Melao ya ntwa
1“E tle e re fa o bololela baba ba gago go tlhabana nabo, o bona dipitse le dikara tsa tlhabano, le batho ba ba go fetang ka bontsi, o se ka wa ba boifa; gonne Jehofa Modimo wa gago, yo o go tlhatlositseng kwa lefatsheng la Egepeto, o na nao. 2A go dirale gore fa lo atamela go tlhabana, moperesiti a atamele, a bue le batho. 3A ba reye a re: ‘Utlwang Baiseraele, gompieno lo atamela go tlhabana le baba ba lona, a dipelo tsa lona di se nyere, se boifeng, se roromeng, lo se ba tshoge; 4gonne Jehofa Modimo wa lona ke ene yo o tsamayang le lona, o ya go lo tlhabanela le baba ba lona, go lo boloka.’
5“A balaodi ba mephato ba bue le batho, ba re: ‘Go na le monna ofe yo o agileng ntlo e ntšha, mme a se ka a e kgakola? A a boele kwa ntlong ya gagwe, o ka tla a swela mo ntweng, mme mnna o sele a e kgakole. 6Go na le monna ofe yo o tlhomileng tshimo ya mafine, a e iseng a swele loungo lwa yone molemo? A a boele kwa ntlong ya gagwe, o ka tla a swela mo ntweng, mme monna o sele a swele loungo lwa yone molemo. 7Go na le monna ofe yo beeletseng mosadi, a ise a mo tseye? A a boele kwa ntlong ya gagwe, o ka tla a swela mo ntweng, mme mnna o sele a mo tseye.’
8“A balaodi ba mephato ba fele ba bue le batho, ba re: ‘Go na le monna ofe yo o boifang, yo pelo e nyerang? A a tsamaye a boele kwa ntlong ya gagwe, dipelo tsa bankana ba gagwe di ka tla tsa nyerologa jaaka pelo ya gagwe.’ 9Go tlaa dirala gore, e re fa balaodi ba mephato ba weditse go bua le batho, ba tlhome balaodi ba ditlhopalhopha, ba ba tlaa nnang kwa tlhogong ga batho.
10“E tle e re fa o atamela motse mongwe go tlhabana nao, foo o o opele mokgosi wa kagiso. 11Go tlaa dirala gore fa o go naya phetolo ya kagiso, mme ba go bulela, foo a go dirale gore batho botlhe ba ba fitlhelwang mo go one ba go kgethele, ba go direle. 12Mme fa o gana go dira kagiso nao, o rata go tlhabana nao fela, foo o o tlhasele; 13motlhang Jehofa Modimo wa gago o o tsenyang mo seatlang sa gago, o kgemethe banna botlhe ka bojetla jwa tšhaka. 14Basadi, le banyana, le dikgomo le tsotlhe tse di mo motseng, e bong thopo yotlhe ya one, o e itseele, e le thopo ya gago; o je thopo ya baba ba gago, e Jehofa Modimo wa gago o e go neileng. 15Metse yotlhe e e kwa kgakala thata nao, e e seng ya metse ya merafe e e fano, o e direle jalo.
16“Metse ya ditšhaba tseno, e Jehofa Modimo wa gago o e go nayang go nna boswa, o se ka wa tshedisa sepe se se hemang mowa. 17O e senyetse ruri: Bahite, le Baamore, le Bakanana, le Baperise, le Bahife le Bajebuse; jaaka Jehofa Modimo wa gago a go laotse; 18gore ba se ka ba lo ruta go dira ka fa dilong tsotlhe tsa bone tse di makgapha, tse ba di diretseng medimo ya bone; jalo lo ne lo tlaa bo lo leofela Modimo wa lona.
19“E tle e re fa o tlhasela motse ka lobaka lo loleele, o tlhabana nao go tla o o thopa, o se ka wa senya ditlhare tsa one ka go di ekela selepe; gonne ke tsone tse o ne o ka di ja, o se ka wa di rema; setlhare sa naga a ke motho, fa e bo ne ne o ka se tlhasela? 20Mme ditlhare tse o di itseng fa e le ditlhare tse di se nang dijo, tsone tsosi o ka di senya wa di rema; mme o agela motse o o tlhabanang nao dipeela tsa phemelo, go tsamaya o wa.
