Mikha 6

₁Lalelani kutsi Simakadze

umbeka cala lini Israyeli:

“Sukuma, Simakadze,

usho licala lombeka lona Israyeli.

Tintsaba nemagcuma akakuve kutsi utsini,

akabe bofakazi.

₂Nine tintsaba,

nani tisekelo taphakadze temhlaba

lalelani licala lelibekwa nguSimakadze!

Simakadze ubeka sive sakhe licala.

Utsi sive sakhe, lesingu-Israyeli, sinelicala.”

“Sive sami, ngenteni kini?

Nginetfwese mtfwalo muni?

Ngiphendvuleni.

₄Nganikhipha eGibhithe;

nganikhipha ebugcilini,

ngatfumela boMosi na-Aroni,

naMiriyamu kutsi banihole.

₅Sive sami,

khumbulani inkhosi Bhalaki waseMowabi

kutsi abefuna kwentani kini;

nikhumbule nekutsi Bhalamu,

umsa waBheyori, wamphendvula kanjani.

Khumbulani konkhe lokwanehlela endleleni

nisuka emathendeni aseShithimu

niya eGilgali.

Khumbulani yonkhe imisebenti yaSimakadze,

khona-ke nitabe seniyabona

kutsi ngatihlupha kanganani kuze nginisindzise.”

₆Ngiyawuletsani mine kuSimakadze,

Nkulunkulu wemazulu, nangitemkhonta?

Ngiyawuletsa emazinyane lamnyaka munye

abe ngumnikelo wekushiswa kuye yini?

₇Kungabe Simakadze uyawujabula yini,

nangimletsela tinkhulungwane tetimvu

nome imifula lengancamuki yemafutsa emncumo?

Ngifanele yini kunikela kuye ngelitubulo lami,

lekusitselo semtimba wami,

kutsi libe yinhlawulo yetono tami?

₈Cha, Simakadze usitjelile lokungukona kukuhle.

Lakufunako kitsi ngunaku:

Ufuna sente kulunga, siphatsane ngemusa,

siphilele Nkulunkulu ngentfobeko.

₉Kuhlakanipha kumesaba Simakadze.

Uyamemeta edolobheni utsi:

“Lalelani nine bantfu lenibutsana edolobheni!

₁₀Etindlini talababi

kugcwele umcebo labawutfola ngebubi.

Basebentisa tikali ngebucili,

lekunguyonantfo lengiyitondzako.

₁₁“Ngingabatsetselela kanjani

bantfu labasebentisa tikali ngebucili

netisindvo letiphambene nemtsetfo?

₁₂“Bantfu bakini

labatinjinga baphanga laba labamphofu,

nani nonkhe ningulabacalemanga nalabakhohlisanako.

₁₃Manje sengicalile kunigulisa

nginibhubhise ngenca yekona kwenu.

₁₄Niyawudla kudla, kodvwa ningesutsi;

empeleni, niyawuchubeka nilambe.

Niyawutibekela tivuno,

kodvwa aniyiwukhona konga.

Konkhe lenikongako ngiyawukucedza ngemphi.

₁₅“Niyawuhlanyela, kodvwa aniyiwuvuna.

Niyawuhluta emafutsa etitselweni tawo,

kodvwa aniyikuwasebentisa.

Niyawuphisa liwayini, kodvwa ningalinatsi.

₁₆Loko kuyakwenteka,

ngobe nilandzele imikhuba lemibi yenkhosi Omri

nendvodzana yakhe Ahabi.

Nichubeke nalandzela imitsetfo yabo,

ngaloko-ke ngiyawunibhubhisa;

bonkhe bantfu bayawunibukela phansi.

Bantfu yonkhe indzawo bayawunedzelela ngendzelelo.”