I Vamakabiya 2

₁Eminkarhini yoleyo Matatiya n'wana Yohane, wa Simiyoni muprista wa ndyangu wa Yoyaribi, a suka Yerusalema a ya aka emutini wa Modeni. ₂A a ri ni vana va 5. A ku ri na Yohane loyi a a thyiwe ni vito ra Gadi, ₃na Simoni la vuriwaka Tasi, ₄na Yudasi la vuriwaka Makabiya, ₅na Eliyazara la vuriwaka Avarani, na Yonatani la vuriwaka Afasi.

₆Loko Matatiya a vona swa tingana leswi a swi ri eYudidya ni le Yerusalema, ₇a ku:

₁₄Kutani Matatiya ni vana va yena va handzula swiambalo swa vona, va ambala leswo khwaxa, va rila swinene.

₁₅Hiloko tindhuna ta hosi leti a ti sindzisa vanhu ku fularhela Xikwembu, ti ta emutini wa Modeni ku ta sindzisa vanhu va kona ku humesela swikwembu swa hava emagandzelo. ₁₆Vaisraele lavo tala kun'we na Matatiya ni vana va yena, va ta ku ta hlangana na tona. ₁₇Kutani tindhuna ta hosi Antiyoko Epifani ti vulavula na Matatiya ti ku: “U murhangeri wo fundzheka ni nkulukumba emutini lowu, u seketeriwa hi vana va wena ni vamakwenu. ₁₈Hikokwalaho ku ta sungula wena, u ta endla hilaha hosi yi lerisaka hakona, tanihi laha vamatiko hinkwavo, ni vanhu va Yudiya, ni lava saleke Yerusalema va endleke hakona; kutani wena ni vana va wena mi ta hlayiwa entlaweni wa ‘Vanghana va hosi’, mi ta fundzhiwa hi silivhere, ni nsuku, ni tinyiko leto tala.”

₁₉Kambe Matatiya a hlamula hi rito leri tlakukeke a ku: “Hambi loko vanhu va matiko hinkwawo lama nga hansi ka mfumo wa hosi Antiyoko Epifani va n'wi yingisa, kutani va hlawula ku endla ku lerisa ka yena, va fularhela vukhongeri bya vatata wa vona, ₂₀mina ni vana va mina ni vamakwerhu hi ta hanya hi ntwanano lowu Xikwembu xi wu endleke ni vatata wa hina. ₂₁A swi ve kule na hina ku hambana ni nawu ni swileriso swa Xikwembu. ₂₂Hi nga ka hi nga yingisi marito ya hosi hi ku hambuka eka vukhongeri bya hina nikutsongo.”

₂₃Loko Matatiya a ha ku heta ku vulavula marito lawa, Muyuda un'wana, hi ku hlayisa xileriso xa hosi, a tihumesa emahlweni ka hinkwavo ku humesela swikwembu swa hava emagandzelo ehenhla ka alitari leyi a yi ri eModeni. ₂₄Loko Matatiya a swi vona, a hiseka ni mbilu ya yena yi tlhaveka. Hi ku kariha lokukulu a tsutsumela emahlweni, a dlaya wanuna loyi kwalaho ehenhla ka alitari. ₂₅A dlaya ni ndhuna ya hosi leyi a yi ri karhi yi va sindzisa ku humesela swikwembu swa hava emagandzelo, a va a mbundzuxa ni alitari. ₂₆Hi ndlela leyi a hisekela nawu wa Xikwembu tanihi leswi Finiyasi a swi endla loko a dlaya Zimri n'wana Salu.

₂₇Kavaloko Matatiya a famba exikarhi ka muti, a huwelela a ku: “Un'wana ni un'wana loyi a hisekelaka nawu wa Xikwembu ni ku yima hi ntwanano wa xona, a a ndzi landze!” ₂₈Kutani yena ni vana va yena va siya hinkwaswo leswi a va ri na swona emutini, va tsutsumela etintshaveni.

₂₉Lavo tala lava a va lava nawu ni ku lulama, va suka va ya aka emananga, ₃₀va famba swin'we ni vasati va vona ni vana ni swifuwo swa vona, hikuva vubihi a byi va tshikelela ngopfu. ₃₁Kutani swi tivisiwa tindhuna ta hosi ni mavuthu lawa a ma ri eYerusalema, muti wa Davhida, leswaku vanhu lava nga ala ku hlayisa xileriso xa hosi, va fanele ku tsutsumela etindhawini to tumbela emananga. ₃₂Masocha layo tala ma va hlongorisa, ma fika kusuhi na vona, ma gova ma langutana na vona, ma tilulamisela ku lwa na vona hi siku ra Savata. ₃₃Kutani ma byela Vayuda ma ku: “Swi ringene, humani mi endla leswi hosi yi swi lerisaka, kutani mi ta hanya.”

₃₄Kambe Vayuda va hlamula va ku: “Hi nga ka hi nga humi hambi ku ri ku endla leswi hosi yi swi lerisaka, hi nyamisa siku ra Savata.”

₃₅Kavaloko valala va hatlisa va va hlasela. ₃₆Kambe Vayuda a va tisirhelelanga kumbe ku va hoxa ribye, hambi ku ri ku pfala tindlela leti yisaka etindhawini to tumbela ta vona, ₃₇hikuva a va ku: “A hi feni hinkwerhu hi ri hava nandzu; tilo ni misava swi ta nyika vumbhoni bya leswaku mi hi dlaya hi ku homboloka.” ₃₈Kutani valala va va hlasela hi siku ra Savata, va fa kun'we ni vasati va vona ni vana ni swifuwo swa vona, ku fa Vayuda vo ringana 1 000 siku leri.

₃₉Loko Matatiya ni vanakulobye va swi twa, va rilela ngopfu varikwavo. ₄₀Kutani un'wana ni un'wana a ku eka loyi a nga kusuhi na yena: “Loko hinkwerhu ho endla hilaha vamakwerhu va nga endla hakona, hi ala ku lwa ni vamatiko, hi tshika ku lwela vutomi bya hina ni milawu ya hina, va ta hatla va hi herisa emisaveni.” ₄₁Kutani siku rolero va tsema mhaka va ku: “A hi lweni ni un'wana ni un'wana loyi a hi pfukelaka hi siku ra Savata; hi nga tshuki hi fa tanihi leswi vamakwerhu va nga fisa xiswona etindhawini ta vona to tumbela ka tona.”

₄₂Kavaloko Matatiya ni vanghana va yena va tatisiwa hi Vahasidi, wu nga ntlawa wa tinhenha ta Vaisraele, lowu un'wana ni un'wana wa wona a a tinyiketile ku yimela nawu wa Xikwembu handle ka ku sindzisiwa. ₄₃Kutani hinkwavo lava a va hundzuke valuveri hi ku baleka ku xanisiwa, va hlangana na vona va va tatisa. ₄₄Va lulamisa mavuthu, kutani eku hlundzukeni ka vona ni le vukarini bya vona, va hlasela vadyohi ni lavo homboloka; vadyohi lava poneke va tsutsuma va tumbela eka vamatiko. ₄₅Matatiya ni vanghana va yena va rhendzeleka hinkwako-nkwako, va mbundzumuxa tialitari ta swikwembu swa hava. ₄₆Va yimbisa hi nkanu vafana hinkwavo lavo ka va nga yimbanga, lava va va kumeke endzeni ka ndzilekana wa Israele. ₄₇Va hlotana ni vatikukumuxi, va va kuma. ₄₈Va kutsula nawu wa Xikwembu emavokweni ya vamatiko ni tihosi ta vona, va nga pfumeli vadyohi ku va hlula.

₄₉Masiku ya ku fa ka Matatiya ma tshinela, kutani Matatiya a ku eka vana va yena: “Vutikukumuxi ni swisandzu swi te hi matimba, lowu i nkarhi wa ku onha ni wa vukari lebyi chavisaka. ₅₀Vana vanga, hisekelani nawu wa Xikwembu, mi nyiketa vutomi bya n'wina eka ntwanano wa vatata wa hina. ₅₁Tsundzukani mintirho ya vatata wa hina leyi va yi endleke enkarhini wa vona, kutani va kume ku xiximiwa lokukulu ni vito leri nga heriki. ₅₂Xana Abrahama a nga kumekanga a ri na ripfumelo loko a ta va a ringiwile, kutani a hlayiwa la lulameke xana? ₅₃Yosefa enkarhini wa ku xaniseka ka yena ú hlayisile nawu wa Xikwembu, kutani a va hosi ya Egipta. ₅₄Finiyasi, tata wa hina, ú kumile ntwanano wa vuprista lebyi nga heriki, hikwalaho ka ku hiseka ka yena. ₅₅Yoxuwa ú vile muavanyisi etikweni ra Israele, hikuva a a hlayisa xileriso xa Muxe. ₅₆Kalebe ú humesile vumbhoni lebyinene emahlweni ka ntshungu hinkwawo wa Vaisraele, kutani a kuma ndzhaka etikweni ra Israele. ₅₇Davhida ú kume ndzhaka ya vuhosi lebyi nga heriki, hikuva a a twela vanhu vusiwana. ₅₈Eliya ú tlakuleriwe etilweni, hikuva a a hisekela nawu wa Xikwembu ngopfu. ₅₉Ananiya na Azariya na Mixaele va pfumerile, kutani va ponisiwa emalangavini. ₆₀Daniele ú ponisiwile emilon'weni ya tinghala, hikwalaho ka ku va a ri hava nandzu. ₆₁Kutani ke, xiyaxiyani leswaku eminkarhini hinkwayo, lava va pfumelaka eka Xikwembu, va nga ka va nga pfumali matimba. ₆₂Mi nga tshuki mi chavisiwa hi marito ya mudyohi, hikuva ku tidzunisa ka yena ku ta hundzuka swa hava. ₆₃Namuntlha wa kurisiwa, kambe mundzuku a nga ka a nga ha vi kona, miri wa yena wu ta tlhelela entshurini, kutani makungu ya yena ma ta nyamalala. ₆₄N'wina vana vanga, yimani mi tiyile enawini wa Xikwembu, hikuva ha wona mi ta kurisiwa.

₆₅“Vonani ke, ndzi tiva leswaku Simoni makwenu ú tlharihile etimhakeni; n'wi yingiseni minkarhi hinkwayo, hi yena tata wa n'wina. ₆₆Yudasi Makabiya ú vile nhenha ya matimba enyimpini ku sukela evutsongwanini bya yena; ú ta mi rhangela enyimpini ya ku ya lwa ni valala. ₆₇Rhambani hinkwavo lava hlayisaka nawu wa Xikwembu, kutani mi tirihisela eka leswo biha leswi varikwenu va endliweke swona. ₆₈Tirihiseleni eka vamatiko hi xitalo, kutani mi yingisa ku lerisa ka nawu wa Xikwembu.”

₆₉Kavaloko Matatiya a va katekisa, kutani a tietlelela. ₇₀Ú file hi lembe ra 146, kutani a lahliwa emasirheni ya vakokwa wa yena eModeni. Vaisraele hinkwavo va n'wi rila hi xirilo lexikulu.