Tintswalo ta Xikwembu ti tlula vutomi.
Pisalema ya Davhida, ra siku leri ngi a ri mananga ya Yuda.
1Oho Xikwembu!
U Xikwembu xanga, ndza ku lava,
Moya wanga wu ni torha ra wena, nyama ya mina yi ku navela hi mahika,
Etikweni leri ra ku oma, ra mananga leri nga riki na mati.
2Ndzi ta ku hlalela evukwetsimelweni,
Ndzi ta vona matimba ya wena ni ku kwetsima ka wena.
3Hikuva tintswalo ta wena ti tlula ku hanya.
Milomu ya mina yi ta ku twarisa.
4Hikwalaho ndzi ta ku khensa eku hanyeni ka mina,
Ndzi ta yimisa mavoko ya mina hi vito ra wena.
5Moya wanga wu ta xurha swange i mongo ni mafurha.
Kutani nomu wa mina wu ta ku twarisa hi marito ya ku tsaka.
6Loko ndzi ku tsundzuka ndzi ri ebyetlelweni bya mina,
Ndzi anakanya ta wena hi mikarhi ya vusiku.
7Hikuva u mupfuni wa mina,
Ndzi ta yimbelela, hi ku tsaka endzhutini wa timpapa ta wena.
8Moya wa mina wu namarhela wena ku ku landza,
Voko ra xinene ra wena ri ndzi seketela.
9Kambe lava lavaka ku susa vutomi bya mina,
Va ta xikela ehansi, endzeni ka misava;
10Va ta nyiketiwa evukarini bya matlhari.
Va ta va swakudya swa timhisi.
11Kambe hosi yi ta titsakela eka Xikwembu;
Un'wana ni un'wana la hlambanyaka ha xona u ta tidzunisa,
Hikuva nomu wa lava hembaka wu ta siviwa.
