Sihlabelelo 83

₁Awu, Nkulunkulu!

Ungathuli, utente simungulu.

Ungatsalalisi, Nkulunkulu.

₂Ase ubuke nje,

titsa takho tiyaphitsitela,

nalabo labakutondzako bayakucoloshela.

₃Benta sigungu,

bahlangane ngebantfu bakho,

bafakane imilomo

ngalabo labeluswe nguwe.

₄Batsi: “Wotani sibacotfule

bangabe basaba ngiso sive,

kuze libito laka-Israyeli

lingaphindze likhunjulwe.”

₅Bacebisana ngawe nganhlitiyo yinye,

bente sivumelwane ngawe.

₆Kuhlangene bonkhe baka-Edomu

labasemathendeni,

nebaka-Ishmayeli,

nebakaMowabi, nebakaHagari,

₇nebakaGebali, nebaka-Amoni,

nebaka-Amaleki, nemaFilisti,

kanye netakhamiti taseThire.

₈Ngisho nebase-Asiriya

bahlangene kanye nabo,

babalekeleli bebatukulu baLoti. Cabanga.

₉Baphatse ngesandla

lowaphatsa ngaso emaMidiyani,

naSisera, naJabini

ngasemfuleni iKhishoni,

₁₀labo lababhubha ngasemtini wase-Eni Dori;

bawa njengebulongo,

babola baze baba ngumcuba.

₁₁Emakhosana abo wente

abe njengabo-Orebi naZebi,

babusi babe njengaboZeba naSalmuna.

₁₂Batsi: “Asidle lelive libe lifa letfu,

lelive lelingemadlelo aNkulunkulu!”

₁₃Awu, Nkulunkulu wami!

Bente babe njengesiwunguwungwana,

nanjengemakhoba wona apheshulwa ngumoya.

₁₄Njengemlilo ushisa lihlatsi,

nanjengemalangabi ababela tintsaba,

₁₅nawe badvungulule ngesivunguvungu sakho,

ubetfuse ngesiphepho sakho.

₁₆Yebo, Simakadze!

Tsela buso babo ngelihlazo,

badzimate balifune libito lakho.

₁₇Shangatsi bangahlazeka baphele emandla

kuze kube phakadze,

shangatsi bangehluleka babhubhe.

₁₈Shangatsi bangati kutsi nguwe wedvwa

lolibito lakhe linguSimakadze,

nguwe Losetikwako Konkhe,

lophakeme abuse umhlaba wonkhe.