Go hutsafalela dikgosana tsa Iseraele
1Gape, o tlhabeleletse dikgosana tsa Iseraele khutsafalo. 2O re:
Abo mmaeno e ne e le tau
e namagadi;
o ne a namalala mo gare ga ditau,
a godisa ditawana tsa gagwe
mo gare ga madumedi.
3A godisa tawana nngwe ya gagwe;
ya tswa ledumedi:
la ithuta go bolaya diphologolo,
la ja batho.
4Merafe le yone ya le utlwela;
la tshwarwa mo lemeneng la yone,
mme ba le isa lefatsheng
la Egepeto ka megolasetso.
5Jaana e rile mmaeno a bona
fa a sa bolo go le leta,
mme tsholofelo ya gagwe e fedile,
foo a tsaya tawana e nngwe
ya gagwe,
a e godisa ya nna ledumedi.
6La tsamayatsamaya mo ditaung,
la tswa ledumedi;
la ya go bolaya diphologolo,
la ja batho.
7Mme la bo le itse mantlo a bone
a dikgosi,
mme la kgakgabatsa metse ya bone;
lefatshe la swafala,
le botlalo jwa lone ka ntlha
ya loratla lwa go duma ga lone.
8Foo merafe ya le losa
mo ntlheng tsotlhe,
e tswa dikgaolong tsa lefatshe;
ya le tsharololela lotloa lwa yone;
la tshwarwa mo lemeneng la yone.
9Ba le tlhatlhela mo serobing
ka megolasetso
ba le isa kwa kgosing ya Babilone;
ba le isa mo dikagong tsa phemelo,
gore kodu ya lone e se tlhole e
utlwala mo dithabeng tsa Iseraele.
10Mo mading a gago,
mmaeno o ne a ntse jaaka mofine
o o tlhomilweng fa metsing:
o ne o itse go ungwa, o tletse
dikala ka ntlha ya metsi a matona.
11O ne a na le matlhogela a a thata
a go nna dithobane tsa bogosi
tsa ba ba busang;
go gola ga one go ne go fetile
ga dikala tse dikima, mme
a bonwa ka bogodimo jwa one
mo gare ga bontsi
jwa dikala tsa one.
12Wa khumolwa ka tšararego,
wa digelwa fa fatshe,
mme phefo ya botlhabatsatsi
ya omeletsa loungo lwa one;
matlhogela a one a a thata
a rojwa a swaba;
molelo wa a nyeletsa.
13Gompieno o tlhomilwe mo nageng,
mo lefatsheng le le omeletseng
le le lenyora.
14Molelo o dule mo matlhogeleng
a dikala tsa one
o nyeleditse loungo lwa one,
mme ga go tlhole
go le mo go one letlhogela
le le thata la go nna thobane
ya bogosi ya go busa.
Se ke khutsafalo,
mme se tlaa fela
e ntse e le khutsafalo fela.
