Lavo lulama va ta katekisiwa ni la emisaveni.
Ya Davhida.
1U nga tshuki u karihela lavo homboloka,
U nga tshuki u navela lava endlaka leswo biha.
2Hikuva va ta tsemiwa sweswi kukotisa byanyi,
Va ta vuna kukotisa rihlaza.
3Tshemba Yehovha, u endla leswo lulama,
U aka etikweni, u xurha vunene.
4Tsakela Yehovha,
Kutani u ta ku nyika leswi naveriwaka hi mbilu ya wena.
5Tshikela Yehovha ndlela ya wena, u n'wi tshemba,
Kutani yena u ta tirha.
6U ta humesa ku lulama ka wena kukota ku vonakala,
Ni ku tenga ka wena kukotisa nhlekanhi.
7Miyela emahlweni ka Yehovha, u langutela yena;
U nga kariheli munhu la katekeke endleleni ya yena,
La hetisaka makungu layo biha ya yena.
8Tshika ku kariha, u fularhela ku leva;
U nga hlundzuki, swi nga ku dyohisa ntsena,
9Hikuva lavo biha va ta susiwa,
Kambe lava tshembaka Yehovha va ta fuma misava.
10Ku sele nkarhinyana,
kutani lowo biha a nga ka a nga ha vi kona;
U ta lavisisa xivandla xa yena,
kutani u ta va a nga ha ri kona.
11Va musa va ta fuma misava,
Va ta titsakela eku rhuleni lokukulu ka vona.
12Lowo biha u kanelela lowo lulama swo biha,
U n'wi getselela meno.
13Kambe hosi ya n'wi hleka,
Hikuva yi vona leswaku siku ra yena ri kusuhi.
14Lavo homboloka va hlomula tlhari, va konga vurha,
Ku wisa ehansi la nga enhlomulweni ni xisiwana,
Ni ku dlaya lava fambaka hi ndlela ya ku lulama.
15Matlhari ya vona ma ta tlhava timbilu ta vona;
Mavurha ya vona ma ta tshoveka.
16Lexitsongo xa la lulameke
Xi tlula ndzalo ya lavo homboloka va ku tala.
17Hikuva mavoko ya lavo homboloka ma ta tshoveka,
Kambe Yehovha u tiyisa lava lulameke.
18Yehovha u tiva masiku ya vanhu vo lulama,
Ndzhaka ya vona yi ta sala hi masiku.
19Va nga ka va nga vi na tingana enkarhini wa mahlomulo,
Kambe va ta xurha emasikwini ya ndlala.
20Hikuva lavo homboloka va ta lova,
Ni lava vengaka Yehovha va ta hela kukotisa rihlaza,
Va ta tlhaka kukotisa musi.
21Lowo biha wa lomba, kambe a nga tlherisi;
La lulameke u twela vanhu vusiwana, wa hanana.
22Hikuva lava Xikwembu xi va katekisaka, va ta dya ndzhaka ya misava;
Kambe lava xi va rhuketelaka,
va ta susiwa.
23Yehovha u tiyisa mikondzo ya munhu lonene,
Kutani u tsakisiwa hi ndlela ya yena.
24Loko a khunguvanyeka, a nga ka a nga weri makumu,
Hikuva Yehovha u n'wi khomile hi voko.
25A ndzi ri lontshwa, kutani ndzi dyuharile,
Kambe a ndzi vonanga la lulameke a tshikiwa,
Ni vana va yena va kombele vuswa bya vona.
26U ni tintswalo hi masiku hinkwawo a va a lomba,
Kutani vatukulu va yena va katekile.
27Fularhela swo biha, u endla leswinene,
Kutani u ta tshama hi laha ku nga heriki.
28Hikuva Yehovha u rhandza ku lulama,
A nga ka a nga tshiki lava n'wi rhandzaka,
Va hlayisiwa hi masiku.
Kambe vana va lavo biha va ta herisiwa.
29Lavo lulama va ta fuma misava,
Va ta tshama ka yona hi masiku.
30Nomu wa la lulameke wu humesa vutlhari,
Ririmi ra yena ri vula leswo lulama.
31Nawu wa Xikwembu xa yena wu le mbilwini ya yena;
Mikondzo ya yena a yi tsekatseki.
32Lowo biha u rindza la lulameke,
U lava ku n'wi dlaya;
33Kambe Yehovha a nga ka a nga n'wi tshiki emavokweni ya yena,
A nga ka a nga n'wi wisi loko a ta avanyisiwa.
34Tshemba Yehovha, u hlayisa ndlela ya yena,
U ta ku kurisa leswaku u fuma misava;
Kambe u ta vona ku herisiwa ka lavo biha.
35Ndzi vonile lowo biha la chavisaka,
A nava kukotisa murhi lowu hlukeke ngopfu;
36Kambe u hundzile, kutani, vonani, a nga ha ri kona,
Ndzi n'wi lavile, kambe a ndzi n'wi kumanga.
37Xiya la tengeke, u languta la lulameke;
Hikuva munhu wa ku rhula u ni vatukulu;
38Kambe valandzuri va ta hela hinkwavo,
Rixaka ra lavo biha ri ta herisiwa.
39Ku hlayiseka ka lavo lulama ku huma eka Yehovha!
I khokholo ra vona enkarhini wa mahlomulo.
40Yehovha wa va pfuna, wa va kutsula;
U va kutsula eka lavo biha, wa va hlayisa,
Hikuva va chaverile eka yena.
