Hosi ya ku lulama; ku twala ka ku fuma ka yona.
Pisalema ya Solomoni.
1Oho Xikwembu!
Nyika hosi swiavanyiso swa wena,
Ni ku lulama ka wena eka n'wana wa hosi,
2U ta avanyisa tiko ra wena hi ku lulama,
Ni va wena lava xanisekaka, u ta va avanyisa hi mfanelo.
3Tintshava ti ta vuyisa ku rhula eka vanhu,
Ni switsunga mikarhi ya ku lulama.
4Yi ta avanyisa timhaka ta swisiwana swa tiko hi ku lulama,
Yi ta ponisa vana va mupfumari,
Kambe yi ta phyandlasa muxanisi.
5Va ta ku chava loko dyambu ni n'weti swa ha ri kona,
Etinxakeni ta tinxaka.
6Yi ta fana ni mpfula loko yi na emadyelweni,
Yi kotisa mberha leyinene leyi tsakamisaka misava.
7Emasikwini ya yona, lowo lulama u ta hluka;
Ni ku rhula ku ta andza, n'weti wu ko wu nga ha ri kona.
8Yi ta fuma ku sukela elwandle rin'wana ku ya fika eka rin'wana,
Ni ku sukela enambyeni, ku ya fika emakun'wini ya misava.
9Lava tshamaka emananga va ta khinsama emahlweni ka yona,
Ni valala va yona va ta nantswa ntshuri.
10Tihosi ta le Tarxixi ni ta swihlale ti ta tisa ndzuvo,
Tihosi ta le Xeba ni ta Seba ti ta humesa tinyiko;
11Tihosi hinkwato ti ta khinsama emahlweni ka yona,
Matiko hinkwawo ma ta yi tirhela.
12Hikuva yi ta tshunxa xisiwana loko xi huwelela,
Ni la nga enhlomulweni, la nga riki na mupfuni.
13Yi ta tsetselela xisiwana ni la nga ekhombyeni,
Kutani yi ta kutsula vutomi bya swisiwana.
14Yi ta kutsula mimoya ya vona eku xanisiweni ni le ku vutleriweni,
Ngati ya vona yi ta va ni risima emahlweni ka vona.
15Vona va ta hanya, va ta yi nyika nsuku wa Xeba;
Va ta yi khongelela hi mikarhi hinkwayo, ni ku yi katekisa hi masiku.
16Ku ta va ni ndzalo ya koro la emisaveni ni le tihlohlorini ta tintshava,
Mitshetsho ya rona yi ta hlakahla kukotisa mirhi ya Lebanoni;
Lava akeke emitini va ta rhumbuka kukotisa byanyi bya misava.
17Vito ra yona ri ta tshama hi laha ku nga heriki,
Vito ra yona ri ta va kona hi laha dyambu ri nga ta va kona.
Vanhu va ta katekisana ha yona,
Matiko hinkwawo ma ta yi vula la katekeke.
18A ku khensiwe Yehovha, Xikwembu xa Israele,
La endlaka swihlamariso a ri swakwe!
19A ku khensiwe vito ra yena ra ku kwetsima!
Misava hinkwayo a yi tatiwe hi ku twala ka yena. Amen! Ina! Amen!
20Swikhongelo swa Davhida, n'wana Yese, swi herile kutani.
