2 DITIRAFALO 9

₁E rile mohumagadi kgosi ya Sheba a utlwela tumedi ya ga Solomone, a tla Jerusalema go leka Solomone ka dipotso tse di thata, a na le batho ba le bantsi ba ba mo patileng, le dikamela tse di belesitseng ditswaiso, le gouta e le kgolo, le majana a a tlhokegang; mme ya re a tsile mo go Solomone a bua nae ka ga tsotlhe tse di mo pelong ya gagwe. ₂Solomone a mo ranolela dipotso tsotlhe tsa gagwe, go se na sepe se se subegetseng Solomone se o sa se mmolelelang. ₃E rile mohumagadi kgosi ya Sheba a sena go bona botlhale jwa ga Solomone, le ntlo e o e agileng, ₄le dijo tsa lomati lwa gagwe lwa bojelo, le go dula ga batlhanka ba gagwe, le go ema ga badiredi ba gagwe le diaparo tsa bone; le bone batshola dinwelo ba gagwe, le diaparo tsa bone; le botlhatlogo jwa gagwe jo o tlhatlogelang ka jone kwa ntlong ya ga Jehofa; ga bo go sa tlhole go le mowa ope mo go ene mohumagadi.

₅Mme a raya kgosi a re: “E ne e le poledi ya mmaanete e ke e utlwileng kwa lefatsheng la gaetsho ka ga ditiro tsa gago, le ka ga botlhale jwa gago. ₆Le fa go ntse jalo ga ke a ka ka dumela mafoko a batho, go tsamaya ke tla, mme matlho a me a bona; le fa e le bontlhanngwe jwa bogolo jwa botlhale jwa gago ke ne ke sa bo bolelelwa; o feta tumedi e ke e utlwileng. ₇Batho ba gago ba sego, le batlhanka ba, ba gago ba sego, ba ba emang fa pele ga gago ka metlha yotlhe, ba utlwa botlhale jwa gago. ₈A go bakwe Jehofa Modimo wa gago, yo o ne a kgatlhega mo go wena, a ba a tla a go baya mo setulong sa gagwe, go nna kgosi boemong jwa ga Jehofa Modimo wa gago. Gonne Modimo wa gago o ne o rata Baiseraele go tla o ba tlhomamisa ka bosakhutleng, ke gone ka fa o go dirileng kgosi ya bone ka gone, go tla o dira katlholo le tshiamiso.”

₉Mme Mohumagadi kgosi a naya kgosi dikilokerame tsa gouta di feta 4 000, le ditswaiso ka letlotlo le legolo, le majana a a tlhokegang; le gone go ne go se na ditswaiso dipe tse di tshwanang le tse mohumagadi kgosi ya Sheba o di neileng Solomone.

₁₀Batlhanka ba ga Hurame, le batlhanka ba ga Solomone ba ba tswang go tsaya gouta kwa Ofire, ba tla le ditlhare tsa maalaguma le majana a a tlhokegang. ₁₁Kgosi ya direla ntlo ya ga Jehofa le ntlo ya kgosi direpudi ka ditlhare tsa maalaguma, a dira le diharepe le disaletere tsa baopedi; mme go ne go ise go ko go bonwe tse di ntseng jalo gope mo lefatsheng la Juta.

₁₂Kgosi Solomone a naya mohumagadi kgosi ya Sheba keletso yotlhe ya gagwe, sengwe le sengwe se o se lopang kwa ntle ga tse o ne a tsile natso kgosing. Mme a sokologa, a ya lefatsheng la ga gabo, ene le batlhanka ba gagwe.

₁₃Jaana bokete jwa gouta e e tlang mo go Solomone ka ngwaga o le mongwe fela e ne e le dikilokerame di feta 23 000; ₁₄kwa ntle ga e babapadi le bareki ba ne ba e tlisa. Dikgosi tsotlhe tsa Arabia le balaodi ba lefatshe ba tlisa gouta le selefera kwa go Solomone. ₁₅Kgosi Solomone a dira dithebe tsa gouta di le 200, tsa gouta e e papetlilweng ka noto, thebe nngwe le nngwe ya dirwa ka dikilokerame di supa, tsa gouta e e papetlilweng. ₁₆A dira dithejana di le 300 tsa gouta e e papetlilweng, thejana nngwe le nngwe ya dirwa ka dikilokerame di le tharo tsa gouta. Kgosi ya di tsenya mo ntlong ya sekgwa sa Lebanone.

₁₇Gape kgosi ya dira setulo sa bogosi se segolo ka dinaka tsa ditlou, a se manega gouta e e itshekileng. ₁₈Go ne go le direpudi di le thataro tse di isang kwa setulong sa bogosi, le sebeo sa dinao sa gouta, tse di gokeletsweng mo setulong sa bogosi, le maikaegelo a mabogo ka fa ntlheng nngwe le nngwe ya felo ga bodulo, le ditau di le pedi di eme ka fa mabogong. ₁₉Ditau di le 12 di ne di eme mo direpuding tse thataro ka fa ntlheng e nngwe le e nngwe. Go ne go sa dirwa dipe tse di tshwanang natso mo bogosing bope.

₂₀Le dinwelo tsotlhe tsa kgosi Solomone e ne e le tsa gouta, le dilwana tsotlhe tsa ntlo ya sekgwa sa Lebanone, e ne e le tsa gouta e e itshekileng; selefera se ne se sa kaiwe sepe mo metlheng ya ga Solomone. ₂₁Gonne kgosi e ne e na le dikepe tse di yang Tarešiše di na le batlhanka ba ga Hurame; dikepe tsa Tarešiše di ne di tle di tle gangwe fela ka dinyaga di le tharo, di tlise gouta, le selefera, le dinaka tsa ditlou, le dikgatla le dipekoko.

₂₂Kgosi Solomone a gaisa dikgosi tsotlhe tsa lefatshe ka dikhumo le ka botlhale. ₂₃Dikgosi tsotlhe tsa lefatshe tsa rata go bona Solomone, le go utlwa botlhale jwa gagwe jo Modimo o bo tsentseng mo pelong ya gagwe. ₂₄Motho mongwe le mongwe a tla le neo ya gagwe, dilwana tsa selefera, le dilwana tsa gouta, le diaparo, le dibolao, le ditswaiso, le dipitse le dimmoulo, ka selekanyo ka ngwaga le ngwaga.

₂₅Solomone o ne a na le maemo a le 4 000 a dipitse le dikara, le bapalami ba dipitse ba le 12 000, ba o ne a ba baya mo metseng ya dikara, le mo Jerusalema kwa kgosing. ₂₆Mme a busa dikgosi tsotlhe go tswa Nokeng go ya fela kwa lefatsheng la Bafilisitia, le kwa molelwaneng wa Egepeto. ₂₇Mo Jerusalema kgosi ya tlatsa selefera sa nna jaaka maje, le masetara ya a tlatsa a nna jaaka ditlhare tsa masekamore tse di mo lefatsheng la sekhuti ka bontsi. ₂₈Ba tseela Solomone dipitse kwa Egepeto le kwa mafatsheng otlhe.

₂₉Ditiro tse dingwe tsa ga Solomone, tsa ntlha le tsa morago, a ga di a kwalwa mo mafokong a ga Nathane moperofeti le mo perofesong ya ga Ahija wa Mošilona, le mo diponatshegelong tsa ga Ito molebi ka ga Jeroboame morwa Nebate? ₃₀Mme Solomone a busa Baiseraele botlhe mo Jerusalema ka dinyaga di le 40. ₃₁Solomone a robala le borraagwe, a fitlhwa mo motseng wa ga rraagwe, Dafite, mme Rehoboame morwawe a busa mo boemong jwa gagwe.