Ta miti ya Valevhi.
1Yehovha a byela Muxe emabanyini ya Mowabu, ekusuhi na Yordani, na Yeriko, a ku: 2“Lerisa vana va Israele leswaku va nyika Valevhi, endzhakeni leyi nga ta va ya vona, miti ya ku aka eka yona; mi ta nyika Valevhi ni matikwana ematlhelweni ya miti leyi. 3Va ta aka emitini kutani matikwana ma ta va ya tihomu ta vona, ni ya rifuwo ra vona, ni ya swifuwo hinkwaswo swa vona. 4Matikwana ya miti leyi mi nga ta nyika Valevhi, ma ta va ya swisungunhu swa khume ra madzana, ematlhelweni hinkwawo, ku suka erirhangwini ra muti. 5Mi ta pima ehandle ka muti swisungunhu swa 2 000 evuxeni, ni swisungunhu swa 2 000 edzongeni, ni swisungunhu swa 2 000 evupeladyambu, ni swisungunhu swa 2 000 en'walungwini, muti wu va exikarhi; hi wona masimu ya miti ya vona.
6“Exikarhi ka miti leyi mi nga ta nyika Valevhi, ku ta va ni miti ya ntlhanu na wun'we ya xichavelo, leswaku mudlayi a ta tiva ku ya chavela kona; mi ta va nyika miti yin'wana ya 42. 7Miti hinkwayo leyi mi nga ta nyika Valevhi, yi ta va ya 48, yi ri ni matikwana ya yona. 8Loko yi ri miti leyi mi nga ta teka endzhakeni ya Vaisraele ku va nyika, mi ta teka leyo tala eka loyi a nga ni leyo tala, kambe mi ta teka leyi nga talangiki eka loyi a nga ni leyi nga talangiki; un'wana ni un'wana u ta nyika Valevhi miti ya yena hi mpimo wa ndzhaka leyi a yi amukeleke.”
Ta miti ya vuchavelo. Ta murihiseri wa ngati.
9Yehovha a byela Muxe, a ku: 10“Byela vana va Israele, u ku eka vona: ‘Kutakuloko mi perile Yordani, mi nghenile etikweni ra Kanana, 11mi ta tihlawulela miti leyi nga ta va miti ya vuchavelo eka n'wina, mudlayi la dlayeke munhu, ku nga ri ha vomu, u ta tiva ku ya chavela kona. 12Miti leyi, yi ta mi pfuna hikwalaho ka murihiseri, leswaku mudlayi a nga tshuki a fa, a nga si humelela eku avanyiseni, emahlweni ka nhlengeletano. 13Exikarhi ka miti leyi mi nga ta yi nyika Valevhi, miti ya 6 yi ta va miti ya vuchavelo. 14Mi ta nyika miti minharhu ehase ka Yordani, ni miti minharhu etikweni ra Kanana: Yi ta va miti ya vuchavelo. 15Miti leyi ya 6 swi ta va swichavelo swa vana va Israele, ni swa muluveri la akeke exikarhi ka vona leswaku mani na mani la dlayeke munhu, ku nga ri ha vomu, a ta tiva ku chavela kona.
16“ ‘Kungakuloko a n'wi bile hi nsimbhi, kutani a fa, i mudlayi: mudlayi u ta dlawa. 17Loko a n'wi bile hi ribye leri munhu a nga dlayiwaka ha rona, kutani a fa; i mudlayi: mudlayi u ta dlawa. 18Kutakuloko u n'wi bile hi mbhinyi lowu munhu a nga dlayiwaka ha wona, kutani a fa, i mudlayi: mudlayi u ta dlawa. 19Murihisi u ta dlaya mudlayi; kutakuloko a hlangana na yena, u ta n'wi dlaya. 20Kungakuloko munhu a susumeta warikwavo hi rivengo, kumbe loko a n'wi hoxe xilo ha vomu, kutani a fa, 21kumbe loko a n'wi bile hi voko hi ku vengana, kutani a fa, la n'wi beke, u ta dlawa, i mudlayi: murihisi u ta dlaya mudlayi loko a hlangana na yena.
22“ ‘Kambe loko a n'wi susumetile ntsena, ku nga ri hi rivengo, kumbe loko a n'wi hoxele xilo ku nga ri ha vomu; 23hambiloko a wisile ehenhla ka yena, a nga n'wi voni, ribye leri munhu a nga dlayiwaka ha rona, kutani a fa, a nga ri nala wa yena, a nga n'wi lavelanga ni swo biha, 24nhlengeletano yi ta avanyisa exikarhi ka loyi a n'wi beke ni murihisi, hi milawu leyi. 25Nhlengeletano yi ta kutsula mudlayi evokweni ra murihisi, yi ta n'wi tlherisela emutini wa xichavelo laha a chaveleke kona. U ta tshama kona ku ko ku fika rifu ra muprista lonkulu, la cheriweke hi mafurha lama hlawulekeke. 26Kambe loko mudlayi a tlula endzilakaneni wa muti wa xichavelo xa yena, 27ni loko murihisi a n'wi kuma ehandle ka mindzilekana ya miti ya vuchavelo xa yena, ni loko a dlaya mudlayi, a nga na nandzu wa mudlayi. 28Hikuva mudlayi a fanele ku tshama emutini wa xichavelo ku ko ku fika rifu ra muprista lonkulu; kutakuloko muprista lonkulu a file, u ta tlhelela etikweni leri ndzhaka ya yena yi nga eka rona. 29Wu ta va eka n'wina nawu wa leswi lulameke etinxakeni ta tinxaka, hinkwako laha mi nga ta aka kona.
30“ ‘Kungakuloko ku dlayiwile munhu, va ta dlaya mudlayi, ku ri loko ku yingisiwile milomu ya timbhoni. Mbhoni yin'we yi nga ka yi nga ringani ku dlayisa munhu.
31“ ‘Mi nga tshuki mi amukela ntsengo wa vutomi bya mudlayi la fanelaka ku dlayiwa, hikuva u ta dlawa kunene. 32Mi nga tshuki mi amukela ntsengo leswaku la balekeke emutini wa xichavelo xa yena, a tiva ku tlhelela etikweni ra rikwavo, muprista a nga si fa. 33Mi nga tshuki mi onha tiko leri mi nga eka rona, hikuva ngati yi onha tiko; hikuva a ku na mhamba yin'wana ya ngati leyi halatiweke, loko yi nga ri ngati ya loyi a yi halateke. 34Mi nga tshuki mi onha tiko leri mi nga ta aka eka rona, laha ndzi akeke kona; hikuva hi mina Yehovha la akeke exikarhi ka vana va Israele.’ ”
