Go rata ga Modimo le boithatelo jwa Baiseraele
1Ga dirala e rile ka ngwaga wa bosupa, ka kgwedi ya botlhano, ka tsatsi la lesome la kgwedi, bagolwane bangwe ba Iseraele ba tla go botsa mo go Jehofa, mme ba dula fa pele ga me. 2Lefoko la ga Jehofa la tla mo go nna, la re: 3“Morwa motho, bua le bagolwane ba Iseraele, o ba reye, o re: Morena Modimo o bua jaana, a re: A lo tsile go botsa mo go nna? Jaaka ke tshedile, go bua Morena Modimo, ke gana go bodiwa ke lona.
4“A o a ba atlhola? Wena morwa motho, a o a ba atlhola? Ba itsise tse di makgapha tsa borraabo. 5O ba reye o re: Morena Modimo o bua jaana, a re: E rile ka motlha o ke itshenketseng Iseraele ka one, ka tsholeletsa losika lwa ntlo ya ga Jakobe seatla sa me, ka ba ikitsise ba le mo lefatsheng la Egepeto, e rile ke ba tsholeletsa seatla sa me, ka re: Ke Morena Modimo wa lona; 6ka tsatsi leo ka ba tsholeletsa seatla sa me go ba ntsha mo lefatsheng la Egepeto ke ba isa kwa lefatsheng le ke le ba lebalebetseng, le le elang maši le dinotshe, mo e leng kgalalelo mo mafatsheng otlhe. 7Ka ba raya ka re: A mongwe le mongwe wa lona a latlhe tse di makgapha tsa matlho a gagwe, mme lo se ka lwa itshekolola ka medimo ya disetwa ya Egepeto; ke nna Morena Modimo wa lona. 8Mme ba ntsuololela, ba gana go ntheetsa; ga ba a ka ba latlha tse di makgapha tsa matlho a bone, ga ba a ka ba tlhoboga medimo ya disetwa tsa Egepeto; foo ka re: Ke tlaa ba goromeletsa tšararego ya me, go tla ke dirafatsa bogale jwa me nabo mo gare ga lefatshe la Egepeto. 9Ka bo ke direlela leina la me, gore le se ka la tlhapadiwa mo ponong ya merafe e ba ne ba le mo go yone, e ke ba iketsisitseng mo ponong ya yone, ka go ba ntsha mo lefatsheng la Egepeto.
10“Jalo ka ba ntsha mo lefatsheng la Egepeto, ka ba fitlhisa kwa nageng. 11Ka ba naya ditao tsa me, ka ba supetsa dikatlholo tsa me, tse e ka reng fa motho a di dira, o ka tshelang ka tsone. 12Gape ka ba naya bosabata ba me, go nna sesupo gare ga me nabo, gore ba itse fa e le nna Jehofa yo ke ba itshepisang. 13Mme bantlo ya Iseraele ba ntsuololela mo nageng: ga ba a ka ba sepela mo ditaong tsa me, ba gana dikatlholo tsa me, tse e ka reng fa motho a di dira o ka tshela ka tsone; bosabata ba me ba ba tlhapatsa thata; foo ka re: Ke tlaa ba goromeletsa tšararego ya me mo nageng go ba nyeletsa. 14Mme ka bo ke direlela leina la me gore le se ka la tlhapadiwa mo ponong ya merafe e e rileng ke ba ntsha ya bo e lebile. 15Gape, ka ba tsholeletsa seatla mo nageng ka re: Ga nketla ke ba isa mo lefatsheng le ke ne ke le ba neile, le le elang maši le dinotshe, mo e leng kgalalelo mo mafatsheng otlhe, 16ka go bo ba ganne dikatlholo tsa me; ga ba a ka ba sepela mo ditaong tsa me, mme ba tlhapatsa bosabata ba me, gonne dipelo tsa bone di ne di sala medimo ya bone ya disetwa morago.
17“Le fa go ntse jalo matlho a me a ba rekegela mo go ba senyeng, mme ke se ka ka ba nyeleletsa ruri mo nageng. 18Ka raya bana ba bone mo nageng ka re: ‘Lo se ka lwa sepela mo ditaong tsa borraeno, se tlhokomeleng dikatlholo tsa bone, le fa e le go itshekolola ka medimo ya bone ya disetwa. 19Ke nna Morena Modimo wa lona; sepelang mo ditaong tsa me, lo tshegetseng dikatlholo tsa me, lo di dire. 20Lo itshepise bosabata ba me; mme ba tlaa nna sesupo gare ga me le lona, gore lo itse fa ke le Morena Modimo wa lona.’
21“Mme bana ba ntsuololela; ga ba a ka ba sepela mo ditaong tsa me, le fa e le go tshegetsa dikatlholo tsa me go di dira, tse e ka reng fa motho a di dira, o ka tshela ka tsone; ba tlhapatsa bosabata ba me; foo ka re: Ke tlaa ba goromeletsa tšararego ya me, go dirafatsa bogale jwa me mo go bone mo nageng. 22Le fa go ntse jalo ka gona seatla sa me, ka direlela leina la me, gore le se ka la tlhapadiwa mo ponong ya merafe e e rileng ke ba ntsha ya bo e lebile. 23Gape ka ba tsholeletsa seatla sa me mo nageng, ka re: Ke tlaa ba gasamisetsa mo merafeng, ke ba falaletsa mo mafatsheng, 24ka go bo ba se ka ba dirafatsa dikatlholo tsa me, ba gana ditao tsa me, ba tlhapatsa bosabata ba me, matlho a bone le one a lebela medimo ya disetwa ya borraabo.
25“Gape le gone ka ba naya ditao tse di seng molemo, le dikatlholo tse ba tlaa bong ba sa tshele ka tsone; 26ka ba itshekolola mo dineong tsa bone tota, ka ba ne ba tle ba ralatse bana botlhe ba ntlha mo molelong, e le gore ke tle ke ba swafatse, ka boikaelelo jwa gore ba tle ba itse fa ke le Jehofa.
27“Ke gone, wena morwa motho, bua le ba ntlo ya Iseraele, o ba reye o re: Morena Modimo o bua jaana, a re: Gape le mo go seo se borraeno ba ntlhapaditse, ka go bo ba ntloletse. 28Gonne e rile ke sena go ba lere mo lefatsheng le ke ba tsholeleditseng seatla ka ga lone, ka re: Ke tlaa le ba naya, foo ba senka lekhubu lengwe le lengwe le le godileng, le setlhare sengwe le sengwe se se kima, mme ba isa ditlhabelo tsa bone teng, ba supa teng se se rumolang sa tshupelo ya bone, ba ba ba dira gone lonko lo lo monate lwa bone, ba thela gone ditshupelo tsa bone tse di nowang. 29Foo ka ba raya ka re: Felo fa go tlotlometseng kwa lo yang gone go kayang? Jalo leina la gone le bidiwa Bama, le gompieno. 30Ke gone raya ba ntlo ya Iseraele o re: Morena Modimo o bua jaana, a re: A lo a itshekolola ka fa mokgweng wa borraeno? A lo bile lo akafalela tse di makgapha tsa bone? 31E a re fa lo isa dineo tsa lona, e a re fa lo ralatsa bana ba lona molelo, a lo sa ntse lo itshekolola ka medimo yotlhe ya lona ya disetwa le gompieno? Mme a ke ka bodiwa ke lona, lona ba ntlo ya Iseraele? Jaaka ke tshedile, go bua Morena Modimo, ke gana go bodiwa ke lona.
32“Le gone se se tsogang mo mogopolong wa lona ga se ketla se dirafala gope; ka lo tle lo re: ‘Re tlaa nna jaaka merafe, jaaka ditshika tsa mafatshe, ka go direla logong le lentswe.’
Modimo o tlaa otlhaa o ba o itshwarela Baiseraele
33“Jaaka ke tshedile,” go bua Morena Modimo, “ruri ke tlaa nna kgosi mo go lona, ka seatla se se thata, le ka letsogo le le otlologileng, le ka tšararego e e goromeditsweng. 34Ke tlaa lo ntsha mo ditšhabeng, ke tlaa lo phutha kwa mafatsheng kwa lo gasamesegetseng teng, ka seatla se se thata, le ka letsogo le le otlologileng, le ka tšararego e e goromeditsweng. 35Ke tlaa lo ntshetsa kwa nageng ya ditšhaba, ke ganetsanya le lona teng re lebanye mo matlhong. 36Fela jaaka nkile ka ganetsanya le borraeno mo nageng ya lefatshe la Egepeto, ke tlaa ganetsanya le lona jalo, go bua Morena Modimo.
37“Ke tlaa lo huhumetsa lore, ke tlaa lo lere mo boikgolegong jwa kgolagano; 38ke tlaa ntshetsa ruri batsuolodi mo go lona, le ba ba ntlolelang; ke tlaa ba ntsha mo lefatsheng le ba jakileng mo go lone, ga ba ketla ba tsena mo lefatsheng la Iseraele; mme lo tlaa itse fa ke le Jehofa.
39“Ka ga lona, lona ba ntlo ya Iseraele, Morena Modimo o bua jaana a re: Tsamayang, mongwe le mongwe a ye a direle medimo ya gagwe ya disetwa, le gone mo lobakeng lo lo tlang, fa lo gana go ntheetsa; mme leina la me le le itshepileng ga lo ketla lo tlhola lo le tlhapatsa ka dineo tsa lona, le ka medimo ya lona ya disetwa. 40Gonne mo thabeng ya me e e boitshepo, mo thabeng e e tlhorameng ya Iseraele, go bua Morena Modimo, botlhe ba ntlo ya Iseraele, botlhe fela, ba tlaa ntirela teng mo lefatsheng; ke tlaa ba amogela teng, ke tlaa lopa teng ditshupelo tsa lona, le mabutswapele a diromololo tsa lona, di na le dilo tsotlhe tsa lona tse di itshepileng. 41Ke tlaa lo amogela jaaka lonko lo lo monate, mogang ke lo ntshang mo ditšhabeng, ke lo phutha kwa mafatsheng kwa lo gasametseng teng; mme ke tlaa itshepisiwa mo go lona mo ponong ya merafe. 42Lo tlaa itse fa ke le Jehofa, mogang ke lo fitlhisang mo lefatsheng la Iseraele, mo lefatsheng le ke le tsholeleditseng seatla ka re ke tlaa le naya borraeno. 43Lo tlaa gakologelwa ditsela tsa lona teng, le ditiro tsotlhe tsa lona, tse lo iitshekolotseng ka tsone; mme lo tlaa ikila mo ponong ya lona ka ntlha ya masula otlhe a lo a dirileng. 44Lo tlaa itse fa ke le Jehofa, ke sena go dira le lona ke direlela leina la me e seng ka fa ditseleng tsa lona tse di bosula, le fa e le ka fa ditirong tsa lona tse di bodileng, lona ba ntlo ya Iseraele, go bua Morena Modimo.”
Molelo o tla a nyeletsa sekgwa sa borwa
45Lefoko la ga Jehofa la tla mo go nna, la re, 46“Morwa motho, lebisa sefatlhogo sa gago ntlheng ya borwa, mme o lotlegele lefoko kwa Borwa, o perofese o nyatse sekgwa sa naga ya Borwa. 47O reye sekgwa sa Borwa o re: Utlwa lefoko la ga Jehofa. Morena Modimo o bua jaana a re: Bona, ke tlaa tshuba molelo mo go wena, mme o tlaa laila setlhare sengwe le sengwe se setala mo go wena, le setlhare sengwe le sengwe se se omeletseng; molelo o o tutumang ga o ketla o tingwa, mme difatlhogo tsotlhe go tswa borwa go ya botsheka di tlaa fisiwa ka one. 48Nama yotlhe e tlaa bona fa e le nna Jehofa ke o tshubileng; ga o ketla o tingwa.”
49Foo ka re: “Ija we, Morena Modimo! Batho ba bua ka ga me, ba re: A ga se mmui wa ditshwantsho?”
