuye,

nome-ke utfolani yena esandleni sakho?

₈Bubi bakho buhlupha umuntfu lonjengawe,

nekulunga kwakho kutsintsana nebantfu bemhlaba.

₉“Bantfu bakhala bumayemaye

ngaphansi kwemtfwalo wekucindzetelwa,

bancusa kukhululwa kuwo umkhono walabanemandla.

₁₀Kodvwa kute lotsi:

‘Uphi Nkulunkulu, uMdali wami,

lowephana ngetingoma ebusuku,

₁₁losifundzisa lokunyenti tsine kunetilwane temhlaba,

asente sihlakaniphe kakhulu

kunetinyoni letindiza emoyeni?’

₁₂Akaphendvuli bantfu nabakhala

ngenca yekutiphakamisa kwalababi.

₁₃Liciniso, Nkulunkulu akayilaleli

imibhedvo yetikhalo tabo.

Somandla akatinaki, njengobe tilite nje.

₁₄Kangakanani-ke kutsi angalalela,

nawutsi awumboni yena,

kutsi nome licala lakho lisembikwakhe,

wena kufanele ulindzele yena,

₁₅ngetulu kwaloko, kutsi lulaka lwakhe alujezisani,

futsi akanaki lutfo nalolu twi lwalokubi.

₁₆Ngako-ke Jobe ukhuluma umbhedvo wodvwa nje;

ulibala kutsakuta lite nje lodvwa,

kodvwa abe angenalwati.”