TIPISALEMA 38

₁Yehovha, u nga ndzi bi eku kariheni ka wena,

U nga ndzi layi eku holoveni ka wena.

₂Hikuva miseve ya wena yi ndzi tlhavile,

Voko ra wena ri ndzi tikela ngopfu.

₃Ku hanya a ku kona enyameni ya mina hikwalaho ka vukari bya wena.

Ku rhula a ku kona emarhambyini ya mina hikwalaho ka xidyoho xa mina.

₄Hikuva ku homboloka ka mina ku tlule nhloko ya mina;

Ku ndzi hlula hi ku tika kukotisa ndzhwalo lowu tikaka ngopfu.

₅Swilondza swa mina swa nun'hwa, swi ni vuvopfu,

Hikwalaho ka vuphukuphuku bya mina.

₆Ndzi lamele, ndzi vaviseka ngopfu,

Siku hinkwaro ndzi famba hi nkosi.

₇Hikuva xifungha xa mina xi tshwa hi ndzilo,

Ku hanya a ku kona enyameni ya mina.

₈Ndzi heleriwe hi matimba, ndzi tshovatshoviwile ngopfu;

Ndzi rila hikwalaho ka ku tsekatseka ka mbilu ya mina.

₉Hosi, ku navela hinkwako ka mina ku le mahlweni eka wena,

Ni mahika ya nga a ma tumbelanga ka wena.

₁₀Mbilu ya mina ya tlulatlula, matimba ya mina ma ndzi sukela;

Ni ku vonakala ka mahlo ya mina a ka ha ri na mina.

₁₁Vanakulorhi ni maxaka ya mina

va yimela ekule ni mbanga ya mina,

Vamakwerhu va yima hitlhelo.

₁₂Lava lavaka vutomi bya mina va ndzi rhiyela mitlhamu;

Lava ndzi lavelaka swo biha, va vulavula swa lunya,

Va anakanya ku kanganyisa siku hinkwaro.

₁₃Kambe mina ndzi kotisa wo fa tindleve, a ndzi twi nchumu;

Ndzi fana ni mbheveve la nga ahlamisiki nomu wa yena.

₁₄Kunene ndzi fana ni munhu la nga twiki nchumu,

La nga riki na ku hlamula enon'wini wa yena.

₁₅Kambe ndzi tshembile wena Yehovha;

U ta hlamula, wena Hosi, Xikwembu xa mina.

₁₆Hikuva ndzi te: “Va nga tshuki va titsakela ha mina,

Va nga tshuki va tikurisa ehenhla ka mina loko nenge wa nga wu rhetemuka.”

₁₇Hikuva ndzi lava ku wa,

Kutani ku vaviseka ka mina ku le mahlweni ka mina hi masiku.

₁₈Hikuva ndzi vula ku dyoha ka mina,

Ndzi vaviseka hikwalaho ka ku homboloka ka mina.

₁₉Kambe valala va mina va hanya va ni matimba;

Lava ndzi vengaka ntsena va tele.

₂₀Va ndzi tlherisela swo biha ematshan'weni ya leswinene;

Va ndzi pfuka hikuva ndzi landza leswinene.

₂₁U nga tshuki u ndzi fularhela, Yehovha!

Xikwembu xanga! U nga tshami ekule na mina!

₂₂Hatlisa u ndzi pfuna,

Hosi, wena loyi u nga ku hlayiseka ka mina!