DIANE 15

₁Phetolo e e bonolo e thibosa bogale, mme lefoko le le tlhokofatsang le tle le tlhotlheletse bogale.

₂Loleme lwa ba ba tlhalefileng lo bolela kitso ka go siameng, mme molomo wa dieleele o gorometse boeleele fela.

₃Matlho a ga Jehofa a mo mafelong otlhe, a lebeletse ba ba bosula le ba ba molemo.

₄Loleme lo lo phepa ke setlhare sa botshelo, mme fa bogwadi bo le mo go lone bo phatlole pelo.

₅Lesilo le nyatsa thuto ya rra lone, mme yo o elang kgalemelo tlhoko o bapala bonokopela.

₆Mo ntlong ya mosiami go na le khumo e kgolo, mme mo dibapalong tsa baikepi go na le letshwenyo.

₇Dipounama tsa ba ba tlhalefileng di gasa kitso, mme pelo ya dieleele ga e dire jalo.

₈Setlhabelo sa baikepi ke makgapha mo go Jehofa, mme morapelo wa mothokgami o a mo natefela.

₉Tsela ya moikepi ke makgapha mo go Jehofa, mme o rata ene yo o latelang tshiamo.

₁₀Yo o tlogelang tsela o na le go otlhaiwa mo go botlhoko, mme yo o ilang kgalemelo o tlaa swa.

₁₁Bobipo le Bosenyegelo ke dilo tse di senogileng fa pele ga Jehofa, mme dipelo tsa batho tsone bogolo jang!

₁₂Mosotli ga a rate go kgalemelwa, ga a ketla a ya kwa go yo o tlhalefileng.

₁₃Pelo e e ntseng mokete e sesa sefatlhogo, mme mowa o phatlolwe ke bohutsana jwa pelo.

₁₄Pelo ya yo o nang le tlhaloganyo e batla kitso, mme melomo ya dieleele e theneketse bosilo fela.

₁₅Malatsi otlhe a ba ba patikwang a bosula, mme yo pelo ya gagwe e jang monate o na le modiro o o sa khutleng.

₁₆Bonnye fa bo na le poifo ya ga Jehofa, bo molemo bogolo go khumo e kgolo, fa e na le letshwenyo.

₁₇Go ja dijo tsa merogo fela, fa e na le lorato, go molemo bogolo go kgomo e e otlilweng, fa e na le kilo.

₁₈Motho yo o šakgalang bobe o tlhotlheletsa kgang, mme yo o bonya go galefa o kokobetsa komano.

₁₉Tsela ya serorobe e ntse jaaka logora lwa mitlwa, mme tselana ya mothokgami e dirwa ya mheru fela.

₂₀Mosimane yo o tlhalefileng o itumedisa rraagwe, mme motho wa seeleele o nyatsa mmaagwe.

₂₁Bofafalele ke boitumelo fela mo go yo o tlhokang botlhale, mme motho yo o nang le tlhaloganyo o siamisa motsamao wa gagwe.

₂₂Kwa go se nang kgakololo gone, maikaelelo a tle a tlhaele, mme mo bontsing jwa bagakolodi a tle a tlhomame.

₂₃Motho o na le boitumelo mo go fetoleng ga molomo wa gagwe; mme lefoko, fa le buiwa mo lobakeng lo e leng lone, le molemo jang!

₂₄Mo go ba ba tlhalefileng tsela ya botshelo e tlhatlogela kwa godimo, gore ba tlogelele Bobipo kwa tlase.

₂₅Jehofa o tlaa epolola ntlo ya ba ba ikgodisang, mme o tlaa tlhomamisa mololwane wa mosadi wa motlholagadi.

₂₆Ditogamaano tse di bosula di makgapha mo go Jehofa, mme mafoko a a monate a itshekile.

₂₇Yo o segagapa mo papading o tshwenya ntlo ya gagwe, mme yo o ilang dimpho o tlaa tshela.

₂₈Pelo ya mosiami e tlhatlhanya go fetola, mme molomo wa baikepi o tle o gorometse dilo tse di bosula.

₂₉Jehofa o kgakala le baikepi, mme o utlwa morapelo wa basiami.

₃₀Lesedi la matlho le itumedisa pelo, le mafoko a a molemo a nontsha marapo.

₃₁Tsebe e e reetsang kgalemelo ya botshelo e tlaa nnela ruri mo go ba ba tlhalefileng.

₃₂Yo o ganang kwatlhao o inyatsa mowa, mme yo o reetsang kgalemelo o bona tlhaloganyo.

₃₃Go boifa Jehofa ke yone thuto ya botlhale, mme boikokobetso bo tle bo etelele tlotlo pele.