Yuditi 13

₁Loko ku fika madyambu, mahlonga ya Holofani ma famba hi ku hatlisa, kutani Baguwa a pfala ntsonga a ri ehandle, a sivela malandza ya Holofani ku ya nghena kona. Hinkwavo va ya etlela, hikuva a va karhele hileswi nkhuvo wu nga hlwela ku hela. ₂Yuditi a sala a ri yexe entsongeni na Holofani loyi a a te lákáhlá, ehenhla ka mubedo wa yena, hikuva a a pyopyiwile. ₃Kavaloko Yuditi a lerisa nandza wa yena wa xisati ku n'wi yimela ehandle ka ntsonga, ku kondza loko a huma a ya khongela tanihi laha a toloveleke hakona masiku hinkwawo. Yuditi a tivisa na Baguwa leswaku u ta huma nimpundzu a ya khongela tanihi laha a toloveleke hakona.

₄Hinkwavo va huma, ku nga sali munhu entsongeni handle ka Yuditi na Holofani. Kutani Yuditi a yima etlhelo ra mubedo wa Holofani, a khongela embilwini a ku: “Wena HOSI Xikwembu xa matimba hinkwawo, katekisa sweswi ntirho wa mavoko ya mina, leswaku muti wa Yerusalema wu dzunisiwa. ₅Sweswi hi wona nkarhi wo pfuna vanhu va wena lava hlawuriweke, ni ku hetisa ntirho wa mina wa ku lovisa valala va hina lava va hi pfukeleke.” ₆Yuditi a ya yima kusuhi ni phuphu ya le mahlweni ya xifunengeto xa mubedo wa Holofani, a teka banga leri a ri hayekiwile kona. ₇A tshinelela Holofani, a n'wi khoma hi misisi, a ku: “Ndzi nyike matimba sweswi, we HOSI Xikwembu xa Israele!” ₈Kutani a ba nhamu ya Holofani kambirhi hi matimba ya yena hinkwawo, a n'wi tsema nhloko. ₉A vumbuluxa ntsumbu wa Holofani eka mubedo, a ntlurhula ni xifunengeto xa wona etiphuphini ta xona. Endzhaku ka nkarhinyana a teka nhloko ya Holofani a huma entsongeni, a nyika nhloko ya kona eka nandza wa yena wa xisati, ₁₀kutani yena a yi hoxa enkwameni wa swakudya.

Yuditi ni nandza wa yena wa xisati va huma emixaxeni ya Vaasiriya tanihi laha va toloveleke hakona loko va ya khongela. Va famba exikarhi ka mixaxa, va rhendzeleka hi nkova, va tlhandlukela entshaveni, va ya fika etinyangweni ta Betuli. ₁₁Loko va ha ri kulenyana, Yuditi a huwelela eka varindzi va tinyangwa, a ku: “Pfulani, pfulani nyangwa! Xikwembu, Xikwembu xa hina xa ha ri na hina. Xi kombisile nakambe namuntlha matimba ya xona etikweni ra Israele ni le ka valala va hina.”

₁₂Loko vanhu va Betuli va twa rito ra yena, va ngirimelela hi ku hatlisa enyangweni ya muti, kutani va hlengeleta vakulukumba va vona. ₁₃Hinkwavo, lavatsongo ni lavakulu, va tsutsumela enyangweni, hikuva a swi nga khorwisi leswaku hakunene-nene Yuditi ú vuyile. Va pfulela Yuditi ni nandza wa yena enyangwa, va va amukela hi ntsako, va tshivela ndzilo ku voninga ndhawu ya kona, va va rhendzela. ₁₄Kutani Yuditi a vulavula na vona hi rito lero tlakuka a ku: “Dzunisani Xikwembu, xi dzuniseni! Dzunisani Xikwembu lexi nga tshikangiki ku tsetselela vanhu va Israele. Vusiku lebyi xi herisile valala va hina hi mavoko ya mina.” ₁₅Kavaloko Yuditi a humesa nhloko ya Holofani enkwameni, a va komba yona, a ku: “Vonani, nhloko ya Holofani, ndhunankulu ya mavuthu ya Vaasiriya, hi leyi. Lexi i xifunengeto lexi Holofani a a etlele ehansi ka xona a nga koti nchumu hi mhaka ya ku pyopyiwa ngopfu. HOSI Xikwembu xi n'wi dlayile hi voko ra wansati. ₁₆Ndzi hlambanya emahlweni ka HOSI Xikwembu lexi xi ndzi hlayiseke eku fambeni ka mina, leswaku, hambi loko Holofani a kanganyisiwile ni ku herisiwa hi vumbhurhi bya mina, a nga endlanga xidyoho na mina, a nga ndzi nyamisanga kumbe ku ndzi khomisa tingana.”

₁₇Vanhu hinkwavo va Betuli va hlamala ngopfu, va korhama ni ku gandzela Xikwembu, va vula hi nomu wun'we va ku: “A ku dzunisiwe we Xikwembu xa hina, hikuva namuntlha u tsongahatile valala va vanhu va wena.”

₁₈Kavaloko Uziya a ku ka Yuditi: “N'wananga, u katekisiwile hi Xikwembu ku tlula vavasati hinkwavo emisaveni. A ku dzunisiwe HOSI Xikwembu, mutumbuluxi wa tilo ni misava, lexi xi ku pfuneke ku tsema nhloko ya murhangeri wa valala va hina. ₁₉Ku tshemba ka wena eka Xikwembu, a ku nga rivariwi ni siku na rin'we exikarhi ka lava tsundzukaka matimba ya xona. ₂₀Xikwembu a xi ku katekise hilaha ku nga heriki, hikwalaho ka leswi u swi endleke. A xi ku tsakise hi minkateko ya xona, hikuva a wu kanakananga ku nyiketa vutomi bya wena loko rixaka ra hina ri tsongahatiwile, kambe u hi ponisile eku tshikeleriweni ka hina hi ku famba endleleni leyinene ya Xikwembu.”

Kutani vanhu hinkwawo va hlamula va ku: “Amen! Amen!”