EKESODO 30

₁“O dire sebeso go fisetsa maswalo mo go sone, o se dire ka mokala. ₂Boleele jwa sone a bo nne boleele jwa disentimetara di le 45, le boatlhamo jwa sone disentimetara di le 45; a se nne dintlha tse di lekalekanang tsoo nne; bogodimo jwa sone a bo nne disentimetara di le 90, dinaka tsa sone a di nne sengwe fela naso di semege mo go sone. ₃O se manege gouta e e sa pekwang, fa godimo ga sone le mo ditlhakoreng tsa sone tikologong ya sone, le dinaka tsa sone; o se direle segomo sa gouta mo tikologong ya sone. ₄O se direle melepo e le mebedi ya gouta fa tlase ga segomo sa sone, fa dikgopong tsa sone tse pedi, o e dire mo ditlhakoreng tsa sone tsoo pedi, mme e tlaa nna matseno a disikaro tse se tlaa sikarwang ka tsone. ₅Disikaro tseo o di dire ka mokala, o di manege gouta. ₆O se beye fa pele ga sesiro se se fa letloleng la tshupo, fa pele ga senno sa boutlwelo botlhoko se se mo godimo ga tshupo, fa ke tlaa kopanelang nao gone. ₇A Arone a fisetse mo go sone maswalo a maroku a a nkgang monate, ka moso mongwe le mongwe; a re a baakanya dilampa a a fise. ₈E ne e re maitseboa fa Arone a tshuba dilampa a a fise, e le maswalo a a sa khutleng fa pele ga Jehofa go ya le dikokomana tsotlhe tsa lona. ₉Lo se ka lwa isa maswalo a sele mo go sone; le fa e le tshupelo e e fisiwang, le fa e le tshupelo ya boupe; le gone lo se ka lwa thela mo go sone tshupelo epe e e nowang. ₁₀Arone a dire tetlanyo mo dinakeng tsa sebeso gangwe fela ka ngwaga; a se direle tetlanyo gangwe fela ka ngwaga ka madi a tshupelelo ya boleo, ya tetlanyo, go ya le dikokomana tsotlhe tsa lona: se boitshepo jo bo boitshepo, se itshepetse Jehofa.”

₁₁Jehofa a bua le Moše a re: ₁₂“Mogang o balang bana ba Iseraele, ka fa palong ya bone ba ba badilweng, mongwe le mongwe a a ntshetse Jehofa serekololo sa mowa wa gagwe, mogang o ba balang; gore go tle go se ka ga nna sebetso mo go bone, mogang o ba balang. ₁₃A ba ntshe jaana, mongwe le mongwe fa a tshelela kwa go ba ba badilweng a ntshe bontlhangwe jwa šekele ya felo ga boitshepo, (šekele ke gera di le 20), e le tshupelo ya ga Jehofa. ₁₄Mongwe le mongwe yo o tshelelang kwa go ba ba badilweng, go simologa ka ba ba dinyaga di 20 go ya le bomogoloa bone, a ntshetse Jehofa tshupelo ya gagwe. ₁₅Ba ba humileng ba se ka ba se oketsa, le ba ba humanegileng ba se tlhaetse selekanyo sa bontlhangwe jwa šekele, mogang ba ntshetsang Jehofa tshupelo ya gagwe, go direla mewa ya lona tetlanyo. ₁₆O tseye madi a tetlanyo mo baneng ba Iseraele, o a beele tirelo ya mogope wa bophuthegelo, gore a nne segopodiso mo baneng ba Iseraele fa pele ga Jehofa, go direla mewa ya lona tetlanyo.”

₁₇Jehofa a bua le Moše a re: ₁₈“Le gone o dire mogopo o o tlhapelang ka kgotlho, le setlhomo sa one ka kgotlho, go tlhapa mo go one; o o beye fa gare ga mogope wa bophuthegelo le sebeso, o thele metsi mo go one. ₁₉Arone le bomorwawe ba tlaa tlhapa diatla ba itlhapisa dinao mo go one. ₂₀Ba re ba tsena mo mogopeng wa bophuthegelo, a ba tlhape ka metsi, gore ba se ka ba swa; gongwe fa ba atamela ba ya go direla fa sebesong, ba ya go fisa tshupelo e e direlwang Jehofa ka molelo, ₂₁a ba tlhape diatla ba itlhapise dinao gore ba se swe; mme e tlaa nna molao o o sa khutleng mo go bone, e bong mo go ene le losika lwa gagwe go ya le dikokomana tsotlhe tsa bone.”

₂₂Gape Jehofa a bua le Moše a re: ₂₃“Le gone o itseele ditswaiso tse di itsegeng, mura o o tsorotlang, o le dikilokerama di le thataro, le kinamone o o lonko lo monate, a le ntlhanngwe ya selekanyo seo, e bong dikilokerama di le tharo, le kalamusa o o lonko lo monate, o le dikilokerama di le tharo. ₂₄Le kasia o le dikilokerama di le thataro ka fa selekanyong sa felo ga boitshepo, le ga lookwane lwa motlhware lo le dilitara di le nne. ₂₅O tlaa lo dira lookwane lo lo tlolwang lo lo boitshepo, e le setlolo se se nkgang monate se se tlhakantsweng ka fa botswerereng jwa modira setlolo se se nkgang monate; e tlaa nna lookwane lo lo tlolwang lo lo boitshepo. ₂₆O tlaa tlotsa ka lone mogope wa bophuthegelo, le letlole la tshupo, ₂₇le tafole, le dilwana tsotlhe tsa yone, le setlhomo sa dipone, le dilwana tsotlhe tsa sone, ₂₈le sebeso sa maswalo, le sebeso sa ditshupelo tse di fisiwang se na le dilwana tsotlhe tsa sone, le mogopo o o tlhapelang le setlhomo sa one. ₂₉O di itshepise gore di nne boitshepo jo bo itshepileng; le fa e le eng se se tlaa di amang se tlaa nna boitshepo. ₃₀O tlotse Arone le bomorwawe, o ba itshepise, gore ba ntirele mo tirong ya boperesiti. ₃₁O bue le bana ba Iseraele o re: ‘Lo, e tlaa nna lookwane lo lo tlolwang lo lo intshepetseng go ya le dikokomana tsa lona tsotlhe fela. ₃₂Mo nameng ya motho lo se thelwe le gone lo se ka lwa dira lope lo lo tshwanang nalo, ka fa modirong wa lone; lo boitshepo, mme le mo go lona lo tlaa nna boitshepo. ₃₃Le fa e le mang yo o tswakang longwe lo lo tshwanang nalo, gongwe le fa e le mang yo o tlaa bayang ga lone mo moditšhabeng, a kgaolwe mo go ba ga gabo.’ ”

₃₄Jehofa a raya Moše a re: “O itseele maroku a a lonko lo monate, setakate, le onukaga, le galabano; maroku a a monate, le lebano le le sa pekwang; ga sengwe le sengwe go nne selekanyo sengwe fela; ₃₅o dire ka tsone maswalo, bolao jo bo nkgang monate, ka fa botswerereng jwa modira bolao jo bo nkgang monate, bo tswaisitswe, bo le boitsheko le boitshepo; ₃₆o bo tlopole, o bo notanotetse thata, o bo beye fa pele ga tshupo mo mogopeng wa bophuthegelo kwa ke tlaa kopanelang nao gone; a bo nne mo go lona boitshepo jo bo boitshepo. ₃₇Maswalo a o tlaa a dirang o se ka wa itirela ape a a tshwanang nao mo go dirweng ga one; mo go wena e nne mo go itshepetseng Jehofa fela. ₃₈Le fa e le mang yo o tlaa dirang a a tshwanang nao, go tla a a utlwa ka nko, a kgaolwe mo go ba ga gabo.”