Mintirho 17

₁Pawulo na Silasi va famba hi ndlela leyi hundzaka hi le Amfipoli ni le Apoloniya, va fika eTesalonika, laha a ku ri ni sinagoga ra Vayuda. ₂Hi ku tolovela ka yena, Pawulo a nghena nhlengeletano na vona; kutani hi masiku manharhu ya Savata a hlamulana na vona hi ku landza Matsalwa, ₃a ri karhi a ma hlamusela, ni ku ringanisa ha wona leswaku Mesiya a a fanele ku twisiwa ku vaviseka, ni ku pfuka eku feni; kutani a ku: “Yesu loyi ndzi mi tivisaka yena, hi yena Mesiya.” ₄Kutani van'wana exikarhi ka vona va pfumela, va namarhela Pawulo na Silasi, va ri ni nhlayo leyikulu ya Vagriki lava chavaka Xikwembu, ni lavo tala exikarhi ka vavasati lavo chaviseka.

₅Kambe Vayuda va tala mavondzo, va teka vavanuna van'wana lavo biha entsendzeleni wa muti, kutani va hlengeleta ntshungu, va pfilunganya muti; va ya rhendzela muti wa Yaso, va lava Pawulo na Silasi ku va yisa emahlweni ka tiko. ₆Kambe loko va nga va kumi, va kokela Yaso ni vamakwavo van'wana emahlweni ka tindhuna ta muti, va huwelela, va ku: “Vanhu lava, lava nga pfilunganya misava hinkwayo, va fikile ni haleno, kutani Yaso ú va rhurherile; ₇vanhu lava hinkwavo va tlula milawu ya Khezari, hi ku vula leswaku ku ni hosi yin'wana, leyi va nge i Yesu.” ₈Hi marito lawa va pfuxa dzolonga exikarhi ka tiko ni le xikarhi ka tindhuna ta muti leti nga swi twa. ₉Hambiswiritano, tindhuna ti amukela xinkhensa-nandzu eka Yaso ni van'wana, kutani ti va tshika va famba.

₁₀Hi vusiku bya kona, vamakwavo va hatlisa va rhuma Pawulo na Silasi eBeriya. Loko vaapostola va fikile kona, va nghena esinagogeni ra Vayuda. ₁₁Vona va tlurisa Vatesalonika hi mafundzha, va amukela Rito hi ku nkhensa lokukulu, va kambisisa Matsalwa masiku hinkwawo, va lava ku tiva leswaku xana timhaka ti tano xana. ₁₂Kutani lavo tala exikarhi ka vona va pfumela, naswona, exikarhi ka Vagriki, ku pfumela vavasati lava chavisekaka lavo tala, ni vavanuna lavo tala. ₁₃Kambe loko Vayuda va le Tesalonika va twa leswaku rito ra Xikwembu ri vuriwile hi Pawulo ni le Beriya, va ya kona, va kanakanisa ni ku pfilunganya mintshungu. ₁₄Hikokwalaho, vamakwavo va hatlisa va humesa Pawulo, a ya fika eribuweni ra lwandle; kambe Silasi na Timotiya va sala eBeriya. ₁₅Kutani lava heleketaka Pawulo, va n'wi fikisa eAtena; kutani va tlhela loko va lerisiwile ku byela Silasi na Timotiya leswaku va nga hlweli ku landza Pawulo.

₁₆Loko Pawulo a ha va langutela eAtena, moya wa yena wu tlhaveka swinene, loko a vona leswaku muti lowu, wu tele swikwembu swa swifaniso. ₁₇Hikokwalaho, loko a ri esinagogeni, a hlamulana ni Vayuda ni lava chavaka Xikwembu; kutani a endlisa sweswo ni le hubyeni ya muti masiku hinkwawo, a hlamulana ni lava a va ri kona.

₁₈Kambe tintlhari tin'wana ta ntlawa wa Vaepikuro ni wa Switoyika ti kanetana na yena; van'wana va ku: “Xana munhu loyi wo jakatseka, ú lava ku hi byela yini ke?” Van'wana va ku: “Wonge i mudyondzisi wa ta swikwembu swin'wana.” A va vula sweswo, hikuva Pawulo a a va byela ta Yesu ni ta ku pfuka eku feni. ₁₉Kutani va n'wi teka, va ya na yena ehubyeni ya “Areyopago”, va ku: “Xana hi nga tiva dyondzo leyintshwa leyi u yi vulaka, leswaku hi yihi xana ke? ₂₀U fikisile timhaka leto hlamarisa etindleveni ta hina; hikokwalaho hi lava ku ti tiva leswaku hi leto yini.” ₂₁(Vaatena hinkwavo, ni vanhu va matiko man'wana lava endzeke ka vona, a va nga tirhi nchumu, loko ku nga ri ku rungulelana timhaka, kumbe ku yingisa tin'wana leta ha ku humelelaka.)

₂₂Kavaloko Pawulo a yima ehubyeni ya “Areyopago”, a ku:

“Vavanuna va Atena, ndza swi vona leswaku, eka swilo hinkwaswo, mi vanhu va vukhongeri lebyikulu ngopfu. ₂₃Hikuva loko ndzi famba ndzi ri karhi ndzi languta tindhawu leti mi gandzelaka ka tona, ndzi kumile alitari leyi ku tsariweke marito eka yona lama nge: ‘Eka Xikwembu lexi nga tiviwiki!’ Sweswi ke, leswi mi swi gandzelaka mi nga swi tivi, hi swona leswi ndzi mi tivisaka swona. ₂₄Xikwembu lexi nga endla misava ni hinkwaswo leswi nga ka yona, a xi tshami etitempeleni leti akiweke hi mavoko ya vanhu, leswi xi nga Hosi ya matilo ni misava; ₂₅naswona a xi tirheriwi hi mavoko ya vanhu, wonge hi loko xi nga pfumala nchumu; hikuva hi xona lexi nyikaka un'wana ni un'wana vutomi, ni ku hefemula, ni swilo hinkwaswo. ₂₆Hi munhu un'we xi endlile vanhu van'wana hinkwavo leswaku va eneta misava hinkwayo; xi va vekele tinguva leti xi ti hlawuleke khale, xi veka ni mindzilekana ya lomu va fanelaka ku tshama kona. ₂₇A swi ri leswaku va lava Xikwembu, ni leswaku kumbexana va nga xi ambamba, va xi kuma; hambiswiritano, a xi le kule ni un'wana ni un'wana wa hina; ₂₈hikuva eka xona, ha hanya, ha tshuka-tshuka, naswona, hi va kona, kukotisa leswi vatlhokovetseri van'wana va n'wina va nga vula va ku: ‘Na hina hi va rixaka ra xona.’ ₂₉Kutani leswi hi nga va rixaka ra Xikwembu, a hi fanelanga ku anakanya leswaku vukwembu byi nga fana ni swifaniso swa nsuku, kumbe swa silivhere, kumbe swa ribye, swi nga swilo leswi vatliwaka hi vutlhari bya vanhu ni miehleketo ya vona. ₃₀Hambiswiritano, Xikwembu xi tshikile minkarhi ya ku pfumala ku tiva yi hundza, kutani sweswi, ematikweni hinkwawo xi lerisa vanhu leswaku va hundzuka hinkwavo. ₃₁Hikuva xi vekile siku leri xi nga ta avanyisa misava eku lulameni, hi wanuna loyi xi n'wi hlawuleke; kutani xi kombisile vanhu hinkwavo ku tiya ka mhaka leyi hi ku pfuxa munhu loyi exikarhi ka vafi.”

₃₂Loko va twa ta ku pfuka ka vafi, van'wana va hleka, kambe van'wana va ku: “Ha ha ta ku twa nakambe emhakeni leyi.” ₃₃Kutani Pawulo a suka exikarhi ka vona. ₃₄Kambe vanhu van'wana va n'wi namarhela, va pfumela; exikarhi ka vona a ku ri na Diyonisiyo lowa Ariyopago, ni wansati loyi a va ku i Damarisi, na van'wana kambe.