Tsogo ya ga Jesu
1Jaana e rile letsatsi la Sabata le setse le fetile, bosigo boo sa jwa letsatsi la ntlha la beke, ga tla Maria Magetalene le Maria yo mongwe, ba tla go bona phupu. 2Mme bonang, ga nna thoromo e kgolo ya lefatshe; gonne moengele wa Morena a fologa kwa legodimong, a tla a pitikololela lentswe kwa thoko, mme a dula mo go lone. 3Ponalo ya gagwe ya bo e ntse jaaka logadima, diaparo tsa gagwe di le ditshweu jaaka kapoko. 4Mme balebedi ya re ka ba mmoifa, ba roroma thata, ba ba ba nna jaaka ba ba suleng.
5Mme moengele a bua, a raya basadi a re: “Lo se boifeng; gonne ke a itse fa lo batla Jesu yo o ne a bapotswe. 6Ga a yo fa; gonne o tsogile, fela jaaka a ne a bua. Tlang lo bone felo fa Morena o ne a letse teng. 7Mme lo itlhaganele, lo ye go raya barutwa ba gagwe lo re: ‘O tsogile mo baswing; mme bonang, o lo etelela pele kwa Galilea; lo tlaa mmona teng;’ lo bo lo bone, ke lo boleletse.”
8Ba itlhaganela ba tswa fa phupung ka poifo le ka boitumelo jo bogolo, ba siana ba ya go itsise barutwa ba gagwe.
9Mme bonang, Jesu a kgatlhana nabo, a re: “Dumelang.” Mme ba tla ba tshwara dinao tsa gagwe, ba mo obamela. 10Foo Jesu a ba raya a re: “Se boifeng; yang go raya bana ba ga Rre, lo re, ba ye Galilea mme ba tlaa mpona teng.”
Polelo ya badisa ba phupu
11Mme jaana, ya re ba sa ntse ba tsamaya, bonang, bangwe ba lekoko la badisa ba ya mo motseng, ba bolelela ditlhogo tsa baperesiti dilo tsotlhe tse di dirafetseng. 12Mme e rile ba sena go phuthega le bagolwane, ba gakololanye, ba naya batlhabani madi a le mantsi thata, 13ba re: “Lo tle lo re: ‘Barutwa ba gagwe ba tsile bosigo ba mo utswa re robetse.’ 14E tlaa re fa selo se se ka fitlha mo ditsebeng tsa molaodi, ene re tlaa mo kgona, le lona re lo sireletse.”
15Jalo ba amogela madi, ba dira jaaka ba rutilwe; mme polelo e, ya tumisiwa mo Bajuteng, le gompieno e sa ntse e le teng.
Jesu o iponatsa mo go ba ba lesome le motso
16Barutwa ba ba 11 ba tloga ba ya kwa Galilea, kwa thabeng e Jesu o e ba kaetseng. 17Mme e rile ba mmona, ba mo obamela; bangwe ba belaela. 18Mme Jesu a tla kwa go bone, a bua nabo a re: “Taolo yotlhe ke e neilwe kwa legodimong le mo lefatsheng. 19Ke gone tsamayang, lo dire merafe yotlhe barutwa, lo ba kolobetse mo ineng la Rara, le la Morwa, le la Morwa o o Boitshepo. 20Lo ba rute go tlhokomela dilo tsotlhe tse ke di lo laoletseng; mme bonang, ke bo ke ntse ke na le lona ka metlha yotlhe, go ya bokhutlong jwa metlha.”
