Pisalema ya 129

₁Vaisraele a va vule va ku:

“Valala va hi xanisile ngopfu ku sukela khale;

₂va hi xanisile ku tlula mpimo hakunene,

kambe a va hi hlulanga.

₃Va hi bile va hi handzulela minhlana,

onge va le ku rimeni ka nsimu!

₄Kambe HOSI Xikwembu xa tshembeka:

Xi tsemile tintambhu leti lavo homboloka a va hi bohile ha tona.”

₅Hinkwavo lava vengaka muti va Siyoni

a va khomiwe hi tingana va hlongoriwa.

₆A va fane ni byanyi lebyi milaka elwangwini,

lebyi vunaka byi nga si vupfa:

₇Lava va byi kutlaka va nge kumi nchumu,

ni kenya rinene ri nge humi kona.

₈Hambi va ri vahundzi va ndlela,

va nga tshuki va va navelela minkateko ya HOSI

kumbe ku va katekisa hi vito ra yona.