Mikha 5

₁Bantfu baseJerusalema,

butsanani ndzawonye!

Sesivinjetelwe!

Sebahlasela umholi waka-Israyeli!

“Betlehema Efratha,

nome ungulomunye wemiti lemincane yakaJuda,

kodvwa ngiyawuveta kuwe umbusi

loyawubusa sive saka-Israyeli.

Lusendvo lwakhe luyawusukela kulolo

lwaluvele lukhona kwasekucaleni.”

₃Ngako Simakadze lesive sakhe

uyawusiyekelela etitseni taso,

kuze kufike sikhatsi sekutalwa kwendvodzana.

Kuyawutsi bonkhe bakubo,

labayawube basakatekile batfumbeka,

bahlanganiselwe ndzawonye babe sive sinye.

₄Nakefika lowo mbusi,

uyawubelusa ngemandla aSimakadze,

yebo, uyawubaphatsa ngebukhosi baSimakadze

longuNkulunkulu wakhe.

Sive sakhe siyawuphila ngekuphepha,

ngobe bantfu bemhlaba

bayawumatisa badvumise bukhulu bakhe.

₅Uyawuba kuthula kwaso.

Ngesikhatsi ema-Asiriya

avimbetela live letfu

afohla tinqaba tetfu,

tsine, ma-Israyeli,

siyawutfumela baholi betfu

labanemandla kakhulu bayekulwa nawo.

₆Bayakuyehlula bayincobe i-Asiriya,

lekulive laNimrodi;

yebo, bayakuyibusa ngemkhonto.

Ngalendlela siyakuphephiswa

kuma-Asiriya, nakahlasela live letfu.

₇Ema-Israyeli layawusindza

ayawufanana nematolo lahlumelelisako

latfunyelwe nguSimakadze etiveni letinyenti,

afanane nemvula lenetsa lokumilako.

Ayawuncika kuNkulunkulu, hhayi kumuntfu.

₈Insali yema-Israyeli

iyakubasemkhatsini wetive letinyenti,

ifanane nelibhubesi lelitingela ehlatsini

noma edlelweni:

Lisuka lingene emkhatsini wetimvu,

litisukele litidzabudzabule ticucwana,

litsemba lato lekusindza lingabikho.

₉Israyeli,

titsa takho uyakutiphakamisela sandla utincobe,

bonkhe labakutondzako bayawubhujiswa.

“Ngaleso sikhatsi ngiyakubulala emahhashi akho,

ngibhubhise tincola nemahhashi ato.

₁₁Ngiyawubhubhisa emadolobha elive lakho,

ngidzilite tonkhe tinqaba takho.

₁₂Ngiyakuyicitsa

yonkhe imilingo yakho loyisebentisako,

ngikushiye ute netangoma.

₁₃Ngiyawubhidlita tithico takho

kanye netinsika tato tematje langcwele.

Ungeke uphindze utikhonte

letintfo letibatwe nguwe matfupha.

₁₄Ngiyawudzephuna tonkhe tinsika

tesithicokati lesingu-Ashera eveni lakho,

ngibhidlite emadolobha akho.

₁₅Ngekutfukutsela kwami lokukhulu

ngiyakutenanela etiveni tonkhe

letingazange tingilalele.”